Read სბს–სტოკჰოლმი 2001 2 მეფეთა 4 Bible Online

2 მეფეთა 4 - სბს–სტოკჰოლმი 2001 bible

2 მეფეთა 4

¹და როცა შეიტყო საულის ძემ, რომ მოკვდა აბნერი ხებრონში, წარეკვეთა იმედი და შეშფოთდა მთელი ისრაელიც.

²ორი კაცი ჰყავდა საულის ძეს, რაზმის მეთაურები, ერთს ერქვა ბაყანა, მეორეს - რეხაბი, რიმონ ბეეროთელის ძენი იყვნენ, ბენიამინის ძეთაგან, რადგან ბეეროთი ბენიამინში ირიცხებოდა.

³თავად ბეეროთელნი გითაიმში გაიქცნენ და დღემდე იქ მდგმურობენ.

⁴და იონათანს, საულის ძეს, ერთი ფეხმტკივანი ძე ჰყავდა. ხუთი წლის იყო, როცა საულისა და იონათანის ამბავი მოვიდა იზრეყელიდან. და ხელში აიყვანა იგი ძიძამ და გაიქცა. გაქცევისას დაუვარდა ბავშვი და დაკოჭლდა. მისი სახელი იყო მეფიბოშეთი.

⁵და წავიდნენ რიმონ ბეეროთელის ვაჟები - რეხაბი და ბაყანა და დღის ხვატში მიადგნენ იშბოშეთის სახლს. ის კი საწოლზე იწვა და ეძინა შუადღის ძილით.

⁶და აჰა, რეხაბი და ბაყანა, მისი ძმა შევიდნენ შიგ სახლში, ვითომდა ხორბლის საყიდლად, და მეხუთე ნეკნთან ჩასცეს მახვილი. და მიიმალნენ.

⁷როცა ისინი შევიდნენ სახლში, [იშბოშეთს] თავის საწოლზე ეძინა, საწოლ ოთახში, და მახვილი ჩასცეს, მოკლეს და თავი მოაჭრეს. და წამოიღეს მისი თავი და მთელი ღამე იარეს ყარაბას გზით.

⁸და მიუტანეს იშბოშეთის თავი დავითს ხებრონში და უთხრეს მეფეს: “აჰა, იშბოშეთის თავი, საულის, შენი მტრის, ძისა, რომელსაც შენი მოკვლა უნდოდა, შური უძია უფალმა ჩემს მეფე-ბატონს საულისგან და მისი ნაშიერისგან.

⁹და მიუგო დავითმა რეხაბს და მის ძმას ბაყანას, ბეეროთელი რიმონის ვაჟებს, და უთხრა: “ცოცხალია უფალი, რომელმაც მიხსნა ყოველი გასაჭირისგან!

¹⁰თუკი მაცნე, რომელმაც შემატყობინა საულის სიკვდილი და კეთილის მახარობელი ეგონა თავი, შევიპყარი და მოვკალი ციკლაგში, იმის ნაცვლად, რომ სამახარობლო მიმეცა,

¹¹რას იმსახურებენ ის ბოროტეული კაცები, რომელთაც უდანაშაულო კაცი თავისსავე სახლში, თავის საწოლში მოკლეს? ახლა განა თქვენ ხელს არ უნდა მოვკითხო მისი სისხლი და არ უნდა აღმოგფხვრათ ამ ქვეყნიდან?”

¹²და უბრძანა დავითმა მსახურებს და დახოცეს ისინი. და ხელ-ფეხი დააჭრეს და ტბორზე გადმოკიდეს ხებრონში. ხოლო იშბოშეთის თავი აიღეს და აბნერის საფლავში დამარხეს ხებრონში.