Read სბს–სტოკჰოლმი 2001 2 მეფეთა 9 Bible Online

2 მეფეთა 9 - სბს–სტოკჰოლმი 2001 bible

2 მეფეთა 9

¹და თქვა დავითმა: “ხომ არ დარჩენილა ვინმე საულის სახლიდან, რომ წყალობა ვუყო იონათანის გულისათვის?”

²და ჰყავდა საულის სახლს მსახური, სახელად ციბა; და დაუძახეს მას დავითთან, და უთხრა მეფემ: “შენა ხარ ციბა?” თქვა: “გახლავარ შენი მსახური.”

³უთხრა მეფემ: “აღარავინ დარჩენილა საულის სახლიდან, რომ ღვთის წყალობა ვუყო?” და უთხრა ციბამ მეფეს: “კიდევ ჰყავს ვაჟი იონათანს, ფეხმტკივანი.”

⁴და უთხრა მას მეფემ: “სად არის?” და უთხრა ციბამ მეფეს: “აჰა, მაქირ ყამიელის ძის სახლშია, ლოდებარს.”

⁵და გაგზავნა დავით მეფემ და მოაყვანინა იგი მაქირ ყამიელის ძის სახლიდან, ლოდებარიდან.

⁶მოვიდა მეფიბოშეთი, იონათან საულის ძის ვაჟიშვილი, დავითთან, და პირქვე დაეცა მის წინაშე, და თაყვანისცა. უთხრა დავითმა: “მეფიბოშეთ!” მიუგო: “გახლავარ შენი მსახური!”

⁷და უთხრა დავითმა: “ნუ გეშინია, წყალობას გიზამ მამაშენის, იონათანის, გულისათვის, დაგიბრუნებ მამაშენის, საულის, მთელ მიწებს და მუდამ ჩემს სუფრაზე შეჭამ პურს.”

⁸და თაყვანისცა და უთხრა: “ვინ არის შენი მსახური, რომ ყურადღების ღირსად ჩათვალე ჩემსავით მკვდარი ძაღლი?”

⁹მოუხმო მეფემ ციბას, საულის მსახურს, და უთხრა: “საულისა და მისი სახლის მთელი საბადებელი შენი ბატონისთვის მიმიცია.

¹⁰დაუმუშავეთ მიწა შენ, შენმა შვილებმა და შენმა მსახურებმა მას, და აიღეთ მოსავალი, რომ ჰქონდეს შენი ბატონის შვილს თავისი საჭმელი პური. და მაინც მეფიბოშეთი, შენი ბატონის შვილი, მუდამ ჩემს სუფრაზე შეჭამს პურს.” თხუთმეტი ვაჟიშვილი და ოცი მსახური ჰყავდა ციბას.

¹¹და უთხრა ციბამ მეფეს: “ყველაფერს შეასრულებს შენი მსახური, რაც მეფე ბატონმა უბრძანა თავის მსახურს.” და ჭამდა მეფიბოშეთი პურს სუფრაზე, როგორც ერთი უფლისწულთაგანი.

¹²პატარა ბავშვი ჰყავდა მეფიბოშეთს, სახელად მიქა. და მეფიბოშეთის მსახურნი გახდნენ ყველანი, ვინც კი ციბას სახლში ცხოვრობდა.

¹³და ცხოვრობდა მეფიბოშეთი იერუსალიმში, რათა მუდამ სამეფო სუფრაზე ეჭამა პური. ორივე ფეხით კოჭლი იყო იგი.