Read სბს–სტოკჰოლმი 2001 4 მეფეთა 1 Bible Online

4 მეფეთა 1 - სბს–სტოკჰოლმი 2001 bible

4 მეფეთა 1

¹და განუდგა მოაბი ისრაელს ახაბის სიკვდილის შემდეგ.

²და გადმოვარდა ახაზია თავისი ზემოთვალის სარკმლიდან სამარიაში და დასნეულდა. და გაგზავნა მოციქულები და დააბარა: "წადით და დაეკითხეთ ბაყალ-ზებუბს, ყეკრონის ღმერთს, მოვრჩები თუ არა ამ სნეულებისგან?” თ

³უფლის ანგელოზმა უთხრა ელია თიშბელს: "წადი, და დახვდი სამარიის მეფის მოციქულებს და ეუბნე: 'ნუთუ აღარ არის ღმერთი ისრაელში, რომ ყეკრონის ღმერთთან, ბაყალ-ზებუბთან მიდიხართ საკითხავად?'

⁴ამიტომ ამბობს ასე უფალი: 'ვეღარ ადგები მაგ საწოლიდან, რომელზეც წევხარ, რადგან უნდა მოკვდე.'“ და წავიდა ელია.

⁵და დაბრუნდნენ მოციქულები მასთან და უთხრა მათ: "რისთვის დაბრუნდით?”

⁶და უთხრეს: "კაცი ამოვიდა ჩვენს შესახვედრად და გვითხრა: წადით, დაბრუნდით მეფესთან, რომელმაც გამოგგზავნათ და უთხარით: ასე ამბობს-თქო უფალი: 'ნუთუ აღარ არის ღმერთი ისრაელში, რომ ყეკრონის ღმერთთან, ბაყალ-ზებუბთან, მიდიხართ სამკითხაოდ? ამიტომაც ვეღარ ადგები მაგ საწოლიდან, რომელზეც წევხარ, რადგან უნდა მოკვდე.'“

⁷ეუბნა მათ: "როგორ გამოიყურება ის კაცი, წინ რომ შემოგხვდათ და ეს სიტყვები გითხრათ?”

⁸და უთხრეს მას: "ბალანი მოსავს იმ კაცს და წელზე ტყავის სარტყელი არტყია.” და თქვა: "ეს ელია თიშბელია.” თ

⁹და მიუგზავნა მას ორმოცდაათისთავი თავისი ორმოცდაათეულითურთ. და ავიდა მასთან, და აჰა, მთის თხემზე ზის ელია. და ეუბნა მას: "ღვთისკაცო! მეფე გეუბნება, ძირს ჩამოხვიდე.”

¹⁰და მიუგო ელიამ და უთხრა ორმოცდაათისთავს: "თუ მე ღვთისკაცი ვარ, ცეცხლი ჩამოიჭრას ციდან და გშთანთქას შენი ორმოცდაათი კაცითურთ.” და ჩამოიჭრა ცეცხლი ციდან და შთანთქა მისი ორმოცდაათი კაცითურთ.

¹¹და კვლავ მიუგზავნა სხვა ორმოცდაათისთავი თავის ორმოცდაათეულითურთ. და მიუგო და ეუბნა მას: "ღვთისკაცო! ასე ბრძანებს მეფე: 'ჩამოდი სასწრაფოდ!'“

¹²და მიუგო ელიამ და ეუბნა: "თუ მე ღვთისკაცი ვარ, ცეცხლი ჩამოიჭრას ციდან და გშთანთქას შენი ორმოცდაათი კაცითურთ.” და ჩამოიჭრა ცეცხლი ციდან და შთანთქა იგი მისი ორმოცდაათი კაცითურთ.

¹³და მესამედ მიუგზავნა ორმოცდაათისთავი თავისი ორმოცდაათეულითურთ. და ავიდა მესამე ორმოცდაათისთავი და მუხლი მოიყარა ელიას წინაშე, შეევედრა მას და ეუბნა: "ღვთისკაცო! ფასი დასდე ჩემს სიცოცხლეს და ამ ორმოცდაათი შენი მსახურის სიცოცხლეს შენს თვალში.

¹⁴აჰა, ციდან ჩამოიჭრა ცეცხლი და შთანთქა ორი წინა ორმოცდაათისთავი თავის ორმოცდაათ კაცთან ერთად. ახლა ფასი დასდე ჩემს სიცოცხლეს შენს თვალში.”

¹⁵და ეუბნა უფლის ანგელოზი ელიას: "ჩაჰყევი, ნუ გეშინია მათი.” და ადგა ელია და ჩავიდა მათთან ერთად მეფესთან.

¹⁶და ეუბნა მას: "ასე ამბობს უფალი: 'რაკი ბაყალ-ზებუბთან, ყეკრონის ღმერთთან, გაგზავნე მოციქულები სამკითხაოდ, თითქოს არ ყოფილიყოს ისრაელში ღმერთი, რომ დაჰკითხებოდი მის სიტყვას, ამიტომაც ვერ ადგები მაგ საწოლიდან, სადაც წევხარ, რადგან უსათუოდ მოკვდები.'“

¹⁷და მოკვდა კიდეც უფლის სიტყვისამებრ, როგორც იუბნა ელიამ. და მის ნაცვლად იორამი გამეფდა იუდას მეფის იორამ იოშაფატის ძის მეორე წელს. რადგან მას ძე არ ჰყოლია.

¹⁸და ახაზიაჰუს დანარჩენი საქმენი, რაც გააკეთა, ისრაელის მეფეთა მატიანეშია ჩაწერილი.