Read სბს–სტოკჰოლმი 2001 4 მეფეთა 15 Bible Online

4 მეფეთა 15 - სბს–სტოკჰოლმი 2001 bible

4 მეფეთა 15

¹იერობყამის, ისრაელის მეფის, ოცდამეშვიდე წელს გამეფდა ყაზარია, იუდას მეფის ამაციაჰუს ძე.

²თექვსმეტი წლისა იყო, რომ გამეფდა და ორმოცდათორმეტი წელი იმეფა იერუსალიმში, მისი დედა იყო იექალიაჰუ, იერუსალიმიდან.

³სწორს აკეთებდა უფლის თვალში, ისევე როგორც მამამისი ამაციაჰუ;

⁴ოღონდ გორაკები არ იყო გაუქმებული. და გორაკებზე სწირავდა მსხვერპლს ხალხი და აკმევდა საკმეველს.

⁵და დასაჯა უფალმა მეფე და სიკვდილამდე კეთროვანი იყო, და ცხოვრობდა სამკურნალო სახლში. იოთამი, მეფისწული, სასახლეს ზედამხედველობდა და განსჯიდა ქვეყნის ერს.

⁶ყაზარიაჰუს დანარჩენი საქმენი, ყველაფერი, რაც გააკეთა, იუდას მეფეთა მატიანეშია ჩაწერილი.

⁷და განისვენა ყაზარიამ თავის მამებთან და დამარხეს იგი თავის მამებთან დავითის ქალაქში. და მის ნაცვლად მისი ძე იოთამი გამეფდა.

⁸იუდას მეფის ყაზარიაჰუს ოცდამეთვრამეტე წელს გამეფდა ზაქარია იერობყამის ძე ისრაელზე სამარიაში და ექვსი თვე იმეფა.

⁹ბოროტს აკეთებდა უფლის თვალში, როგორც მისი მამა-პაპა აკეთებდა. და არ განრიდებია იერობყამ ნაბატის ძის ცოდვებს, რომელმაც აცთუნა ისრაელი.

¹⁰და აუჯანყდა მას შალუმი, იაბეშის ძე, და მოკლა იგი კაბალ-ყამმა და გამეფდა მის ნაცვლად.

¹¹ზაექარიაჰუს დანარჩენი საქმენი ისრაელის მეფეთა მატიანეშია ჩაწერილი.

¹²ასეთი იყო უფლის სიტყვა, რომელიც გამოუცხადა მან იეჰუს: "მეოთხე თაობამდე ისხდებიან შენი შვილები ისრაელის ტახტზე.” და ახდა კიდეც.

¹³შალუმ იაბეშის ძე გამეფდა იუდას მეფის ყუზიას ოცდამეცხრამეტე წელს და ერთი თვე იმეფა სამარიაში.

¹⁴და წამოვიდა მენახემ გადის ძე თირცადან და მოადგა სამარიას. და დაამარცხა შალუმ იაბეშის ძე სამარიაში, და მოკლა იგი და გამეფდა მის ნაცვლად.

¹⁵შალუმის საქმენი და მისი აჯანყების ამბავი, რომელიც მან მოაწყო, ისრაელის მეფეთა მატიანეშია ჩაწერილი.

¹⁶მაშინ მოსრა მენახემმა თიფსახი და ყველაფერი, რაც მასში იყო. და მოსრა მთელი მხარე თირცადან მოყოლებული რადგან არ გააღეს კარიბჭეები. შუაზე გააპო ყველა ორსული ქალი.

¹⁷იუდას მეფის, ყაზარიას, ოცდამეცხრამეტე წელს გამეფდა მენახემ გადის ძე, ისრაელის მეფე, და ათი წელი იმეფა სამარიაში.

¹⁸ბოროტს აკეთებდა უფლის თვალში, და არ განრიდებია მთელი თავისი სიცოცხლე იერობყამ ნაბატის ძის ცოდვებს, რომელმაც აცთუნა ისრაელი.

¹⁹და წამოვიდა ფული, აშურის მეფე, ქვეყნისაკენ და მისცა მენახემმა ფულს ათასი ქანქარი ვერცხლი, რომ ყოფილიყო მისი შემწეობის ქვეშ და მტკიცედ სჭეროდა ხელში მეფობა.

²⁰და დააკისრა მენახემმა ეს ვერცხლი ისრაელიანთ, ყველა შეძლებულ კაცს - კაცზე ორმოცდაათი შეკელი - აშურის მეფისთვის მისაცემად. და უკან გაბრუნდა აშურის მეფე, არ გაჩერებულა იქ, ქვეყანაში.

²¹მენახემის დანარჩენი საქმენი, ყველაფერი, რაც გააკეთა, ისრაელის მეფეთა მატიანეშია ჩაწერილი.

²²და განისვენა მენახემმა თავის მამებთან და მის ნაცვლად მისი ძე ფეკახია გამეფდა.

²³ყაზარიას, იუდას მეფის, ორმოცდამეათე წელს გამეფდა ფეკახია მენახემის ძე ისრაელზე სამარიაში და ორი წელი იმეფა.

²⁴ბოროტს აკეთებდა უფლის თვალში, და არ განრიდებია იერობყამ ნაბატის ძის ცოდვებს, რომელმაც აცთუნა ისრაელი.

²⁵და აუჯანყდა მას ფეკახი, რემალიაჰუს ძე, მისი კარისკაცი, მიუხდა სამარიაში, მეფის სასახლის დარბაზში, არგობსა და არიესთან ერთად, თან ორმოცდაათი გილყადელი ახლდა, და მოკლა იგი და გამეფდა მის ნაცვლად.

²⁶ფეკახიას დანარჩენი საქმენი, ყველაფერი, რაც გაუკეთებია, ისრაელის მეფეთა მატიანეშია ჩაწერილი.

²⁷იუდას მეფის ყაზარიას, ორმოცდამეთორმეტე წელს გამეფდა ფეკახი რემალიაჰუს ძე, ისრაელზე, სამარიაში და იმეფა ოცი წელი.

²⁸და ბოროტს აკეთებდა უფლის თვალში, და არ განრიდებია იერობყამ ნაბატის ძის ცოდვებს, რომელმაც აცთუნა ესრაელი.

²⁹ისრაელის მეფის, ფეკახის დროს მოვიდა თიგლათ-ფილესერი, აშურის მეფე, და აიღო ყიონი, აბელ-ბეთ-მაყაქა, იანოახი, კედეში, ხაცორი, გილყადი და გალილეა, მთელი ნაფთალის ქვეყანა და აშურში გადაასახლა ხალხი.

³⁰და აუჯანყდა ჰოშეაყ ელიას ძე, ფეკახ რემალიაჰუს ძეს, და სძლია მას, და მოკლა და გამეფდა მის ნაცვლად იოთამ ყუზიას ძის მეოცე წელს.

³¹ფეკახის დანარჩენი საქმენი, ყველაფერი, რაც გაუკეთებია, ისრაელის მეფეთა მატიანეშია ჩაწერილი.

³²ისრაელის მეფის, ფეკახ რემალიაჰუს ძის მეორე წელს გამეფდა იოთამ ყუზიაჰუს ძე, იუდას მეფე.

³³ოცდახუთი წლის იყო, როცა გამეფდა და თექვსმეტი წელი იმეფა იერუსალიმში. დედამისი იყო იერუშა, ცადოკის ასული.

³⁴სწორს აკეთებდა უფლის თვალში, როგორც მამამისი ყუზიაჰუ აკეთებდა, ასევე აკეთებდა იგი.

³⁵ოღონდ გორაკები არ იყო გაუქმებული. ჯერაც გორაკებზე სწირავდა ხალხი მსხვერპლს და აკმევდა საკმეველს. მან აღადგინა უფლის სახლის ზემო კარიბჭე.

³⁶იოთამის დანარჩენი საქმენი, ყველაფერი, რაც გაუკეთებია, იუდას მეფეთა მატიანეშია ჩაწერილი.

³⁷იმ დღეებში შეუჩინა უფალმა იუდას რეცინი, არამის მეფე, და ფეკახ რემალიაჰუს ძე.

³⁸და განისვენა იოთამმა თავის მამებთან და დაიმარხა თავის მამათა გვერდით თავისი მამის დავითის ქალაქში და მის ნაცვლად მისი ძე ახაზი გამეფდა.