Read სბს–სტოკჰოლმი 2001 4 მეფეთა 16 Bible Online

4 მეფეთა 16 - სბს–სტოკჰოლმი 2001 bible

4 მეფეთა 16

¹ფეკახ რემალიაჰუს ძის მეჩვიდმეტე წელს გამეფდა ახაზი, იუდას მეფის იოთამის ძე.

²ოცი წლისა იყო ახაზი, როცა გამეფდა და თექვსმეტი წელი იმეფა იერუსალიმში. არ აკეთებდა სწორს უფლის, თავისი ღვთის, თვალში, როგორც იქცეოდა მამამისი დავითი.

³და დადიოდა ისრაელის მეფეთა გზით. თავისი შვილიც კი ცეცხლში გაატარა იმ წარმართთა ბილწი ჩვეულებისამებრ, რომელნიც აჰყარა უფალმა ისრაელიანთაგან.

⁴მსხვერპლს სწირავდა და საკმეველს აკმევდა გორაკებზე, ბორცვებზე და ყოველი ხემხვივანის ქვეშ.

⁵მაშინ აღდგნენ რეცინი, არამის მეფე, და ისრაელის მეფე ფეკახ რემალიაჰუს ძე იერუსალიმის წინაააღმდეგ საომრად, მოიმწყვდიეს ახაზი ალყაში, მაგრამ ვერ სძლიეს მას.

⁶იმხანად დაუბრუნა რეცინმა, არამის მეფემ, ელათი არამს და აჰყარა იუდაელები ელათიდან. და ედომელები შევიდნენ ელათში და დღემდე იქ ცხოვრობენ.

⁷და გაუგზავნა ახაზმა თიგლათ-ფილესერს, აშურის მეფეს, მოციქულები და შეუთვალა: "შენი მსახური და შენი შვილი ვარ მე. მოდი და მიხსენი არამის მეფისა და ისრაელის მეფისგან, რომელნიც აღდგნენ ჩემს წინააღმდეგ.”

⁸და აიღო ახაზმა ოქრო-ვერცხლი, რაც კი უფლის სახლში და მეფის სახლის საგანძურებში იპოებოდა და ძღვნად გაუგზავნა აშურის მეფეს.

⁹და ისმინა მისი აშურის მეფემ და მოადგა აშურის მეფე დამასკოს, აიღო იგი და ხალხი კირაში გადაასახლა, ხოლო რეცინი მოკლა.

¹⁰და წავიდა მეფე ახაზი აშურის მეფის, თიგლათ-ფილესერის, მისაგებებლად დამასკოში, და ნახა სამსხვერპლო, დამასკოში რომ იყო, და გაუგზავნა მეფე ახაზმა ურია მღვდელს სამსხვერპლოს ნახატი და მთელი ნაგებობის გეგმა.

¹¹და ააშენა ურია მღვდელმა სამსხვერპლო. როგორც შეუთვალა მეფე ახაზმა დამასკოდან, ისე გააკეთა ყველაფერი ურია მღვდელმა მეფე ახაზის დაბრუნებამდე დამასკოდან.

¹²და დაბრუნდა მეფე დამასკოდან და იხილა მეფემ სამსხვერპლო, და მიეახლა მეფე სამსხვერპლოს და მიიტანა მსხვერპლი.

¹³და დაწვა სრულადდასაწველი და პურეულის შესაწირავი, და დაღვარა საღვრელი, და თავისი სამშვიდობო მსხვერპლის სისხლი ასხურა სამსხვერპლოს.

¹⁴სპილენძის სამსხვერპლო კი, უფლის წინაშე რომ იდგა, გადაანაცვლა ტაძრის წინა მხრიდან, სამსხვერპლოსა და უფლის სახლის შუა ადგილიდან, და მოათავსა სამსხვერპლოს გვერდით, ჩრდილოეთის მხარეს.

¹⁵და უბრძანა მეფე ახაზმა ურია მღვდელს: "დიდ სამსხვერპლოზე დაწვი დილის სრულადდასაწველი და საღამოს პურეულის ძღვენი, მეფის სრულადდასაწველი და მისი პურეულის ძღვენი, ქვეყნის მთელი ერის სრულადდასაწველი, მათი პურეულის ძღვენი და მათი საღვრელი. ყოველი სრულადდასაწველის სისხლი და ყოველი საკლავის სისხლი ასხურე მას. სპილენძის სამსხვერპლო კი ჩემი მისახედი იქნება.”

¹⁶ყველაფერი ისე გააკეთა ურია მღვდელმა, როგორც უბრძანა მას მეფე ახაზმა.

¹⁷და მოახლიჩა მეფე ახაზმა ფიცრები კვარცხლბეკებს და მოხსნა მათი საბანელი, და ჩამოიღო ზღვა სპილენძის ხარებიდან, რომლებზეც იდგა ის, და ქვის იატაკზე დადგა.

¹⁸საშაბათო ტალანი, ტაძართან რომ იყო აშენებული, და გარეთა სამეფო შესასვლელი უფლის ტაძრისკენ მოაქცია აშურის მეფის გულისთვის.

¹⁹ახაზის დანარჩენი საქმენი, რაც გაუკეთებია, იუდას მეფეთა მატიანეშია ჩაწერილი.

²⁰და განისვენა ახაზმა თავის მამებთან და დაიმარხა მამათა გვერდით დავითის ქალაქში. და მის ნაცვლად მისი ძე ხიზკიაჰუ გამეფდა.