Read სბს–სტოკჰოლმი 2001 4 მეფეთა 20 Bible Online

4 მეფეთა 20 - სბს–სტოკჰოლმი 2001 bible

4 მეფეთა 20

¹იმ ხანებში სასიკვდილოდ დასნეულდა ხიზკიაჰუ, და მივიდა მასთან ესაია ამოცის ძე, წინასწარმეტყველი, და უთხრა: "ასე ამბობს უფალი: 'ანდერძი დაუტოვე შენს სახლს, რადგან კვდები და ვერ გადარჩები.'“

²კედლისკენ მიაბრუნა პირი და შეევედრა უფალს:

³"უფალო! გაიხსენე, წრფელი გულით რომ დავდიოდი შენს წინაშე, კეთილად რომ ვიქცეოდი შენს თვალში!” და მწარედ ატირდა ხიზკიაჰუ.

⁴შუა ქალაქიდან არ იყო ესაია გასული, რომ გამოეცხადა უფლის სიტყვა:

⁵"გაბრუნდი და უთხარი ხიზკიაჰუს, ჩემი ერის წინამძღოლს, ასე ამბობს-თქო დავითის, მამაშენის, ღმერთი: 'შევიწყნარე შენი ვედრება, დავინახე შენი ცრემლი, და აჰა, განგკურნავ. ზეგ წახვალ უფლის სახლში.

⁶და კიდევ თხუთმეტ წელიწადს შევმატებ შენს დღეებს, და აშურის მეფის ხელიდან დაგიხსნით შენ და ამ ქალაქს, და დავიფარავ ამ ქალაქს ჩემი გულისთვის და დავითის, ჩემი მსახურის, გულისთვის.'“

⁷და თქვა ესაიამ: "მოიტანეთ ლეღვის ტყლაპი.” და მოიტანეს და წყლულზე დაადეს, და განიკურნა.

⁸და უთხრა ხიზკიაჰუმ ესაიას: "რა იქნება იმის ნიშნად, რომ განმკურნავს უფალი, რომ ზეგ უფლის სახლში წავალ?”

⁹და თქვა ესაიამ: "ეს იყოს შენთვის ნიშნად უფლისგან, რომ აასრულებს უფალი თავის ნათქვამ სიტყვას: 'ათი საფეხურით წინ წავიდეს ჩრდილი თუ ათი საფეხურით დაბრუნდეს უკან?'“

¹⁰და თქვა ხიზკაიაჰუმ: "ადვილია ჩრდილისთვის ათი საფეხურით წინსვლა. არა, უკან დაბრუნდეს ჩრდილი ათი საფეხურით!”

¹¹და შესთხოვა უფალს ესაია წინასწარმეტყველმა და უკან დააბრუნა უფალმა ჩრდილი საფეხურებზე, რომლებზეც ჩამოდიოდა იგი, ახაზის საფეხურებზე, ათი საფეხურით.

¹²ამ დროს გამოუგზავნა მეროდაქ-ბალადან ბალადანის ძემ, ბაბილონის მეფემ, ხიზკიაჰუს წერილები და ძღვენი, რადგან გაგებული ჰქონდა, რომ ავად იყო ხიზკიაჰუ.

¹³და მოუსმინა მათ ხიზკიაჰუმ და დაათვალიერებინა მთელი თავისი საგანძური: ოქრო-ვერცხლი, ნელსურნელებანი, რჩეული ზეთი, საჭურველის სახლი, ყველაფერი, რაც კი მის საუნჯეებში იპოვებოდა. ერთი ნივთიც არ დარჩენილა მის სახლში და მთელს მის სამფლობელოში, რომ არ ეჩვენებინა მათთვის ხიზკიაჰუს.

¹⁴და მივიდა ესაია წინასწარმეტყველი მეფე ხიზკიაჰუსთან და უთხრა: "რა თქვეს ამ კაცებმა და საიდან მოვიდნენ შენთან?” და თქვა ხიზკიაჰუმ: "შორი ქვეყნიდან მოვიდნენ, ბაბილონიდან.”

¹⁵და თქვა: "რა ნახეს შენს სახლში?” და თქვა ხიზკიაჰუმ: "ყველაფერი ნახეს, რაც სახლში მაქვს. არაფერი დარჩენილა ჩემს საუნჯეებში, რომ არ მეჩვენებინა მათთვის.”

¹⁶და უთხრა ესაიამ ხიზკიაჰუს: "ისმინე უფლის სიტყვა:

¹⁷აჰა, დადგება დრო და ყველაფერს, რაც სახლში გაქვს, და რაც შენს მამებს დღემდე მოუხვეჭავთ, ბაბილონში წაიღებენ. აღარაფერი დარჩება, - ამბობს უფალი. -

¹⁸და წაასხამენ შენს შვილებსაც, რომელნიც შენგან გამოვლენ, რომელთაც შენ წარმოშობ, და საჭურისებად გახდიან ბაბილონის მეფის სასახლეში.'“

¹⁹და უთხრა ხიზკიაჰუმ ესაიას: "კარგია უფლის სიტყვა, შენ რომ წარმოსთქვი.” და თქვა: "იქნება ჩემს მეფობაში მშვიდობა და სიმტკიცე.”

²⁰ხიზკიაჰუს დანარჩენი საქმენი, ყველა მისი გმირობა, წყალსატევი რომ გააკეთა და ქალაქში წყალი გაიყვანა, იუდას მეფეთა მატიანეშია ჩაწერილი.

²¹და განისვენა ხიზკიაჰუმ თავის მამებთან. და მის ნაცვლად მისი ძე, მენაშე გამეფდა.