Read სბს–სტოკჰოლმი 2001 1 ნეშტთა 18 Bible Online

1 ნეშტთა 18 - სბს–სტოკჰოლმი 2001 bible

1 ნეშტთა 18

¹ამის შემდეგ იყო, რომ დაამარცხა დავითმა ფილისტიმელები, და დაიმორჩილა ისინი და ხელიდან გამოგლიჯა ფილისტიმელებს გათი თავის ქალაქებიანად.

²და დაამარცხა მოაბიც. და გახდა მოაბი დავითის მსახური და მოხარკე.

³და დაამარცხა დავითმა ჰადარ-ყეზერი, ცობას მეფე, ხამათში, როცა ის ევფრატზე ბატონობის განსამტკიცებლად მიდიოდა,

⁴და წაართვა მას დავითმა ათასი ეტლი, შვიდი ათასი ცხენოსანი და ოცი ათასი ქვეითი. ეტლის ცხენებს ძარღვები გადაუჭრა დავითმა, ასი ეტლი დატოვა მათგან.

⁵და მოვიდნენ დამასკოს არამელები ცობას მეფის ჰადარ-ყეზერის დასახმარებლად და მუსრი გაავლო დავითმა არამელთაგან ოცდაორიათას კაცს.

⁶და დაადგინა დავითმა ხელისუფალნი დამასკოს არამში და გახდნენ არამელები დავითის მსახურნი და მოხარკენი. და სადაც არ უნდა წასულიყო დავითი, ყველგან უფალი შეეწეოდა.

⁷და აიღო დავითმა ოქროს ფარები, ჰადარ-ყეზერის მსახურებს რომ ჰქოდნათ, და იერუსალიმში მიიტანა.

⁸დიდძალი სპილენძი წამოიღო დავითმა ტიბხათიდან და ქუნიდან, ჰადარ-ყეზერის ქალაქებიდან, რომლისგანაც შემდეგ სოლომონმა გააკეთა სპილენძის ჭურჭელი.

⁹და შეიტყო თოყუმ, ხამათის მეფემ, რომ სძლია დავითმა ჰადარ-ყეზერს, და ცობას მეფეს,

¹⁰და გაგზავნა თავისი ძე ჰადორამი მეფე დავითთან მოსაკითხად და მისალოცად, რომ შეებრძოლა ჰადარ-ყეზერს და სძლია მას, რადგან თოყუს მოსისხლე იყო ჰადარ-ყეზერი. თან გაატანა ოქრო-ვერცხლისა და სპილენძის ჭურჭელი.

¹¹მეფე დავითმა ესეც უფალს შესწირა იმ ოქრო-ვერცხლთან ერთად, დამორჩილებულ ხალხებს - ედომს, მოაბს, ყამონის ძეთ, ფილისტიმელთ და ყამალეკს რომ წაართვა.

¹²აბიშაი ცერუიას ძემ თვრამეტი ათასი ედომელი ამოწყვიტა მარილოვან ველზე,

¹³და დააყენა ედომში ხელისუფალნი და გახდა მთელი ედომი დავითის მსახური. და ყველგან, სადაც არ უნდა წასულიყო, უფალი შეეწეოდა დავითს.

¹⁴და მეფობდა დავითი მთელს ისრაელზე და წესსა და სამართალს აძლევდა თავის ერს.

¹⁵იოაბი, ცერუიას ძე, ჯარს სარდლობდა, ხოლო იოშაფატ ახილუდის ძე მემატიანე იყო.

¹⁶ცადოკ ახიტუბის ძე და აბიმელექ აბიათარის ძე მღვდლები იყვნენ, ხოლო შავშა მწერალი იყო.

¹⁷ბენაიაჰუ იეჰოიადაყის ძე ქერეთელებსა და ფერეთელებს გამგებლობდა, ხოლო დავითის ძენი პირველნი იყვნენ მეფის გვერდით.