Read სბს–სტოკჰოლმი 2001 1 ნეშტთა 23 Bible Online

1 ნეშტთა 23 - სბს–სტოკჰოლმი 2001 bible

1 ნეშტთა 23

¹და დავითი მოხუცდა და გაძღა წლებით, და თავისი ვაჟი სოლომონი გაამეფა ისრაელზე.

²და თავი მოუყარა ისრაელის მთავრებს, მღვდლებსა და ლევიანებს.

³და აღრიცხეს ოცდაათ წელს გადაცილებული ლევიანები. და გამოვიდა სულ ოცდათვრამეტი ათასი კაცი.

⁴აქედან ოცდაოთხი ათასი უფლის სახლის საქმეს უძღვებოდა, ექვსი ათასი კი მწიგნობრები და მსაჯულები იყვნენ.

⁵ოთხიათასი კარისმცველი იყო, ოთხიათასი კი იმ საკრავებით ადიდებდა უფალს, რომელნიც დავითმა გააკეთა.

⁶და დაჰყო დავითმა ისინი ლევის, გერშონის, კეჰათის და მერარის ძეთა დასებად.

⁷გერშონელთაგან იყვნენ: ლაყდანი და შიმყი.

⁸ლაყდანის ძენი: უფროსი იეხიელი, ზეთამი და იოელი - სამნი.

⁹შიმყის ძენი: შელომითი, ხაზიელი და ჰარანი - სამნი. ესენი არიან ლაყდანის მამისსახლთა თავკაცები.

¹⁰შიმყის ძენი: იახათი, ზინა, იეყუში და ბერიყა. ესენი არიან შიმყის ძენი - ოთხნი.

¹¹იახათი უფროსი იყო, ზიზა - მომდევნო. იეყუშსა და ბერიყას ძალიან ცოტა შვილები ჰყავდათ. ამიტომ აღრიცხვისას ერთ მამისსახლს შეადგენდნენ.

¹²კეჰათის ძენი: ყამრამი, იცჰარი, ხებრონი და ყუზიელი - ოთხნი.

¹³ყამრამის ძენი: აარონი და მოსე. აარონი იმისთვის გამოირჩია, რომ წმიდათა წმიდისთვის ეკურთხებინათ იგი და მისი ძენი უკუნისამდე, რათა მათ ეკმიათ უფლის წინაშე, რათა სამსახური გაეწიათ მისთვის და მისი სახელით უკუნისამდე ეკურთხებინათ.

¹⁴მოსე ღვთისკაცი იყო და მისი ძენი ლევიანთა ტომს მიათვალეს.

¹⁵მოსეს ძენი: გერშომი, ელიეზერი.

¹⁶გერშომის ძენი: შებუელი - უფროსი.

¹⁷ელიეზერის ძენი იყვნენ: რეხაბია - უფროსი. ელიეზერს მეტი შვილი არც ჰყოლია, რეხაბიას ძენი კი ძალიან გამრავლდნენ.

¹⁸იცჰარის ძენი: შელომითი - უფროსი.

¹⁹ხებრონის ძენი: იერიაჰუ - უფროსი, ამარია- მეორე, იახაზიელი - მესამე, იეკამყამი - მეოთხე,

²⁰ყუზიელის ძენი: მიქა - უფროსი, იშია - მეორე.

²¹მერარის ძენი: მახლი და მუში, მახლის ძენი: ელეაზარი და კიში.

²²ელეაზარი ისე მოკვდა, რომ ვაჟი არ ჰყოლია, მხოლოდ ასულები დარჩა. ისინი კიშის ძეებმა, ბიძაშვილებმა, შეირთეს.

²³მუშის ძენი: მახლი, ყედერი და იერემოთი - სამნი.

²⁴აჰა, ლევის ძენი, თავ-თავიანთი მამისსახლების მიხედვით, მამისსახლთა თავკაცები, სახელებისა და სულადობის რიცხვის მიხედვით აღრიცხულნი, რომელნიც უფლის სახლის სამსახურის საქმეს უძღვებოდნენ, ოც წელს გადაცილებულნი.

²⁵რადგან თქვა დავითმა: “უფალმა ღმერთმა მისცა მშვიდობა ისრაელს, თავის ერს, და იერუსალიმში დამკვიდრდა იგი უკუნისამდე.

²⁶და აღარც ლევიანებს დასჭირდებათ სამსახურის გასაწევად სავანისა და მისი ჭურჭლეულის ტარება.”

²⁷დავითის უკანასკნელი სიტყვების მიხედვით აღრიცხეს ოც წელს გადაცილებული ლევიანები,

²⁸რათა ისინი მდგარიყვნენ აარონის ძეთა გვერდით, ემსახურათ უფლის სახლში, ეზოებში და ოთახებში, სუფთად შეენახათ ყოველი სიწმიდე და აღესრულებინათ ღვთის სახლის სამსახური.

²⁹და ეზრუნათ საწინაშეო პურებზე, ძღვენზე, უფუარ კვერებზე, ტაფებზე და შესაწვავზე, ყველაფრის არწყვა-აწონაზე,

³⁰დილა-საღამოობით უფლის ქება-დიდებაზე,

³¹და ყველა სრულადდასაწველზე უფლისათვის შაბათობით, ახალმთვარობების დღესასწაულების განსაზღვრულ რიცხვებში, როგორც მათთვისაა დადგენილი, უფლის წინაშე მარად აღსასრულებლად,

³²რომ დაიცვან დადგენილება სადღესასწაულო კარვის შესახებ, დადგენილება საწმიდრის შესახებ და დადგენილება აარონის ძეთა - მათი ძმების - შესახებ, უფლის სახლში სამსახურის გასაწევად.