Read სბს–სტოკჰოლმი 2001 2 ნეშტთა 11 Bible Online

2 ნეშტთა 11 - სბს–სტოკჰოლმი 2001 bible

2 ნეშტთა 11

¹და მივიდა რეხაბყამი იერუსალიმში და შეჰყარა იუდასა და ბენიამინის მთელი სახლი - ასოთხმოცი ათასი რჩეული მეომარი, რათა შებრძოლებოდნენ ისრაელს რეხაბყამისათვის მეფობის დასაბრუნებლად.

²და გამოეცხადა უფლის სიტყვა შემაყიას, ღვთისკაცს:

³“უთხარი რეხაბყამ სოლომონის ძეს, იუდას მეფეს, მთელ ისრაელს და ბენიამიანის მთელ სახლს:

⁴ასე ამბობს-თქო უფალი: ‘ნუ გახვალთ საბრძოლველად თქვენს ძმებთან! თავ-თავის სახლში გაბრუნდეს ყველა, რადგან ჩემი ნებით მოხდა ეს ამბავი’”. და ისმინეს უფლის სიტყვა და იერობყამთან საომრად გასულნი უკან გაბრუნდნენ.

⁵რეხაბყამი იერუსალიმში ცხოვრობდა და ციხე-სიმაგრეებად აქცია ქალაქები იუდაში.

⁶მან გაამაგრა: ბეთლემი, ყეტამი და თეკოაყი,

⁷ბეთ-ცური, სოქო, ყადულამი,

⁸გათი, მარეშა, ზიფი,

⁹ადორაიმი, ლაქიში, ყაზეკა,

¹⁰ცორყა, აიალონი, ხებრონი - გამაგრებული ქალაქები - იუდასა და ბენიამინს რომ ეკუთვნოდა.

¹¹და გაამაგრა ეს ციხე-სიმაგრეები, და ჩააყენა მათში წინამძღოლნი და მისცა სურსათ-სანოვაგის, ზეთისა და ღვინის მარაგი.

¹²და ყველა ქალაქს ფარ-შუბები ჩამოურიგა და ძლიერ გაამაგრა. მის ხელში იყო იუდა და ბენიამინი.

¹³მღვდლები და ლევიანები, ვინც კი იყო მთელს ისრაელში, თავ-თავიანთი საზღვრებიდან შეუდგნენ მას.

¹⁴ვინაიდან ტოვებდნენ ლევიანები თავიანთ სანახებს, სამფლობელოებს და მიდიოდნენ იუდაში და იერუსალიმში, რადგან იერობყამი და მისი ძენი უშლიდნენ მათ უფლის მღვდლობას

¹⁵და დაიყენა მღვდლები გორაკებისთვის, ციკნებისათვის და ხბორებისთვის, თვითონ რომ გააკეთა.

¹⁶მათ მიჰყვნენ ისრაელის ყველა ტომიდან, ვინც გულით ეძებდა უფალს, ისრაელის ღმერთს. ისინი მოვიდნენ, რომ მსხვერპლი შეეწირათ უფლისთვის, თავიანთი მამების ღმერთისათვის.

¹⁷და გაამაგრეს იუდას სამეფო და სამ წელიწადს მხარს უჭერდნენ რეხაბყამს, სოლომონის ძეს, რადგან ამ სამ წელიწადს დადიოდა დავითისა და სოლომონის გზით.

¹⁸რეხაბყამმა ცოლად შეირთო მახალათი, იერიმოთ დავითის ძის ასული.

¹⁹და შეეძინა მას ვაჟები: იეყუში, შემარია და ზაჰამი.

²⁰მის შემდეგ შეირთო მაყაქა, აბესალომის ასული, რომელმაც შესძინა მას: აბია, ყათაი, ზიზა, შელომითი.

²¹რეხაბყამს ყველა თავის ცოლზე და ხარჭაზე მეტად უყვარდა მაყაქა, სოლომონის ასული. რადგან თვრამეტი ცოლი და სამოცი ხარჭა ჰყავდა.და შეეძინა ოცდარვა ვაჟი და სამოცი ქალი.

²²და დააყენა უფროსად რეხაბყამმა აბია, მაყაქას ვაჟი, წინამძღილად თავის ძმებში, რადგან მისი გამეფება ეწადა.

²³გონივრულად მოიქცა და ყველა თავისი შვილი იუდასა და ბენიამინის ყველა კუთხეში და ყველა გამაგრებულ ქალაქში ჩაასახლა. და უხვად მისცა სარჩო და უთხოვა მრავალი ცოლი.