Read სბს–სტოკჰოლმი 2001 ეზრა 1 Bible Online

ეზრა 1 - სბს–სტოკჰოლმი 2001 bible

ეზრა 1

¹სპარსეთის მეფის, კიროსის მეფობის პირველ წელს, რათა აღსრულებულიყო იერემიას პირით თქმული უფლის სიტყვა, აღძრა უფალმა სული კიროსისა, სპარსეთის მეფისა, და მან გამოაცხადა მთელ თავის სამეფოში, და წერილობითაც განაცხადა და თქვა:

²“ასე ბრძანებს კიროსი, სპარსეთის მეფე: ‘დედამიწის მთელი სამეფონი მომცა მე უფალმა, ცათა ღმერთმა, და მიბრძანა ავუშენო მას სახლი იერუსალიმში, იუდაში რომ არის.

³ვინ არის თქვენს შორის მისი ხალხიდან, ღმერთი იყოს მასთან, და ავიდეს იერუსალიმს, იუდაში რომ არის, და ააშენოს უფლის, ისრაელის ღმერთის, სახლი. ეს არის ღმერთი, რომელიც იერუსალიმშია!

⁴და ყველა დანარჩენს: ყველგან, სადაც ის ცხოვრობს, ხელი გაუმართონ იმ ადგილის კაცებმა ვერცხლით, ოქროთი და საქონლით, ნებაყოფლობით ძღვენთან ერთად, უფლის სახლისთვის, რომელიც იერუსალიმშია!’”

⁵და ადგნენ იუდასა და ბენიამინის მამის სახლთა თავკაცები, მღვდლები და ლევიანები, ყველანი, ვისაც კი სული აღუძრა ღმერთმა, რათა ამოსულიყვნენ იერუსალიმში უფლის სახლის ასაშენებლად.

⁶და ყველამ, ვინც მათ გარშემო იყო, ხელი გაუმართა მათ ვერცხლის ჭურჭლით, ოქროთი და საქონლით და ძვირფასეულობით, გარდა ყველაფერ იმისა, რაც ნებაყოფლობით შესწირეს.

⁷ხოლო მეფე კიროსმა გამოიტანა უფლის სახლის ჭურჭელი, რომელიც ნაბუქოდონოსორმა წამოიღო იერუსალიმიდან და დააწყო თავისი ღმერთების სახლში, -

⁸და გამოიტანა იგი კიროსმა, სპარსეთის მეფემ, მითრიდატე მეგანძურის ხელით, და თვლით ჩააბარა შეშბაცარს, იუდას მთავარს.

⁹და აი მათი რაოდენობა: ოქროს ლანგარი - ოცდაათი, ვერცხლის ლანგარი - ათასი, ოცდაცხრა დანა,

¹⁰ოქროს ბარძიმი - ოცდაათი, ვერცხლის ორმაგი ბარძიმი - ოთხას ათი, და სხვა ჭურჭელი - ათასი.

¹¹ოქროს და ვერცხლის ჭურჭელი სულ იყო ხუთი ათას ოთხასი. ეს ყოველივე ამოიტანა შეშბაცარმა, როცა გადასახლებულები ბაბილონონიდან იერუსალიმში დააბრუნეს.