Read სბს–სტოკჰოლმი 2001 ეზრა 4 Bible Online

ეზრა 4 - სბს–სტოკჰოლმი 2001 bible

ეზრა 4

¹და გაიგეს იუდასა და ბენიამინის მტრებმა, რომ ტყვედყიფილნი ტაძარს უშენებდნენ უფალს, ისრაელის ღმერთს,

²და მივიდნენ ზერუბაბელთან და მამის სახლთა თავკაცებთან, და უთხრეს მათ: “ჩვენც თქვენთან ერთად ავაშენებთ, რადგან ჩვენც თქვენსავით ვეძებთ თქვენს ღმერთს და ჩვენც ვწირავთ მას მსხვერპლს აშურის მეფის, ასარხადონის დღეთაგან, რომელმაც აქ ამოგვიყვანა ჩვენ.”

³და უთხრეს მათ ზერუბაბელმა და იესომ და ისრაელის დანარჩენ მამისსახლთა თავკაცებმა: “არ იქნება, რომ თქვენ და ჩვენ ერთად ავაშენოთ ჩვენი ღმერთის სახლი; რადგან მარტო ჩვენ უნდა ავუშენოთ სახლი უფალს, ისრაელის ღმერთს, როგორც ნაბრძანები აქვს ჩვენთვის მეფე კიროსს, სპარსთა მეფეს.”

⁴და იმ ქვეყნის ხალხი ხელს უშლიდა იუდას ხალხს და აფრთხობდნენ მათ შენებისაგან.

⁵და ქირაობდნენ მათ წინააღმდეგ მრჩევლებს, რათა ჩაეფუშათ მათი განზრახვა სპარსეთის მეფის კიროსის მეფობის მთელ დღეებში, სპარსეთის მეფის, დარიოსის გამეფებამდე.

⁶და ახაშვეროშის მეფობაში, მისი მეფობის დასაწყისში, დაწერეს ცილისწამება იუდასა და იერუსალიმის მცხოვრებლებზე.

⁷და ართახშასთას დღეებში მისწერეს ართახშასთას, სპარსეთის მეფეს, ბიშლამმა, მითრიდატემ, ტაბეელმა და სხვა მათმა თანამზრახველებმა. წერილი დაწერილი იყო არამეული ასოებით არამეულ ენაზე.

⁸რეხუმ მმართველმა და შიმშაი მწერალმა იერუსალიმის წინააღმდეგ მეფე ართახშასთას ასეთი წერილი მისწერეს:

⁹“და დაწერეს რეხუმ მმართველმა და შიმშაი მწერალმა, და სხვა მათმა თანამოაზრეებმა, მსაჯულებმა, განმგებლებმა, სპარსელმა მოხელეებმა, ერეხელებმა, ბაბილონელებმა, შუშანელებმა, ანუ ყელამელებმა

¹⁰და დანარჩენმა ხალხმა, რომელნიც აჰყარა დიდმა და სახელოვანმა ოსნაფარმა და დაასახლა ისინი ქალაქ სამარიაში და სხვა ადგილებში მდინარის გაღმა” და სხვა. .

¹¹აჰა, პირი ამ წერილისა, რომელიც გაუგზავნეს მას: “ართახშასთა მეფეს, შენი მსახურნი, მდინარის გაღმელნი” და სხვა.

¹²იცოდეს მეფემ, რომ იუდაელნი, რომელნიც ამოვიდნენ შენგან, მოვიდნენ ჩვენთან, იერუსალიმს, და აშენებენ მეამბოხე და ბოროტ ქალაქს; და კედლებს ასრულებენ და ბურჯებს ამაგრებენ.

¹³ახლა იცოდეს მეფემ, თუ ეს ქალაქი აშენდა და კედლები გასრულდა, ისინი გადასახადს, ხარკსა და ბეგარას აღარ გადაიხდიან და სამეფო ხაზინა დაზარალდება.

¹⁴და ახლა, რაკი ჩვენ სასახლის მარილსა ვჭამთ, მეფის ლანძღვის ყურება არ შეგვფერის, ამიტომ ვაგზავნით წერილს და ვატყობინებთ მეფეს:

¹⁵მოჩხრიკონ შენი მამების მატიანეში და შენ ნახავ და გაიგებ, რომ ეს ქალაქი მეამბოხე ქალაქია, საზიანოა მეფეთათვის და ქვეყნისათვის; რომ ძველთაგანვე ამბოხება ხდებოდა იქ, ამისათვის იყო ეს ქალაქი დანგრეული.

¹⁶ვატყობინებთ ჩვენს მეფეს, რომ თუ ეს ქალაქი აშენდა და კედლები გასრულდა, მაშინ მდინარის გაღმა წილი აღარ დაგრჩება!”

¹⁷პასუხი გამოუგზავნა მეფემ რეხუმ მმართველსა და შიმშაი მწერალს და მათ სხვა თანამოაზრეთ, რომლებიც ცხოვრობდნენ სამარიაში და დანარჩენი მდინარის გაღმა მხარეში: “მშვიდობა!” და ასე და ასე.

¹⁸“წერილი, რომელიც გამომიგზავნეთ, წაკითხულ და თარგმნილ იქნა ჩემს წინაშე.

¹⁹და ჩემს მიერ გაიცა ბრძანება, და გამოჩხრიკეს და აღმოაჩინეს რომ ეს ქალაქი ძველთაგანვე უჯანყდებოდა მეფეებს და ამბოხება და არეულობა ხდებოდა იქ.

²⁰და ძლიერი მეფენი განაგებდნენ იერუსალიმს, და ეპყრათ მათ მდინარის მთელი გაღმა მხარე და გადასახადი, ხარკი და ბეგარა გაიღებოდა მათგან.

²¹და ახლა გაეცით ბრძანება, რომ შეწყვიტონ მუშაობა ამ კაცებმა, რომ არ აშენდეს ეს ქალაქი, ვიდრე ჩემგან არ გამოვა ბრძანება.

²²და ფრთხილად იყავით, არაფერი გამოგეპაროთ ამ საქმეში. რად უნდა გამრავლდეს ზარალი მეფის საზიანოდ?”

²³როგორც კი მეფე ართახშასთას წერილის პირი წაკითხულ იქნა რეხუმის და შიმშაი მწერლისა და მათ თანამოაზრეთა წინაშე, დაუყოვნებლივ წავიდნენ ისინი იერუსალიმში იუდაელებთან და იძულებით შეაწყვეტინეს მუშაობა.

²⁴მაშინ შეწყდა ღვთის სახლის სამუშაო იერუსალიმში და შეწყვეტილი იყო დარიოსის, სპარსეთის მეფის, მეფობის მეორე წლამდე.