Read სბს–სტოკჰოლმი 2001 ეზრა 6 Bible Online

ეზრა 6 - სბს–სტოკჰოლმი 2001 bible

ეზრა 6

¹მაშინ დარიოს მეფემ გასცა ბრძანება და მოჩხრიკეს წიგნთსაცავები ბაბილონში, სადაც საგანძური ინახებოდა.

²და იპოვეს ახმეთაში, მიდიის მხარის ციხე-ქალაქში, ერთი გრაგნილი, რომელზედაც ასე ეწერა: ძეგლისწერა -

³მეფე კიროსის მეფობის პირველ წელს მეფე კიროსმა გასცა განკარგულება: ღვთის სახლის თაობაზე იერუსალიმში: აშენდეს ტაძარი იმ ადგილზე, სადაც შეიწირება მსხვერპლი; და მტკიცე საძირკველი ჩაეყაროს. სიმაღლე მისი სამოცი წყრთა იყოს, სიგანე მისი - სამოცი წყრთა;

⁴სამი წყება დიდრონი ქვებისაგან იყოს, და ერთი წყება - ძელებისაგან; და ხარჯებს მეფის სასახლე გაასწორებს.

⁵ღვთის სახლის ჭურჭელიც, ოქროსი და ვერცხლისა, რომლებიც ნაბუქოდონოსორმა გაიტანა იერუსალიმის ტაძრიდან და ბაბილონში წაიღო, უკან დაბრუნდეს თავის ადგილზე, იერუსალიმის ტაძარში, და ღვთის სახლში დაბინავდეს.

⁶და ახლა, თათნაი - მდინარისგაღმელო განმგებელო, შეთარ-ბოზნაი და მათო თანამოაზრენო, მდინარისგაღმელო აფარსახელნო, დაეხსენით მათ!

⁷დაანებეთ ღვთის სახლზე მუშაობა! იუდას განმგებელმა და იუდაელთა უხუცესებმა ააშენონ ეს ღვთის სახლი თავის ადგილზე.

⁸და ვიძლევი განკარგულებას იმის თაობაზე, თუ რა უნდა გაუკეთოთ იუდას უხუცესებს, ღვთის სახლის ასაგებად: სამეფო ხაზინიდან მდინარისგაღმის მხარის შემოსავლიდან დაუყოვნებლივ მიეცეს იმ ხალხს სახარჯოდ.

⁹და რაც საჭიროა, ხბორები, ვერძები თუ კრავები ცათა ღმერთისათვის სრულადდასაწველის აღსავლენად; ხორბლეული, მარილი, ღვინო და ზეთი, როგორც იერუსალიმის მღვდლები იტყვიან, მიეცეს მათ ყოველდღიურად, შეუფერხებლად,

¹⁰რათა შესწირონ სურნელოვანი მსხვერპლები ცათა ღმერთს და ილოცონ მეფის და მისი ძეების სიცოცხლისათვის.

¹¹და ვიძლევი განკარგულებას, რომ თუ ვინმე შეცვლის ამ ბრძანებას, გამოიღონ ძელი მისი სახლიდან, ზედ ჩამოკიდონ იგი; მისი სახლი კი სანაგვედ აქციონ ამის გამო.

¹²და ღმერთმა, რომლის სახელიც იქ არის დავანებული, დაამხოს ყოველი მეფე და ხალხი, რომელიც ხელს აღმართავს ამ ბრძანების შესაცვლელად, ან ამ ღვთის სახლის დასაზიანებლად, რომელიც იერუსალიმშია. მე, დარიოსი, ვიძლევი ბრძანებას: ზედმიწევნით შესრულდეს!

¹³მაშინ თათნაიმ, მდინარისგაღმელმა განმგებელმა, შეთარ-ბოზნაიმ და მათმა თანამოაზრეებმა, დარიოს მეფის მიერ გამოგზავნილი სიტყვისამებრ, ყველაფერი ზედმიწევნით შეასრულეს.

¹⁴და იუდას უხუცესნი აშენებდნენ და ხელი ემართებოდათ თანახმად ანგია წინასწარმეტყველისა და ზაქარია ყიდოს ძის წინასწარმეტყველებისა. ააშენეს და გაასრულეს ისრაელის ღმერთის ბრძანებისამებრ და კიროსის, დარიოსის და ართახშასთას - სპარსეთის მეფეების, განკარგულებისამებრ.

¹⁵და დასრულდა ეს სახლი ადარის თვის მესამე დღეს; ეს იყო მეფე დარიოსის მეფობის მეექვსე წელი.

¹⁶და ისრაელის ძეთ, მღვდლებმა, ლევიანებმა და დანარჩენმა გადანასახლებმა ხალხმა სიხარულით აღასრულეს ღვთის სახლის სატფურება.

¹⁷და შესწირეს ღვთის ამ სახლის სატფურებისათვის ასი მოზვერი, ორასი ვერძი, ოთხასი კრავი; და თორმეტი ვაცი - მთელი ისრაელის ცოდვათა განსატევებლად, ისრაელის ტომთა რიცხვის მიხედვით.

¹⁸და დააყენეს მღვდლები თავიანთი ხარისხების მიხედვით და ლევიანები თავიანთი რიგის მიხედვით ღვთის სამსახურისათვის იერუსალიმში, როგორც სწერია მოსეს წიგნში.

¹⁹და აღასრულა გადანასახლებმა ხალხმა პასექი პირველი თვის მეთოთხმეტე დღეს.

²⁰რადგან განიწმიდნენ მღვდლები და ლევიანები, როგორც ერთი კაცი, ყველანი წმიდები გახდნენ, და დაკლეს საპასექო მსხვერპლი ყველა გადანასახლები ხალხისათვის, თავიანთი მოძმე მღვდლებისათვის და თავიანთთვის.

²¹და ჭამეს პასექი გადასახლებიდან დაბრუნებულმა ისრაელის ძეთ და ყველამ, ვინც განუდგა ქვეყნის ხალხის ბიწიერებას, რათა შეერთებოდნენ მათ, უფლის, ისრაელის ღმერთის, საძებნელად.

²²და იზეიმეს უფუარობის დღესასწაული შვიდი დღე, რადგან გაახარა ისინი უფალმა და გული მოაბრუნებინა მათკენ აშურის მეფეს, რათა ხელი გაემაგრებინა მათთვის ღვთის სახლის, ისრაელის ღმერთის სახლის, საქმეში.