Read სბს–სტოკჰოლმი 2001 ეზრა 7 Bible Online

ეზრა 7 - სბს–სტოკჰოლმი 2001 bible

ეზრა 7

¹და ამ ამბების შემდეგ სპარსეთის მეფის, ართახშასთას მეფობაში ეზრა, ძე სერაიასი, ძისა ყაზარიასი, ძისა ხილკიასი,

²ძისა შალუმისა, ძისა ცადოკისა, ძისა ახიტუბისა,

³ძისა ამარიასი, ძისა ყაზარიასი, ძისა, მერაიოთისა,

⁴ძისა ზერახიასი, ძისა ყუზისა, ძისა ბუკისა,

⁵ძისა აბიშუაყისა, ძისა ფინხასისა, ძისა ელეაზარისა, ძისა აარონისა, მღვდელმთავრისა,-

⁶ეს ეზრა გამოვიდა ბაბილონიდან. და ის იყო მწიგნობარი, მოსეს რჯულში ჩახედული, რომელიც მისცა უფალმა ისრაელის ღმერთმა. და მისცა მას მეფემ ყოველივე, რაც ითხოვა, რადგან უფლის, მისი ღმერთის, ხელი იყო მასზე.

⁷და ამოვიდნენ იერუსალიმში ისრაელის ძეთაგან, მღვდელთაგან, ლევიანთაგან, მგალობელთაგან, კარისმცველთაგან და ტაძრის მსახურთაგან ართახშასთა მეფის მეშვიდე წელს.

⁸და მივიდა ის იერუსალიმში მეფის მეშვიდე წლის მეხუთე თვეს.

⁹რადგან მან პირველი თვის პირველ დღეს დაიწყო გამოსვლა ბაბილონიდან და მეხუთე თვის პირველ დღეს მივიდა იერუსალიმში, რადგან მისი ღმერთის კეთილი ხელი იყო მასზე.

¹⁰რადგან ეზრამ გულს იდვა უფლის რჯულის ძიება, მისი შესრულება და წესისა და სამართლის სწავლება ისრაელში.

¹¹და აჰა, პირი წერილისა, რომელიც მისცა მეფე ართახშასთამ ეზრას, მღვდელს, მწიგნობარს, განსწავლულს უფლის მცნებების სიტყვებში და მის წესებში ისრაელზე.

¹²ართახშასთა, მეფეთა მეფე, ეზრა მღვდელს, ცათა ღმერთის რჯულის მწიგნობარს, სრული მშვიდობა! და სხვა.

¹³განკარგულება გავეცი, რომ თუ ვინმეს ჩემს სამეფოში სურს ისრაელის ერიდან, მათი მღვდლებიდან და ლევიანებიდან იერუსალიმში წასვლა, შენთან ერთად წავიდეს.

¹⁴რადგან შენ იგზავნები მეფისაგან და მისი შვიდი მრჩევლისგან, რათა მოიხილო იუდა და იერუსალიმი შენი ღმერთის რჯულის მიხედვით, რომელიც შენს ხელთაა;

¹⁵რომ წაიღო ვერცხლი და ოქრო, რომელიც მეფემ და მისმა მრჩევლებმა შესწირეს ისრაელის ღმერთს, რომლის სავანეც იერუსალიმშია,

¹⁶და მთელი ვერცხლი და ოქრო, რასაც შენ შეაგროვებ მთელი ბაბილონის მხარეში, იმ ერისკაცთა და მღვდელთა ნებაყოფლობით შემოწირულობასთან ერთად, რაც ნებაყოფლობით შესწირეს თავიანთი ღვთის სახლს იერუსალიმში.

¹⁷ამიტომ დაუყოვნებლივ იყიდე ამ ვერცხლით ხარები, ცხვრები, კრავები, მათი საძღვნო შესაწირავები და საღვრელები და შესწირე იგი თქვენი ღვთის ტაძრის სამსხვერპლოზე, იერუსალიმში.

¹⁸და როგორც გაგეხარდებათ შენ და შენს მოძმეებს, ისე მოიხმარეთ დანარჩენი ვერცხლი და ოქრო, თქვენი ღმერთის ნებით.

¹⁹და ჭურჭელი, რომელიც მოგეცა შენი ღვთის სახლის სამსახურისათვის, უკლებლივ მიიტანე იერუსალიმის ღმერთის წინაშე.

²⁰და დანარჩენი, რაც საჭიროა შენი ღვთის სახლისათვის, რისი გაცემაც მოგესურვება, გაეცი სამეფო საგანძურიდან.

²¹და მე, ახაშვეროშ მეფე, ვიძლევი განკარგულებას მდინარისგაღმის ყველა მეგანძურის მიმართ, რომ რასაც მოგთხოვთ ეზრა მღვდელი, ზეცის ღვთის მწიგნობარი, დაუყოვნებლად შესრულდეს.

²²ვერცხლი ას ტალანტამდე, ხორბალი ას ქორამდე, ღვინო ას ბათამდე, ზეთი ას ბათამდე და მარილი უზომოდ.

²³ყოველი, რაც ნაბრძანებია ცათა ღმერთისაგან, აღსრულდეს ზუსტად ცათა ღვთის სახლისათვის, რათა არ დაატყდეს რისხვა სამეფოს, მეფეს და უფლისწულებს.

²⁴და გაცნობებთ, რომ არცერთ მღვდელს, ლევიანს, მგალობელს, კარისმცველს, ტაძრის მსახურსა და ამ ღვთის სახლის მსახურს არ უნდა დაეკისროს ხარკი, გადასახადი და ბეგარა.

²⁵შენ, ეზრა, შენი ღვთის სიბრძნისამებრ, რომელიც შენს ხელთაა, დანიშნე მსაჯულნი და მოსამართლენი, რათა განსაჯონ მათ მთელი მდინარისგაღმელი ხალხი და ყველა, ვინც იცის შენი ღმერთის კანონები. ხოლო, ვინც არ იცის, ასწავლეთ!

²⁶და ვინც არ აღასრულებს შენი ღვთის კანონს და მეფის კანონს დაუყოვნებლივ აღასრულონ მასზე სამართალი: სიკვდილი ან განკვეთა, ჯარიმა ან ტუსაღობა.

²⁷კურთხეული იყოს უფალი, ჩვენი მამების ღმერთი, რომელმაც ეს მეფეს ჩაუდო გულში, რათა შეემკო უფლის სახლი იერუსალიმში.

²⁸და მან მიბოძა მოწყალება მეფის, მისი მრჩევლების, მეფის მამაცი მთავრების წინაშე; მეც გავმაგრდი, შევკრიბე ისრაელის ძეთა მთავრები, რათა ჩემთან ერთად წამოსულიყვნენ.