Read სბს–სტოკჰოლმი 2001 ეზრა 9 Bible Online

ეზრა 9 - სბს–სტოკჰოლმი 2001 bible

ეზრა 9

¹და ეს ყოველივე რომ დასრულდა, მეახლნენ მე მთავრები და მითხრეს: “ისრაელის ხალხი, მღვდლები და ლევიანები არ განდგომიან ქვეყნების ხალხებს - ქანაანელთა, ხეთელთა, ფერიზელთა, იებუსელთა, ყამონელთა, მოაბელთა, ეგვიპტელთა და ამორეველთა სიბილწეებს,

²რადგან მოიყვანეს მათი ასულები თავიანთთვის და თავიანთი ვაჟებისათვის, და შეერია წმიდა თესლი ამ ქვეყნების ხალხებს; და მთავარი ხელი ამ ურჯულოებაში მთავრებისა და წინამძღოლებისა იყო.”

³და ეს ამბავი რომ გავიგე, შემოვიხიე სამოსელი და მოსასხამი, და ვიგლეჯდი თმა-წვერს და ვიჯექი გაოგნებული.

⁴და თავი მოიყარეს ჩემთან ყველამ, ვისაც ეშინოდა ისრაელის ღმერთის სიტყვებისა გადანასახლებთა ურჯულოების გამო; მე კი ვიჯექი გაოგნებული საღამოს მსხვერპლშეწირვამდე.

⁵და საღამოს მსხვერპლშეწირვისას ავდექი ჩემი მარხულობისაგან, და ჩემი შემოხეული სამოსლითა და ჩემი მოსასხამით დავემხე მუხლებზე და ხელი აღვაპყრე უფლის, ჩემი ღვთის, მიმართ.

⁶და ვთქვი: “ღმერთო ჩემო! მრცხვენია და მერიდება სახის მოპყრობა შენს მიმართ, რადგან ჩვენი ურჯულოებანი თავზე გადაგვდის და ჩვენი დანაშაული გაიზარდა ცამდე.

⁷ჩვენი მამების დროიდან დღემდე დიდ დანაშაულში ვართ; და ჩვენი ურჯულოების გამო ჩავვარდით ჩვენ, ჩვენი მეფენი და ჩვენი მღვდლები უცხო ქვეყნების მეფეთა ხელში, მახვილის ქვეშ, ტყვეობაში, ძარცვაში და სირცხვილში, როგორც დღესა ვართ.

⁸და ახლა წამიერად იქნა მოცემული ჩვენთვის წყალობა უფლისაგან, ჩვენი ღმერთისაგან, რათა დაეტოვებინა ჩვენთვის გადარჩენილი ნატამალი და მოეცა სამსჭვალი თავის წმიდა ადგილზე, რომ გაენათებინა ჩვენი თვალები ჩვენს ღმერთს და ცოტათი მაინც გავეცოცხლებინეთ ჩვენს მონობაში.

⁹რადგან მონები ვართ ჩვენ და ჩვენს მონობაშიც არ მივუტოვებივართ ჩვენს ღმერთს და განავრცო ჩვენზე წყალობა სპარსეთის მეფეთა წინაშე, რომ გავეცოცხლებინეთ, რომ აღგვემართა ჩვენი ღვთის სახლი; აღგვედგინა ნანგრევებიდან, რომ ზღუდე მოგვცემოდა იუდასა და იერუსალიმში.

¹⁰და ახლა კი რა უნდა ვთქვათ, ღმერთო ჩვენო, ამის შემდეგ? რადგან მივატოვეთ შენი მცნებანი,

¹¹შენი მსახურების, შენი წინასწარმეტყველების ხელით რომ გვაუწყე და გვითხარი: ‘ქვეყანა, რომლის დასამკვიდრებლადაც მიდიხართ, უწმიდური ქვეყანაა იმ ქვეყნების ხალხების უწმიდურებისა და სიბილწის გამო, რომელთაც კიდით კიდემდე აქვთ ავსებული თავიანთი სიბინძურით.

¹²და ახლა თქვენი ასულები არ გაატანოთ მათ ვაჟებს და მათი ასულები არ მოუყვანოთ თქვენს ვაჟებს. არ ეძებოთ მათთვის მშვიდობა და სიკეთე უკუნისამდე, რათა გაძლიერდეთ და ჭამოთ ქვეყნის დოვლათი და სამარადისოდ დაუმკვიდროთ იგი თქვენს ძეებს!’

¹³და ყოველივე ამის შემდეგ, რაც თავს დაგვატყდა ჩვენი ავი საქმეებისა და ჩვენი დიდი დანაშაულის გამო, რადგან შენ, ღმერთო ჩვენო, იმაზე ნაკლებად დაგვსაჯე, ვიდრე ამას ჩვენი უკეთურებანი იმსახურებდნენ და მოგვამადლე გადარჩენილი ნატამალი, როგორც ესაა.

¹⁴ნუთუ კვლავ დავარღვევთ შენს მცნებებს და დავუმოყვრდებით ამ ბილწ ხალხებს? მაშინ ხომ განგვირისხდები მოსასპობად ისე, რომ აღარც ნატამალი იქნება და აღარც ვინმე გადარჩენილი.

¹⁵უფალო, ღმერთო ისრაელისა! სამართლიანი ხარ, რადგან გადარჩენილი ნატამალი ვართ დღესდღეობით. აჰა, ჩვენ შენს წინაშე ვართ ჩვენი დანაშაულითურთ, თუმცა არავის ძალუძს შენს წინაშე დგომა ამის გამო.”