Read სბს–სტოკჰოლმი 2001 გამოსვლა 1 Bible Online

გამოსვლა 1 - სბს–სტოკჰოლმი 2001 bible

გამოსვლა 1

¹ესენია ისრაელის ძეთა სახელები, რომლებიც იაკობთან ერთად შევიდნენ ეგვიპტეში. თითოეული თავისი სახლით შევიდა.

²რეუბენი, სიმონი, ლევი და იუდა,

³ისაქარი, ზებულუნი და ბენიამინი.

⁴დანი და ნაფთალი, გადი და აშერი.

⁵და ყოველი მათგანი გამოსული იყო იაკობის საზარდულიდან, სამოცდაათი სული, ხოლო იოსები უკვე ეგვიპტეში იყო.

⁶და მოკვდა იოსები და ყველა მისი ძმა, და მთელი თაობა.

⁷ხოლო ისრაელის ძეთ ინაყოფეირეს და გამრავლდნენ და გავრცელდნენ და გაძლიერდნენ მეტისმეტად, და აღივსო ის ქვეყანა მათით.

⁸და დადგა ახალი მეფე ეგვიპტეზე, რომელიც არ იცნობდა იოსებს,

⁹და უთხრა თავის ხალხს: “ისრაელის ძეთა ხალხი ჩვენზე მრავალრიცხოვანი და ძლიერია.

¹⁰მოდით, სიბრძნით მოვიქცეთ მის მიმართ, თორემ უფრო გამრავლდება. და ოდესმე, თუ მოხდა ომი, შეუერთდება ჩვენს მტრებს და იომებს ჩვენს წინააღმდეგ და გავა ქვეყნიდან.”

¹¹და დაუდგინეს მას საქმის უფროსნი, რათა დაეჩაგრათ იგი მძიმე შრომით. და მან ააშენა სამარაგო ქალაქები ფარაონისთვის: ფითომი და რაყმესესი.

¹²და რაც უფრო ტანჯავდნენ მას, მით უფრო მრავლდებოდა იგი და ვრცელდებოდა, და ეშინოდათ მათ ისრაელის ძეთა.

¹³და ამუშავებდნენ ეგვიპტელნი ისრაელის ძეთ უწყალოდ.

¹⁴და გაუმწარეს სიცოცხლე მძიმე შრომით თიხაზე და აგურზე, და ყოველგვარი სამუშაოთი მინდორში, ყოველი საქმით, რაზედაც აიძულებდნენ მათ უწყალოდ.

¹⁵და უბრძანა ეგვიპტის მეფემ ებრაელ ბებიაქალებს, რომელთაგან ერთის სახელი იყო შიფრა და მეორისა ფუყა,

¹⁶და უთხრა: “როდესაც ამშობიერებთ ებრაელ ქალებს, უყურეთ მათ სამშობიარო ადგილზე: თუ ვაჟია, მოკალით, და თუ ქალია, იცოცხლოს.

¹⁷და შეეშინდათ ბებიაქალებს ღვთისა და არ აკეთებდნენ, როგორც ეგვიპტის მეფემ უბრძანა: ტოვებდნენ ცოცხლად ვაჟებს.

¹⁸და დაიბარა ეგვიპტის მეფემ ბებიაქალები, და უთხრა მათ: “ამას როგორ შვრებით, ცოცხალს როგორ ტოვებთ ვაჟებს?”

¹⁹და უთხრეს ბებიაქალებმა ფარაონს: “ებრაელი ქალები როდი არიან ეგვიპტელი ქალებივით - ჯანიანები არიან და, სანამ მივიდოდეს მათთან ბებიაქალი, ისინი უკვე ნამშობიარები არიან.

²⁰და უყო კეთილი ღმერთმა ბებიაქალებს. და ხალხი მრავლდებოდა და მეტად ძლიერდებოდა.

²¹რაკი ეშინოდათ ბებიაქალებს ღვთისა, უშენებდა იგი მათ სახლებს.

²²და უბრძანა ფარაონმა მთელ თავის ხალხს ასე: “ყველა ახალშობილი ვაჟი მდინარეში გადააგდეთ, ხოლო ყველა ქალი ცოცხალი დატოვეთ.”