Read სბს–სტოკჰოლმი 2001 გამოსვლა 21 Bible Online

გამოსვლა 21 - სბს–სტოკჰოლმი 2001 bible

გამოსვლა 21

¹და აჰა, კანონები, რომლებსაც წარუდგენ მათ:

²თუ ებრაელ მსახურს იყიდი, ექვსი წელი გემსახუროს და მეშვიდე წელს გათავისუფლდეს უსასყიდლოდ.

³თუ იგი მარტო მოვიდა, მარტო წავიდეს; თუ ცოლიანია, წავიდეს მასთან ერთად მისი ცოლიც.

⁴თუ მისი ბატონი შერთავს მას ცოლს, რომელიც მას ვაჟებს ან ასულებს გაუჩენს, მაშინ ცოლი და ბავშვები მისი ბატონისაა, და თავად წავიდეს მარტო.

⁵ხოლო თუ მსახური იტყვის: ‘მიყვარს ჩემი ბატონი, ჩემი ცოლი და ჩემი შვილები, არ მინდა თავისუფლება,’

⁶მაშინ მიიყვანოს იგი მისმა ბატონმა მსაჯულთა წინაშე და მიაყენოს იგი კარის წირთხლთან და გაუხვრიტოს მისმა ბატონმა ყური სადგისით, და მისი მსახური იქნება საუკუნოდ.

⁷და თუ გაყიდის კაცი თავის ასულს მხევლად, იგი ისე ვერ გავა, როგორც მონა გადის.

⁸და თუ იგი თვალში არ მოუვიდა მის ბატონს, და არ ირთავს, მისცეს მას გამოსყიდვის ნება. უფლება არა აქვს მას უცხო ხალხს მიჰყიდოს, რადგან თავად უღალატა მას.

⁹ხოლო თუ დანიშნავს მას თავის ვაჟზე, მაშინ როგორც ასულს, ისე მოექცეს.

¹⁰თუ თვითონ სხვას შეირთავს, მაშინ მას საზრდო, სამოსელი და თანაცხოვრება არ მოაკლოს.

¹¹თუ ამ სამ რამეს არ გაუკეთებს, წავა იგი გამოუსყიდველად, ვერცხლის გარეშე.

¹²თუ ვინმე კაცს დაჰკრავს და კაცი მოკვდება, თავადაც სიკვდილით უნდა მოკვდეს.

¹³ხოლო თუ მას ბოროტი განზრახვა არ ჰქონია, არამედ ღმერთმა ჩააგდო მის ხელში, მაშინ დაგინიშნავ ადგილს, სადაც უნდა გადაიხვეწოს.

¹⁴და თუ ვინმე ბოროტი განზრახვით მოკლავს თავის მოყვასს მზაკვრულად, მაშინ ჩემი სამსხვერპლოდანაც კი აიყვანეთ იგი მოსაკვდინებლად.

¹⁵ვინც თავის მამას ან თავის დედას გაარტყამს, სიკვდილით უნდა მოკვდეს.

¹⁶ვინც მოიპარავს ადამიანს და გაყიდის მას, ან აღმოაჩნდება მის ხელში, სიკვდილით უნდა მოკვდეს.

¹⁷თავისი მამისა და თავისი დედის ავად მაგინებელი სიკვდილით უნდა მოკვდეს.

¹⁸თუ კაცები ერთმანეთს წაეჩხუბებიან და ერთი მეორეს ქვას ან მუშტს დაჰკრავს, და თუ კაცი არ მოკვდება და ლოგინად ჩავარდება,

¹⁹თუ ადგება იგი და ივლის გარეთ ყავარჯნით, მაშინ მცემელი უდანაშაულოა, მხოლოდ მისი მოცდენისათვის უნდა გადაუხადოს და სავსებით განკურნოს იგი.

²⁰და თუ გალახოს კაცმა თავისი მსახური ან თავისი მხევალი ჯოხით და მოკვდეს იგი მისი ხელით, მაშინ შური იძიე მისგან.

²¹მაგრამ თუ მან ერთი ან ორი დღე იცოცხლა, მაშინ მასზე შური აღარ იძიოთ, რადგან იგი მისი ვერცხლია.

²²თუ კაცები ჩხუბის დროს ორსულ ქალს დაჰკრავენ და ქალი ნაადრევად იმშობიარებს, მაგრამ უბედურება არ მოუვა, მაშინ ის უნდა დაჯარიმდეს, რასაც მას დააკისრებს იმ ქალის ქმარი, და გადაიხადოს მსაჯულთა თანდასწრებით.

²³ხოლო თუ უბედურება დატრიალდა, მაშინ მიეცი: სიცოცხლე სიცოცხლის წილ,

²⁴თვალი თვალის წილ, კბილი კბილის წილ, ხელი ხელის წილ, ფეხი ფეხის წილ.

²⁵დაწვა დაწვის წილ, წყლული წყლულის წილ, ჭრილობა ჭრილობის წილ.

²⁶და თუ კაცმა თვალში ჩაარტყას თავის მსახურს ან თავის მხევალს და დაუზიანოს იგი, უნდა გაათავისუფლოს იგი მისი თვალის წილ.

²⁷და თუ კბილს ჩაუმტვრევს თავის მსახურს ან თავის მხევალს, გაათავისუფლოს იგი მისი კბილის წილ.

²⁸და თუ ხარმა ურქინოს კაცს ან დედაკაცს და მოკლას იგი, ჩაქოლვით ჩაიქოლოს ხარი და არ იჭამოს მისი ხორცი. ხოლო პატრონი ხარისა უდანაშაულოა.

²⁹მაგრამ თუ ხარი მორქენალი იყო გუშინ და გუშინწინ, მისი პატრონი კი გაფრთხილებული იყო, მაგრამ არ დაამწყვდია იგი და მოკლა ამ ხარმა კაცი ან დედაკაცი, მაშინ ხარი ჩაიქოლოს და მისი პატრონიც მოკვდეს.

³⁰თუ გამოსასყიდი დაეკისრება მას, გაიღოს საურავი თავისი სიცოცხლისათვის, როგორც დაეკისრება.

³¹თუ ვაჟს ურქინოს ან ასულს ურქინოს, იმავე კანონით მოექეცით მას.

³²თუ მსახურს ურქინოს ხარმა, ან მხევალს, ოცდაათი ვერცხლი მისცეს მის ბატონს, ხარი კი ჩაიქოლოს.

³³და თუ ვინმე კაცმა ორმოს თავი გადახადოს, ან ამოთხაროს კაცმა ორმო და არ დახუროს, და შიგ ხარი ან სახედარი ჩავარდეს,

³⁴ორმოს პატრონმა ვერცხლით აუნაზღაუროს პატრონს, მკვდარი კი მისი იყოს.

³⁵და თუ ვინმეს ხარი მისი მოყვასის ხარს ურქენს და მოკლავს, გაყიდონ ცოცხალი ხარი და ვერცხლი შუაზე გაიყონ, და მოკლულიც გაიყონ.

³⁶ხოლო თუ ცნობილი იყო, რომ ხარი მორქენალი იყო გუშინ და გუშინწინ, და არ დაამწყვდია მისმა პატრონმა, გადახდით გადაიხდის ხარის წილ, მოკლული კი მისი იყოს.”