Read სბს–სტოკჰოლმი 2001 გამოსვლა 30 Bible Online

გამოსვლა 30 - სბს–სტოკჰოლმი 2001 bible

გამოსვლა 30

¹და გააკეთე სამსხვერპლო საკმევლის საკმევად. აკაციის ხეებისგან გააკეთე იგი.

²იყოს მისი სიგრძე წყრთა და წყრთა - მისი სიგანე. ოთხკუთხედი იყოს და ორი წყრთა სიმაღლით. მისგანვე იყოს მისი რქები.

³და მოავარაყე იგი წმიდა ოქროთი, მისი სახურავი და მისი კედლები ირგვლივ, და მისი რქები. და გაუკეთე მას ოქროს გვირგვინი ირგვლივ.

⁴ორი ოქროს რგოლი გაუკეთე გვირგვინის ქვემოთ, მის ორთავე გვერდზე. და იქნება ისინი კეტების გასაყრელად, რათა ატარონ იგი მისი მეშვეობით.

⁵და გააკეთე კეტები აკაციის ხეებისაგან და მოავარაყე ისინი ოქროთი.

⁶და მოათავსე ფარდის წინ, რომელიც მოწმობის კიდობანზეა, თავსარქვლის პირისპირ, რომელიც მოწმობაზეა, სადაც მე გამოგეცხადები შენ.

⁷და მოაკმევს მასზე აარონი კეთილსურნელების საკმეველს. დილდილობით, კანდელთა დამზადების ჟამს აკმიოს იგი.

⁸და რაჟამს აანთებს აარონი კანდელებს მწუხრის ჟამს, აკმიოს იგი. ეს მუდმივი საკმეველია უფლის წინაშე თქვენს თაობებში.

⁹არ მიიტანოთ მასზე რაიმე სხვა საკმეველი, არც სრულადდასაწველი და არც ძღვენი, და საღვრელს ნუ დაღვრით მასზე.

¹⁰და შეასრულებს გამოსყიდვას აარონი მის რქებზე წელიწადში ერთხელ. ცოდვის გამოსასყიდი სისხლით წელიწადში ერთხელ გამოისყიდის მასზე თქვენს თაობებში. წმიდათა წმიდაა იგი უფლისათვის.”

¹¹და უთხრა უფალმა მოსეს:

¹²“როცა ჩაატარებ ისრაელის ძეთა საყოველთაო აღრიცხვას მათ დასათვლელად, მაშინ მისცეს თითოეულმა გამოსასყიდი თავისი სულისა უფალს მათი აღრიცხვისას, და არ გაჩნდება მათში ჭირი მათი აღრიცხვისას.

¹³ყველამ, ვინც გაივლის აღრიცხვას, გაიღოს ნახევარი შეკელი საწმიდარის შეკელისა, რომელიც იწონის ოც გერას: ნახევარშეკელი შესაწირავია უფლისა.

¹⁴ყველამ ვინც გაივლის აღრიცხვას, ოცი წლიდან და ზემოთ, მისცეს შესაწირავი უფალს.

¹⁵მდიდარმა არ გადაამეტოს და ღარიბმა არ დააკლოს ნახევარ შეკელს: უნდა მისცეს შესაწირავი უფალს, თქვენს სულთა გამოსასყიდად.

¹⁶და აიღე გამოსასყიდი ვერცხლი ისრაელის ძეთაგან, და მიეცი ის საკრებულო კარვის სამსახურისათვის. და ეს იქნება ისრაელის ძეთათვის სამახსოვროდ უფლის წინაშე თქვენს სულთა გამოსასყიდად”.

¹⁷და უთხრა უფალმა მოსეს:

¹⁸“გააკეთე სპილენძის საბანელი და მისი სპილენძის კვარცხლბეკი. და დადგი იგი საკრებულო კარავსა და სამსხვერპლოს შორის, და ჩაასხი შიგ წყალი.

¹⁹და აარონმა და მისმა ძეებმა დაიბანონ მასში ხელები და ფეხები.

²⁰საკრებულო კარავში შესვლისას დაიბანონ წყლით, რათა არ დაიხოცონ, ანდა, როცა მივლენ სამსხვერპლოსთან მსახურებისთვის, უფლის საცეცხლო შესაწირავის საკმევად.

²¹და დაიბანონ ხელები და ფეხები, რათა არ დაიხოცონ. და იყოს მათთვის საუკუნო წესად, მისთვის და მისი შთამომავლობისთვის მათ თაობებში”.

²²და უთხრა უფალმა მოსეს:

²³“აიღე შენთვის საუკეთესო სურნელებანი: სუფთა მური ხუთასი შეკელი და სურნელოვანი დარიჩინი მისი ნახევარი - ორას ორმოცდაათი, და სურნელოვანი ლერწამი - ორას ორმოცდაათი.

²⁴კასია საწმიდრის ხუთასი შეკელისა და ერთი ჰინი ზეთი ზეთისხილისა.

²⁵და გააკეთე მისგან წმიდა ზეთი, ნელსაცხებელი, მენელსაცხებლის ხელოვნებით შეზავებული. წმიდა ზეთი იქნება იგი.

²⁶და სცხე იგი საკრებულო კარავს და მოწმობის კიდობანს,

²⁷და ტაბლას და ყოველ მის ჭურჭელს, და სასანთლეს და ყოველ მის ჭურჭელს, და საკმევლის სამსხვერპლოს,

²⁸და სრულადდასაწველთა სამსხვერპლოს და ყოველ მის ჭურჭელს, და საბანელს და მის კვარცხლბეკს.

²⁹და განწმიდე ისინი და ყველა გახდება წმიდათა წმიდა. ვინც მას ხელს შეახებს, განიწმიდება.

³⁰და სცხე აარონსა და მის ძეებს, და განწმიდე ისინი, რათა მღვდლობა გამიწიონ.

³¹ისრაელის ძეთ კი უთხარი, რომ ეს იქნება ჩემთვის წმიდა საცხებელი ზეთი თქვენს თაობებში.

³²ადამიანის სხეულს არ მოეცხოს, და მის მსგავს ნაზავს ნუ გააკეთებთ. წმიდაა იგი, სიწმიდე იყოს თქვენთვის.

³³ვინც შეაზავოს მისი მსგავსი და ვინც სცხოს იგი უცხოს, მოიკვეთოს თვისი ერისაგან”.

³⁴და უთხრა უფალმა მოსეს: “აიღე შენთვის სურნელებანი: შტახსი, ონიქსი, ხელბანა. სურნელებანი და წმიდა გუნდრუკი უნდა თანასწორად იყოს.

³⁵და გააკეთე მათგან საკმევლის ნაზავი, ნელსაცხებელი მენელსაცხებლის ხელოვნებით ქმნილი, მარილნარევი, სუფთა, წმიდა.

³⁶და დანაყე წვრილად, და დადე მოწმობის წინ საკრებულო კარავში, სადაც გამოგეცხადები შენ. წმიდათა წმიდა იყოს ეს თქვენთვის.

³⁷საკმეველს, რომელსაც შენ გააკეთებ ამ ნაზავით, ნუ გაიკეთებთ თქვენთვის. წმიდად გქონდეს იგი შენთან უფლისათვის.

³⁸ვინც გააკეთებს მის მსგავსს საყნოსავად, მოიკვეთოს თვისი ერიდან”.