Read სბს–სტოკჰოლმი 2001 გამოსვლა 37 Bible Online

გამოსვლა 37 - სბს–სტოკჰოლმი 2001 bible

გამოსვლა 37

¹და გააკეთა ბეცალელმა კიდობანი აკაციის ხეთაგან. ორნახევარი წყრთა იყო მისი სიგრძე, წყრთანახევარი - მისი სიგანე და წყრთანახევარი - მისი სიმაღლე.

²და მოჭედა იგი წმიდა ოქროთი როგორც შიგნიდან, ისე გარედან, და გარს გვირგვინი შემოავლო.

³და ჩამოასხა მისთვის ოთხი რგოლი ოქროსი მისი ოთხი კუთხისათვის. ორი რგოლი მის ერთ მხარეზე და ორი რგოლი მის მეორე მხარეზე.

⁴და გააკეთა კეტები აკაციის ხეთაგან, და მოჭედა ისინი ოქროთი.

⁵და გაუყარა კეტები რგოლებში კიდობნის გვერდებზე, კიდობნის სატარებლად.

⁶და გააკეთა თავსარქველი წმიდა ოქროსაგან. ორნახევარი წყრთა იყო მისი სიგრძე და წყრთანახევარი მისი სიგანე.

⁷და გააკეთა ორი ქერუბიმი ოქროსი. ჭედური ნაკეთობით გააკეთა თავსარქველის ორივე ბოლოზე.

⁸ერთი ქერუბიმი ერთი ბოლოდან და მეორე ქერუბიმი მეორე ბოლოდან. თავსარქველიდან ამოიყვანა მან ქერუბიმები, მის ორივე ნაპირზე.

⁹და იყვნენ ქერუბიმები ფრთებგაშლილი მაღლა, და ფარავდნენ ფრთებით თავსარქველს, და სახით იყვნენ მიპყრობილნი ერთმანეთისაკენ. თავსარქველისაკენ იყო მიპყრობილი ქერუბიმების სახეები.

¹⁰და გააკეთა ტაბლა აკაციის ხეთაგან: ორი წყრთა იყო მისი სიგრძე, წყრთა იყო სიგანე მისი, და წყრთანახევარი - მისი სიმაღლე.

¹¹და მოჭედა იგი წმიდა ოქროთი და გარს ოქროს გვირგვინი შემოავლო.

¹²და გაუკეთა მას ხელისგულის სიგანის ჩარჩო ირგვლივ და მოჭედა მისი ჩარჩო ოქროს გვირგვინით ირგვლივ.

¹³და ჩამოასხა მისთვის ოთხი რგოლი ოქროსი და მიამაგრა ეს რგოლები ოთხ კუთხეზე, რომელიც მის ფეხებთან იყო.

¹⁴ჩარჩოსთან იყო რგოლები კეტების გასაყრელად ტაბლის სატარებლად.

¹⁵და გააკეთა კეტები აკაციის ხეთაგან ტაბლის სატარებლად, და მოჭედა ისინი ოქროთი.

¹⁶და გააკეთა წმიდა ოქროს ჭურჭელი ტაბლისთვის: მისი ლანგრები და მისი თასები, და მისი ტოლჩები და მისი ჯამები საღვრელის დასაღვრელად. რათა ჩამოესხათ მათით.

¹⁷და გააკეთა მან სასანთლე წმიდა ოქროსგან, ჭედური სასანთლე გააკეთა. მისი შვერილი და მისი ტოტი, მისი ჯამები, მისი კვირტები და მისი ყვავილები მისგანვე იყო.

¹⁸და ექვსი ტოტი გამოდიოდა მის გვერდთაგან: სამი ტოტი სასანთლისა მისი ერთი გვერდიდან და სამი ტოტი სასანთლისა მისი მეორე გვერდიდან.

¹⁹სამი ნუშისებრი ჯამი ერთ ტოტზე, კვირტი და ყვავილი. და სამი ნუშისებრი ჯამი მეორე ტოტზე, კვირტი და ყვავილი. ასე ექვს ტოტზე, რომელნიც გამოდიოდნენ სასანთლიდან.

²⁰და თვით სასანთლეზე იყო ოთხი ნუშისებრი ჯამი, მისი კვირტები და მისი ყვავილები.

²¹და კვირტი მისი ორი ტოტის ძირში, და კიდევ კვირტი მისი ორი ტოტის ძირში და კიდევ კვირტი მისი ორი ტოტის ძირში სასანთლიდან გამომავალი ექვსი ტოტისთვის.

²²მისი კვირტები და მისი ტოტები მისგანვე იყო ერთიანად, ჭედური წმიდა ოქროსაგან.

²³და გააკეთა მისი შვიდი კანდელი თავისი მაშებითა და თავისი აქანდაზებით წმიდა ოქროსაგან.

²⁴ერთი ტალანტი წმიდა ოქროსაგან გააკეთა იგი მთელი მისი ჭურჭლეულობით.

²⁵და გააკეთა სამსხვერპლო საკმევლისა აკაციის ხეთაგან: ერთი წყრთა სიგრძე და ერთი წყრთა სიგანე, ოთხკუთხედი, და ორი წყრთა სიმაღლე. მისგანვე გამოდიოდა მისი რქები.

²⁶და მოჭედა იგი წმიდა ოქროთი, მისი სახურავი და მისი კედლები ირგვლივ, და მისი რქები. და გარს ოქროს გვირგვინი შემოავლო.

²⁷და ორი ოქროს რგოლი გაუკეთა მას გვირგვინის ქვეშ მის ორივე ფერდზე, მის ორივე მხარეს, კეტების გასაყრელად, რათა ეტარებინათ იგი მათით.

²⁸და გააკეთა კეტები აკაციის ხეთაგან და მოჭედა ისინი ოქროთი,

²⁹და გაამზადა ზეთი წმიდა ცხებისათვის და სურნელოვანი, ხალასი საკმეველი, მენელსაცხებლის ხელოვნებით ნახელავი.