Read სბს–სტოკჰოლმი 2001 გამოსვლა 6 Bible Online

გამოსვლა 6 - სბს–სტოკჰოლმი 2001 bible

გამოსვლა 6

¹უთხრა უფალმა მოსეს: “ახლა იხილავ, რასაც ვუზამ ფარაონს, რადგან ჩემი ძლიერი ხელით გამოუშვებს მათ და ძლიერი ხელით გაყრის მათ თავისი ქვეყნიდან.”

²და ელაპარაკა ღმერთი მოსეს და უთხრა მას: “მე ვარ უფალი!

³მე გამოვეცხადე აბრაამს, ისაკს და იაკობს ყოვლადძლიერ ღმერთად, და ჩემი სახელით - უფლით - არ გავეცანი მათ.

⁴და დავუდე აღთქმა, რათა მივცე მათ ქანაანის ქვეყანა, ქვეყანა მათი ხიზნობისა, სადაც ხიზანობდნენ ისინი.

⁵და აგრეთვე ვისმინე ისრაელის ძეთა კვნესა, რომელნიც ეგვიპტელებს მონობაში ჰყავთ, და გავიხსენე ჩემი აღთქმა.

⁶ამიტომ უთხარი ისრაელის ძეთ: ‘მე ვარ უფალი და მე გამოგიყვანთ თქვენ ეგვიპტელთა უღლიდან, და გადაგარჩენთ მათი მსახურებისაგან, და გიხსნით გამოწვდილი მკლავით და დიდი სასჯელებით.

⁷აგიყვანთ ჩემს ხალხად და მე ვიქნები თქვენთვის ღმერთი, და გაიგებთ,რომ მე ვარ უფალი, თქვენი ღმერთი, თქვენი გამომყვანი ეგვიპტის უღლიდან.

⁸მიგიყვანთ ქვეყანაში, რომელზეც ფიცით აღვმართე ხელი, რომ მივცემდი აბრაამს, ისაკს და იაკობს, და მოგცემთ მას სამკვიდროდ. მე ვარ უფალი.”

⁹ასე ელაპარაკა მოსე ისრაელის ძეთ, მაგრამ მათ არ მოუსმინეს სულმოკლეობისა და მძიმე მონობის გამო.

¹⁰და ელაპარაკა უფალი მოსეს:

¹¹“მიდი, ელაპარაკე ფარაონს, ეგვიპტის მეფეს, რომ გაუშვას ისრაელის ძენი თავისი ქვეყნიდან.”

¹²და ილაპარაკა მოსემ უფლის წინაშე, ასე: “აჰა, ისრაელის ძეთ არ მოისმინეს ჩემი და როგორღა მომისმენს მე ფარაონი? მე ენაბრგვილი ვარ.”

¹³ელაპარაკა უფალი მოსეს და აარონს, და ათქმევინა მათ ისრაელის ძეთათვის და ფარაონისათვის, ეგვიპტის მეფისათვის, რათა გამოეყვანათ ისრაელის ძენი ეგვიპტის ქვეყნიდან.

¹⁴ესენი არიან მთავრები თავ-თავიანთი მამის სახლებისა: ძენი რეუბენისა,ისრაელის პირმშოსი: ხანოქი და ფალუ, ხეცრონი და ქარმი. ესაა რეუბენის საგვარეულო.

¹⁵და ძენი სიმონისა: იემუელი და იამინი, და ოჰადი, და იაქიმი, და ცოხარი, და საული, ძე ქანაანელი ქალისა. ესაა სიმონის საგვარეულო.

¹⁶აჰა,ლევის ძეთა სახელები თავიანთი გვარტომით: გერშონი და კეჰათი, და მერარი. და წლები ლევის ცხოვრებისა იყო ას ოცდაჩვიდმეტი წელი.

¹⁷ძენი გერშონისა: ლიბნი და შიმყი, თავ-თავიანთი საგვარეულოებით.

¹⁸და ძენი კეჰათისა:ყამრამი და იცჰარი, და ხებრონი, და ყუზიელი. და წლები კეჰათის ცხოვრებისა იყო ას ოცდაცამეტი წელი

¹⁹და ძენი მერარისა: მახლი და მუში. ესენია საგვარეულოები ლევისა თავიანთი გვარტომობით.

²⁰და მოიყვანა ყამრამმა იოქებედი, თავისი მამიდა, თავისთვის ცოლად. და მან უშვა აარონი და მოსე. და წლები ყამრამის ცხოვრებისა იყო ას ოცდა ჩვიდმეტი წელი.

²¹და ძენი იცჰარისა: კორახი და ნეფეგი, და ზიქრი.

²²და ძენი ყუზიელისა: მისაელი და ელცაფანი და სითრი.

²³და მოიყვანა აარონმა ცოლად ელიშებაყი, ასული ყამინადაბისა, ნახშონის და; და მან უშვა მას ნადაბი, აბიჰუ, ელეაზარი და ითამარი.

²⁴და ძენი კორახისა: ასირი და ელკანა და აბიასაფი: ესენია კორახის საგვარეულოები.

²⁵ელეაზარმა, აარონის ძემ, ცოლად მოიყვანა ფუტიელის ასულთაგანი და მან უშვა მას ფინხასი. ესენია ლევიანთა მთავრები თავ-თავიანთი გვარტომებით.

²⁶ეს იყო აარონი და მოსე, ვისაც უთხრა უფალმა: “გამოიყვანეთ ისრაელის ძენი ეგვიპტის ქვეყნიდან ლაშქრებად.”

²⁷ესენი ელაპარაკებოდნენ ფარაონს, ეგვიპტის მეფეს, რომ ისრაელის ძენი ეგვიპტიდან გამოეყვანათ. ეს იყო მოსე და აარონი.

²⁸და იყო იმ დღეს, როცა ელაპარაკებოდა უფალი მოსეს ეგვიპტის ქვეყანაში,

²⁹უთხრა უფალმა მოსეს: “მე ვარ უფალი! უთხარი ფარაონს, ეგვიპტის მეფეს, ყველაფერი, რასაც მე გელაპარაკები.”

³⁰და თქვა მოსემ უფლის წინაშე: “აჰა, მე ენაბრგვილი ვარ, და როგორ მომისმენს მე ფარაონი?”