Read სბს–სტოკჰოლმი 2001 გამოსვლა 7 Bible Online

გამოსვლა 7 - სბს–სტოკჰოლმი 2001 bible

გამოსვლა 7

¹უთხრა უფალმა მოსეს: “ნახე, ღმერთად დაგაყენე ფარაონისთვის, და აარონი, შენი ძმა, იქნება შენი წინასწარმეტყველი.”

²შენ იტყვი ყოველივეს, რასაც მე გიბრძანებ, და აარონი, შენი ძმა, ილაპარაკებს ფარაონთან, რათა გაუშვას ისრაელის ძენი თავისი ქვეყნიდან.

³და მე გავამძვინვარებ ფარაონის გულს და გავამრავლებ ჩემს ნიშნებსა და ჩემს სასწაულებს ეგვიპტის ქვეყანაში.

⁴არ მოგისმენთ თქვენ ფარაონი და მე მივყობ ხელს ეგვიპტეს, და გამოვიყვან ჩემს ლაშქარს, ჩემს ხალხს, ისრაელის ძეთ, ეგვიპტის ქვეყნიდან დიდი სასჯელებით.

⁵და შეიტყობენ ეგვიპტელნი, რომ მე ვარ უფალი, როცა გავიწვდი ხელს ეგვიპტეზე და გამოვიყვან ისრაელის ძეთ მათგან.”

⁶და გააკეთეს მოსემ და აარონმა. როგორც უბრძანა მათ უფალმა, ისე გააკეთეს.

⁷მოსე ოთხმოცი წლისა იყო, ხოლო აარონი ოთხმოცდასამი წლისა, ფარაონთან ლაპარაკის დროს.

⁸და უთხრა უფალმა მოსეს და აარონს:

⁹“თუ გეტყვით თქვენ ფარაონი: ‘სასწაული მოახდინეთ’, მაშინ ეტყვი აარონს: ‘აიღე შენი კვერთხი და დააგდე ფარაონის წინაშე’. და იქცევა იგი გველად.”

¹⁰და მივიდნენ მოსე დი აარონი ფარაონთან და გააკეთეს ისე, როგორც უფალმა უბრძანა. და დააგდო აარონმა თავისი კვერთხი ფარაონისა და მის მსახურთა წინაშე, და იქცა იგი გველად.

¹¹მოუხმო ფარაონმა ბრძენკაცებს და ჯადოქრებს და გააკეთეს მათაც, ეგვიპტელმა გრძნეულებმა, იგივე თავიანთი გრძნეულებით.

¹²და დააგდო თითოეულმა თავისი კვერთხი, და გადაიქცნენ ისინი გველებად. და შთანთქა აარონის კვერთხმა მათი კვერთხები.

¹³და გამძვინვარდა გული ფარაონისა და არ ისმინა მათი, როგორც ნათქვამი ჰქონდა უფალს.

¹⁴და უთხრა უფალმა მოსეს: “მძიმე გულისაა ფარაონი, უარზეა გაუშვას ხალხი.

¹⁵წადი ფარაონთან დილას. აჰა, გამოვა წყალთან და დადექი მის შესახვედრად მდინარის ნაპირას და კვერთხი, გველად რომ იქცა, ხელში აიღე.

¹⁶და უთხარი მას: ‘უფალმა, ებრაელთა ღმერთმა, მომავლინა შენთან ამის სათქმელად: გაუშვი ჩემი ხალხი, რომ მემსახურონ უდაბნოში. და აჰა, არ ისმინე აქამდე.

¹⁷ასე თქვა უფალმა: ‘ამით შეიტყობ, რომ მე ვარ უფალი: აჰა, კვერთხს, ხელში რომ მიჭირავს, დავკრავ წყალს, რომელიც მდინარეშია, და იქცევა სისხლად.

¹⁸და თევზი, რომელიც მდინარეშია, გაწყდება, და მდინარე აყროლდება, და ვეღარ დალევენ ეგვიპტელნი წყალს მდინარიდან.”

¹⁹და უთხრა უფალმა მოსეს: “უთხარი აარონს: ‘გაიწოდე ხელი ეგვიპტელთა წყლებზე - მათ მდინარეებზე, მათ ნაკადულებზე, მათ ტბებსა და მათი წყლების ყოველ შესაკრებელზე, და იქცევიან სისხლად, და ჩადგება სისხლი ეგვიპტის მთელ ქვეყანაში, როგორც ხეებში, ისე ქვებშიც.”

²⁰და გააკეთეს ისე მოსემ და აარონმა, როგორც ბრძანა უფალმა. და აღმართა კვერთხი, და დასცა მდინარის წყალს ფარაონის თვალწინ და მის მსახურთა თვალწინ, და გადაიქცა მთელი მდინარის წყალი სისხლად.

²¹და თევზი მდინარისა გაწყდა და აყროლდა მდინარე, და ვეღარ დალიეს ეგვიპტელებმა წყალი მდინარიდან. და ჩადგა სისხლი ეგვიპტის მთელ ქვეყანაში.

²²და გააკეთეს იგივე ეგვიპტის გრძნეულებმა თავიანთი ჯადოქრობით. და გამძვინვარდა გული ფარაონისა და არ ისმინა მათი, როგორც ნათქვამი ჰქონდა უფალს.

²³გატრიალდა ფარაონი და წავიდა სახლში. და არც ეს მიიკარა გულს.

²⁴და თხრიდნენ ეგვიპტელები მდინარის გაყოლებაზე, რომ ეპოვათ სასმელი წყალი, რადგან ვერ სვამდნენ წყალს მდინარიდან.

²⁵და შესრულდა შვიდი დღე, რაც უფალმა მდინარეს დაჰკრა.