Read სბს–სტოკჰოლმი 2001 გამოსვლა 8 Bible Online

გამოსვლა 8 - სბს–სტოკჰოლმი 2001 bible

გამოსვლა 8

¹და უთხრა უფალმა მოსეს: “მიდი ფარაონთან და უთხარი მას: ასე ამბობს-თქო უფალი: გაუშვი ჩემი ხალხი, რათა მემსახურონ!

²და თუ უარს იტყვი გაშვებაზე, მაშინ მე მოვწყლავ მთელ შენს მიწა-წყალს ბაყაყებით.

³და გაივსება მდინარე ბაყაყებით, და ამოვლენ და შემოვლენ შენს სახლში და შენს საწოლ ოთახში, და შენს სარეცელზე, შენს მსახურთა და შენი ხალხის სახლებში, შენს თონეებში და შენს ვარცლებში.

⁴შენზე, შენს ხალხზე და ყოველ შენს მსახურზე ამოვლენ ბაყაყები.”

⁵და უთხრა უფალმა მოსეს: “უთხარი აარონს: ‘გაიწოდე ხელი შენი კვერთხით მდინარეებზე, ნაკადულებზე და ტბებზე, და ამოიყვანე ბაყაყები ეგვიპტის ქვეყანაზე’.”

⁶და გაიწოდა აარონმა ხელი ეგვიპტის წყლებზე, და ამოვიდა ბაყაყი და დაფარა ეგვიპტის ქვეყანა.

⁷და გააკეთეს იგივე გრძნეულებმა თავიანთი ჯადოქრობით. და ამოიყვანეს ბაყაყები ეგვიპტის ქვეყანაზე.

⁸და დაუძახა ფარაონმა მოსეს და აარონს, და უთხრა: “შეევედრეთ უფალს, რათა მოგვაშოროს ბაყაყები მე და ჩემს ხალხს, და გავუშვებ ამ ხალხს, რომ შესწირონ მსხვერპლი უფალს.”

⁹და უთხრა მოსემ ფარაონს: “მიბრძანე, როდის ვილოცო შენთვის, შენს მსახურთათვის და შენი ხალხისთვის ბაყაყების მოსპობაზე შენთან და შენი სახლებიდან. მხოლოდ მდინარეში დარჩებიან.”

¹⁰და თქვა: “ხვალ.” და თქვა: “იყოს შენი სიტყვისამებრ, რათა გაიგო, რომ არ არსებობს მსგავსი ჩვენი უფალი ღმერთისა.

¹¹და მოგშორდებიან ბაყაყები შენ და შენს სახლებს, შენს მსახურთ და შენს ხალხს. მხოლოდ მდინარეში დარჩებიან.”

¹²და გამოვიდნენ მოსე და აარონი ფარაონისგან. და შეჰღაღადა მოსემ უფალს ბაყაყთა გამო, რომელნიც მოუვლინა ფარაონს.

¹³და გააკეთა უფალმა მოსეს სიტყვისამებრ. და დაიხოცნენ ბაყაყები სახლებში, ეზოებსა და მინდვრებში.

¹⁴და მოაგროვეს ისინი გროვებად და აყროლდა ქვეყანა.

¹⁵და იხილა ფარაონმა, რომ მოხდა შემსუბუქება, და გაიმძვინვარა გული და არ ისმინა მათი, როგორც ნათქვამი ჰქონდა უფალს.

¹⁶და უთხრა უფალმა მოსეს: “უთხარი აარონს: ‘გაიწოდე შენი კვერთხი და დაჰკარი მიწის მტვერს, და გადაიქცევა მკბენარად ეგვიპტის მთელ ქვეყანაზე.”

¹⁷ასეც გააკეთეს: და გაიწოდა აარონმა ხელი თავისი კვერთხით, და დაჰკრა მიწის მტვერს, და მოედო მკბენარი ადამიანსა და პირუტყვს. მიწის მთელი მტვერი გადაიქცა მკბენრად ეგვიპტის მთელ ქვეყანაზე.

¹⁸და იგივე გააკეთეს გრძნეულებმა თავიანთი ჯადოქრობით, რათა გამოეყვანათ მკბენარი, მაგრამ ვერ შეძლეს. და ეხვია მკბენარი ადამიანსა და პირუტყვს.

¹⁹და უთხრეს გრძნეულებმა ფარაონს: “ღვთის თითია ეს.” და გამძვინვარდა გული ფარაონისა, და არ ისმინა მათი, როგორც ნათქვამი ჰქონდა უფალს.

²⁰და უთხრა უფალმა მოსეს: “ადექი დილაადრიან და წარსდექი ფარაონის წინაშე. და როცა გამოვა წყალთან, უთხარი მას: ასე თქვა-თქო უფალმა: გაუშვი ჩემი ხალხი, რათა მემსახურონ.

²¹თუ არ გაგიშვია ჩემი ხალხი, მოვავლენ შენზე და შენს ხალხზე, და შენს სახლებზე ბუზანკალს, და აივსება ეგვიპტელთა სახლები ბუზანკალით, და თვით მიწაც, სადაც ისინი არიან.

²²და გამოვარჩევ იმ დღეს გოშენის ქვეყანას, სადაც დგას ჩემი ხალხი, რომ არ იყოს იქ ბუზანკალი, რათა იცოდე, რომ მე, უფალი, ქვეყნის შუაგულში ვარ.

²³და გავარჩევ ერთმანეთისგან ჩემს ხალხს და შენს ხალხს. ეს ნიშანი ხვალე მოხდება.”

²⁴და გააკეთა უფალმა, როგორც თქვა, და შეესია დიდძალი ბუზანკალი ფარაონის სახლს და მის მსახურთა სახლს, და ეგვიპტის მთელ ქვეყანას. მოისრა ქვეყანა ბუზანკალისაგან.

²⁵და მოუხმო ფარაონმა მოსეს და აარონს, და უთხრა: “წადით, შესწირეთ მსხვერპლი თქვენს ღმერთს ამ ქვეყანაში.”

²⁶და თქვა მოსემ: “არ ეგების ამის გაკეთება, რადგან სისაძაგლეა ეგვიპტელთათვის, მსხვერპლს რომ ვწირავთ მათ თვალწინ. განა არ ჩაგვქოლავენ?

²⁷სამი დღის სავალზე წავალთ უდაბნოში და შევწირავთ მსხვერპლს უფალს, ჩვენს ღმერთს, როგორც ის გვიბრძანებს.”

²⁸და თქვა ფარაონმა: “გაგიშვებთ და შესწირეთ მსხვერპლი უფალს, თქვენს ღმერთს უდაბნოში. ოღონდ შორს ნუ წახვალთ. შეევედრეთ ჩემთვის!”

²⁹და თქვა მოსემ: “აჰა, მე გავდივარ შენგან და შევევედრები უფალს, რათა განშორდეს ბუზანკალი ფარაონს, მის მსახურებს და მის ხალხს ხვალ. ოღონდ ნუღარ მოიტყუება ფარაონი და გაუშვას ხალხი უფლისათვის მსხვერპლის შესაწირად.

³⁰და გამოვიდა მოსე ფარაონისგან, და შეევედრა უფალს.

³¹და გააკეთა უფალმა მოსეს სიტყვისამებრ, და განაშორა ბუზანკალი ფარაონს, მის მსახურთ და მის ხალხს, და არ დარჩენილა არც ერთი.

³²გაიმძვინვარა ფარაონმა თავისი გული ამჯერადაც და არ გაუშვა ხალხი.