Read სბს–სტოკჰოლმი 2001 იობი 11 Bible Online

იობი 11 - სბს–სტოკჰოლმი 2001 bible

იობი 11

¹და მიუგო ცოფარ ნაყამათელმა:

²“ნუთუ ბევრი სიტყვა უპასუხოდ დარჩება? და ნუთუ ყბედი გამართლდება?

³ნუთუ შენი ფუჭსიტყვაობა დაადუმებს კაცებს? და ნუთუ დაცინვას მოჰყვები და არავინ იქნება შემარცხვენელი?

⁴და შენ ამბობდი: ‘ხალასია ჩემი მოძღვრება და სუფთა ვარ შენს თვალში!’

⁵და ნეტავ ღმერთი ალაპარაკდებოდეს და გახსნიდეს ბაგეებს შენს მიმართ,

⁶და გაგიცხადებდეს თავისი სიბრძნის საიდუმლოებებს! რადგან ორმაგია ნამდვილი სიბრძნე და, იცოდე, რომ ღმერთი შენი გულისათვის ივიწყებს ზოგიერთ შენს შეცოდებას.

⁷ჩასწვდები შენ ღვთის სიღრმეს? მისწვდები ყოვლადძლიერის სამანს?

⁸იგი ზეცაზე მაღალია - რას იზამ? ქვესკნელზე ღრმაა - რას გაიგებ?

⁹იგი ზომით დედამიწის უგრძესია და ზღვის უვრცესია.

¹⁰თუ ჩაივლის, შებორკავს და წარუდგენს სამსჯავროს, წინ ვინ აღუდგება?

¹¹რადგან ის სცნობს ცბიერ ადამიანებს, როცა უსამართლობას ხედავს, განა ყურადღებას არ მიაქცევს?

¹²ცარიელი თავი განისწავლება? და ველური ვირის ჩოჩორი ადამიანად დაიბადა?

¹³თუ შენ განაწყობ შენს გულს და მისკენ გაიწვდი ხელებს,

¹⁴თუ შენს ხელში უსამართლობაა, განიშორე ის, რომ შენს კარვებში არ დაივანოს უსამართლობამ,

¹⁵რადგან მაშინ აღმართავ შენს სახეს უმწიკვლოდ, განმტკიცდები და შიში არ გექნება,

¹⁶რადგან დაივიწყებ შენს ტანჯვას, როგორც ჩავლილ წყალს, ისე გაიხსენებ.

¹⁷შენი სიცოცხლე შუადღეზე ნათელი იქნება, და ბნელი დილასავით გახდება.

¹⁸დაიმედებული იქნები, რადგან არის სასო. და მიმოიხედავ და იმედიანად დაწვები.

¹⁹და დაივანებ, და არავინ იქნება შენი შემწუხებელი, და მრავალნი დაგიწყებენ ლიქნას.

²⁰და ურჯულოთა თვალნი დაივსებიან, დაეკარგებათ მათ თავშესაფარი, და მათი სასო სულის განტევება იქნება.”