Read სბს–სტოკჰოლმი 2001 იობი 16 Bible Online

იობი 16 - სბს–სტოკჰოლმი 2001 bible

იობი 16

¹და მიუგო იობმა და თქვა:

²მისთანები ბევრი მსმენია, ამაო ნუგეშისმცემელნი ხართ ყველანი!

³ნეტა მოეღება ბოლო ქარიან სიტყვებს? და რამ შეგაურვა, ასეთ პასუხს რომ იძლევი?

⁴მეც თქვენსავით ვილაპარაკებდი, თქვენი სული ჩემი სულის ადგილზე რომ ყოფილიყო. თავს მოვუყრიდი სიტყვებს თქვენს წინააღმდეგ, და თავის ქნევას დავიწყებდი,

⁵გაგამხნევებდით ჩემი პირით, და ჩემს ბაგეთა მოძრაობა დაგიამებდათ ტკივილს.

⁶თუ ვილაპარაკებ, ტკივილი არ დამიამდება, თუ დავდუმდები, რა გამშორდება?

⁷მაგრამ ახლა მან დამქანცა. შენ დამიქციე მთელი ჩემი კრებული.

⁸შენ გამიჩინე ნაოჭები, რაც მოწმობაა ჩემს წინააღმდეგ, წამოიმართა ჩემს წინააღმდეგ ჩემი სიმჭლევე, და იგი მოწმობს ჩემს საპირისპიროდ.

⁹მისი რისხვა მფლეთს და მემტერება, კბილებს მიღრჭიალებს, ჩემი მტერი თვალებს აკვესებს ჩემზე,

¹⁰პირი აქვთ ჩემზე დაღრენილი, მაგინებენ და სახეში მცემენ, ერთად შეითქვნენ ჩემს წინააღმდეგ.

¹¹მიმცა მე ღმერთმა უსამართლოს, და ურჯულოთა ხელში ჩამაგდო.

¹²მშვიდად ვიყავი და დამლეწა; ჩამავლო კისერში ხელი და დამლეწა, და თავის სამიზნედ დამსვა.

¹³გარს მეხვევიან მისი ისრები. ის სერავს ჩემს თირკმელებს და არ იბრალებს, ანთხევს ჩემს ნაღველს მიწაზე.

¹⁴იგი ლეწვით მლეწავს და მლეწავს, მეომარივით გამორბის ჩემკენ.

¹⁵ძაძა გადავიკერე კანზე და მიწა მტვერში ამოვიგანგლე რქა.

¹⁶სახე ალეწილი მაქვს ტირილისაგან და სიკვდილის აჩრდილია ჩემს წამწამებზე.

¹⁷თუმცა არაა ძალადობა ჩემს ხელთ და ჩემი ლოცვაც წმიდაა.

¹⁸მიწავ, ნუ დაფარავ ჩემს სისხლს, და ნუ ექნება თავმისადრეკი ჩემს მოთქმას.

¹⁹ახლა კი, აჰა, ცაშია ჩემი მოწმე, ჩემი ქომაგი მაღალთა შინაა.

²⁰ჩემნო ქომაგნო, ჩემო მეგობრებო, ღვთის მიმართ აღივსება ჩემი ცრემლი,

²¹რათა განსაჯოს მან კაცსა და ღმერთს შორის, როგორც ადამიანსა და მის მოყვასს შორის,

²²რადგან თავდება ჩემს წელთა რიცხვი და ვდგები უკანმოუქცეველ გზაზე.”