Read სბს–სტოკჰოლმი 2001 იობი 20 Bible Online

იობი 20 - სბს–სტოკჰოლმი 2001 bible

იობი 20

¹მიუგო ცოფარ ნაყამათელმა და თქვა:

²“ამიტომ მაიძულებენ ჩემი ფიქრები პასუხს, და ამის გამოა, რომ ვიჩქარი;

³რადგან ჩემს შეურაცხმყოფელ შენიშვნას ვისმენ, და ჩემი გონების სული მათქმევინებს პასუხს.

⁴ხომ იცი ეს ძველთაგან, მას აქეთ, რაც ადამიანი დამკვიდრდა მიწაზე,

⁵ურჯულოთა ლხენა ხანმოკლეა, და უღვთოს სიხარული - წამიერი.

⁶თუნდაც ცად ამაღლდეს მისი დიდება და მისი თავი ღრუბლებს მისწვდეს,

⁷თავისი განავალივით გაქრება სამუდამოდ, და მისი მნახველნი იკითხავენ:‘სადაა იგი?’

⁸სიზმარივით გაფრინდება და ვერავინ იპოვნის, ღამეულ ჩვენებასავით გაუჩინარდება.

⁹თვალი, მისი მნახველი, ვეღარ იხილავს მას, და მეტად ვეღარც მისი ადგილი იხილავს მას.

¹⁰და მისი ძენი ღარიბ-ღატაკთა მომადლიერებას ეცდებიან, და თავისი ხელით დაუბრუნებენ დოვლათს.

¹¹მისი ძვლები სავსეა სიჭაბუკით, მაგრამ მასთან ერთად მიიქცევიან მიწა-მტვრად.

¹²თუმცა ბოროტება ეტკბილება პირში და ენის ქვეშ ინახავს,

¹³თუმცა ზოგავს მას და არ გამოაგდებს და პირში იჩერებს,

¹⁴და მაინც გადაექცევა საჭმელი სიმწარედ მუცელში, ასპიტთა შხამად მის ნაწლავებში.

¹⁵იგი ყლაპავს დოვლათს, მაგრამ ამოარწყევს, ღმერთი გამოუდევნის მას მუცლიდან.

¹⁶ასპიტთა შხამსა სწოვს იგი, უნასის ენა მოჰკლავს მას.

¹⁷ვერ იხილავს ნაკადულებს, მდინარეებს, თაფლისა და ერბოს ნიაღვრებს.

¹⁸დააბრუნებს ნაოფლარს და ვერ ჩაყლაპავს. დოვლათის მიხედვით ექნება ნავაჭრი, მაგრამ ვერ ნახავს კმაყოფილებას.

¹⁹რადგან ჩაგრავდა და ივიწყებდა ღარიბ-ღატაკებს, სახლს ანგრევდა და არ აშენებდა.

²⁰ვინაიდან არ ასვენებდა მუცელი, თავის სასურველს ვერაფერს გადაარჩენს.

²¹არაფერი მორჩენია შეუსანსლავი, ამისთვის ვერ გასტანს მისი კეთილდღეობა.

²²თავისი სისავსის სიუხვეში ვიწროდ იქნება, ყოველი გატანჯული ხელი მისწვდება მას.

²³მუცელს რომ ამოიყორავს, ღმერთი მოუვლენს მას თავისი რისხვის ცეცხლს და საჭმელად აწვიმებს მასზე.

²⁴გაექცევა რკინის იარაღს, - განგმირავს მას სპილენძის მშვილდი.

²⁵გამოიძრობს და გამოვა მისი სხეულიდან ისარი, და ელვა გამოვა მისი ნაღველადან, თავზარი დაეცემა მას.

²⁶მთელი წყვდიადი მის საგანძურად შეინახება. შეჭამს მას დაუნთებელი ცეცხლი, და ეწევა სიავე მისი კარვის ნატამალს.

²⁷გააცხადებს ზეცა მის დანაშაულს და მიწა აღდგება მის წინააღმდეგ.

²⁸და მისი სახლის დოვლათი გადაივლის და წაილეკება მისი რისხვის დღეს.

²⁹ეს არის ხვედრი ურჯულო კაცისა და ხვედრი, ღვთის მიერ ნაბრძანები.”