Read სბს–სტოკჰოლმი 2001 იობი 21 Bible Online

იობი 21 - სბს–სტოკჰოლმი 2001 bible

იობი 21

¹და მიუგო იობმა და თქვა:

²მენით ისმინეთ ჩემი სიტყვა, და ეს იყოს თქვენგან ნუგეშისცემა ჩემი.

³ჯერ მე მათქმევინეთ და როცა ვიტყვი, მერე დამცინეთ.

⁴განა ადამიანს ვემდური? როგორ არ ვიქნები სულმოკლე?

⁵შემომხედეთ და განცვიფრდით, და პირზე აიფარეთ ხელი.

⁶ამაზე ფიქრიც კი მზარავს, და ძრწოლა იპყრობს ჩემს ხორცს.

⁷რატომ არის, რომ ცოცხლობენ ურჯულონი, სიბერეს აღწევენ და ძალით მძლავრობენ?

⁸მათსავე სიცოცხლეში მათ წინაშე გამყარებულია მათი მოდგმა, და მათი შთამომავლობა მათ თვალწინაა.

⁹მათი სახლები დაცულია შიშისგან და არც ღვთის კვერთხია მათზე.

¹⁰მისი კურო ამაკებს და არ ააცდენს, მათი ფური მაკდება და მკვდარს არ იგებს.

¹¹ფარასავით უშვებენ თავიანთ ბალღებს, და კუნტრუშობენ მათი პატარები.

¹²მღერიან დაირაზე და ქნარზე და მხიარულებენ სალამურის ხმაზე.

¹³კეთილდღეობაში ატარებენ თავიანთ დღეებს, და მშვიდად ჩავლენ შავეთს.

¹⁴ღმერთს ეუბნებიან: ‘ჩამოგვშორდი, არ გვსურს ვიცოდეთ შენი გზები.

¹⁵რა არის ყოვლადძლიერი, რომ ვემსახუროთ? და რას გვარგებს, რომ ვეხვეწოთო?’

¹⁶აჰა, მათი კეთილდღეობა მათ ხელში არ არის! - ურჯულოთა რჩევა შორს არის ჩემგან!

¹⁷ხშირად ყოფილა, რომ ჩამქრალა ურჯულოთა სანთელი? რამდენჯერ სწევიათ მათ უბედურება? თავისი რისხვის ჟამს უნაწილებს ღმერთი მათ სატანჯველს?

¹⁸იქნებიან ისინი ჩალის წველივით ქარის წინაშე და როგორც ბზე, ქარიშხლისაგან მოტაცებული.

¹⁹შენ იტყვი: ‘ღმერთი სატანჯველს უნახავს მის შვილებს.’- დაე, თავად მათ მიაგოს ღმერთმა, რომ იწვნიონ!

²⁰იხილონ მისმა თვალებმა თავისი უბედურება და თავად შესვას ყოვლადძლიერის რისხვა.

²¹რადგან რაღა სარგებლობა აქვს თავის სახლში სიკვდილის შემდგომ, როცა მისი თვეების რიცხვი შეწყდება?

²²ნუთუ ღმერთს ჭკუა ესწავლება, როცა იგი ზენაურთ განიკითხავს?

²³ზოგი სრული კეთილდღეობის ჟამს კვდება, სრულიად მშვიდი და უზრუნველი.

²⁴მისი წიაღი სავსეა რძით და მისი ძვლები სავსეა ტვინით.

²⁵ზოგი კი სულგამწარებული კვდება, და არ უნახავს სიკეთის გემო.

²⁶ერთად წვანან მიწაში და ჭიები ფარავენ მათ.

²⁷მე ვიცი თქვენი ფიქრები და მზაკვრობანი, რითაც ძალადობთ ჩემზე,

²⁸რადგან ამბობთ: ‘სად არის დიდებულის სახლი, და სად არის ურჯულოთა კარავ-სავანეები?’

²⁹განა არ შეეკითხეთ გზად ჩამვლელებს, და არ გსმენიათ მათი მოწმობები,

³⁰რომ წარწყმედის დღეს დაზოგილია ბოროტი კაცი, გარიდებულ იქნება რისხვის დღეს?

³¹ვინ ამხილებს მას პირში მისი გზის გამო, და ვინ მიუზღავს მას ნამოქმედარისთვის?

³²სამარემდის მიასვენებენ და დარაჯს მიუჩენენ მის საფლავს.

³³ტკბილად მიიღებს ველის გორახებს, მრავალი კაცი გააცილებს მის ცხედარს, და მის წინაც მრავალი წაუძღვება.

³⁴როგორღა მანუგეშებთ მე ამაოებით? თქვენი პასუხები სიცრუედ რჩება!”