Read სბს–სტოკჰოლმი 2001 იობი 22 Bible Online

იობი 22 - სბს–სტოკჰოლმი 2001 bible

იობი 22

¹და მიუგო ელიფაზ თემანელმა და თქვა:

²“რას არგებს ღმერთს კაცი? განა გონიერი თავის თავს არა რგებს?

³გგონია: ეამება ყოვლადძლიერს შენ რომ მართალი ხარ? და რა გამორჩენა აქვს, თუ წრფელია შენი გზები?

⁴გგონია: შენი ღვთისმოშიშების გამო დაგიწყებს ყვედრებას და წამოვა შენთან ერთად სამსჯავროზე?

⁵განა დიდი არაა შენი ბოროტება? განა აქვს ბოლო შენს შეცოდებებს?

⁶რადგან არაფრის გულისთვის ართმევდი გირაოს შენს ძმებს, და შიშველ-ტიტვლებს ხდიდი ტანსაცმელს.

⁷წყურვილით დატანჯულს წყალს უკავებდი და მშიერს პურს არ აწვდიდი.

⁸ძლიერი კაცისაა ეს ქვეყანა, და წარჩინებული მკვიდრობს აქ.

⁹ქვრივებს ხელცარიელს ისტუმრებდი და ობლებს მკლავებს უთეთქვავდი.

¹⁰ამიტომ არის შენს ირგვლივ მახენი და გაკრთობს ანაზდეული შიში.

¹¹იქნებ ბნელა და ვეღარ ხედავ, და წყლის ნიაღვარმა დაგფარა?

¹²განა ღმერთი ცათა მწვერვალზე არ არის? შეხედე ვარსკვლავთა თავანს, რა მაღალია!

¹³და შენ ამბობ: ‘რა იცის ღმერთმა? შავი ღრუბლიდან განიკითხავს?

¹⁴ღრუბელნი საფარველად აქვს და ვერ იხედება, ცის კაბადონზე დადის.’

¹⁵ნუთუ იმ ძველ ბილიკს ადგახარ, ავკაცნი რომ დადიოდნენ,

¹⁶რომელნიც უდროოდ წარიტაცნენ, რომელთა საძირკველიც მდინარემ გადარეცხა?

¹⁷ისინი ეუბნებოდნენ ღმერთს: ‘გაგვეცალე!’ და: ‘ყოვლადძლიერი რას გვარგებს?’

¹⁸მან კი სიკეთით აუვსო მათ სახლები. მაგრამ ურჯულოთა რჩევა შორსაა ჩემგან!

¹⁹უყურებენ მართალნი და ხარობენ და უმწიკვლონი დასცინიან მათ.

²⁰ამბობენ: ‘აჰა, გამწყდარა ჩვენი მტერი და მათი ნატამალი ცეცხლს შთაუნთქავს.’

²¹შეეწყვე მას - და მშვიდობით იყავი; ამით მოვა სიკეთე შენთან.

²²მიიღე მისი პირიდან რჯული და მისი სიტყვები გულში ჩაიდევი.

²³თუ დაუბრუნდები ყოვლადძლიერს, აშენდები, მოაშორე უსამართლობა შენს კარავს.

²⁴შენი ოქრო მტვერში ჩააგდე, ოფირის ოქრო - ხევების ლოდებში.

²⁵და ყოვლადძლიერი იქნება შენი ოქრო, და ძვირფასი ვერცხლი იქნება შენთვის,

²⁶რადგან მაშინ დატკბები ყოვლადძლიერში და ღმერთს მიაპყრობ სახეს.

²⁷ილოცებ მის მიმართ და მოგისმენს, და შენ შეასრულებ შენს აღთქმებს.

²⁸და რასაც გადაწყვეტ, აგისრულდება, და შენს გზაზე ნათელი იბრწყინებს.

²⁹როცა დაგამდაბლებენ, იტყვი: ‘ამაღლება’ და ის იხსნის თვალდახრილს.

³⁰ის გადაარჩენს დამნაშავესაც; და გადარჩება ის შენი ხელების სიწმიდით”.