Read სბს–სტოკჰოლმი 2001 იობი 27 Bible Online

იობი 27 - სბს–სტოკჰოლმი 2001 bible

იობი 27

¹და განაგრძო იობმა თავისი იგავის თხრობა და თქვა:

²“ვფიცავ ღმერთს, რომელმაც წამართვა სამართალი, და ყოვლადძლიერს, რომელმაც სიცოცხლე გამიმწარა.

³რადგან, ვიდრე ჩემი სუნთქვა ჩემშია და ღვთის სული ჩემს ნესტოებშია,

⁴ჩემი ბაგეები არ იტყვიან უკეთურებას და ჩემს ენას არ დასცდება სიცრუე.

⁵ღმერთმა დამიფაროს, რომ გაგამართლოთ! სიკვდილამდე არ განვიშორებ ჩემს უმწიკვლოებას!

⁶ჩემს სიმართლეს მტკიცედა ვარ ჩაბღაუჭებული და არ გავუშვებ. არ გავუმტყუნებივარ ჩემს გულს ჩემი დღე და მოსწრება.

⁷იყოს მტერი ჩემი, როგორც ურჯულო, და მოწინააღმდეგე ჩემი, როგორც უკეთური.

⁸რადგან როგორია სასოება მლიქვნელისა, როცა იპოვის სარგებელს, როდესაც აცთუნებს ღმერთი მის სულს?

⁹განა შეისმენს მის ღაღადისს ღმერთი, როცა მას გასაჭირი დაადგება თავს?

¹⁰ინეტარებს განა ყოვლადძლიერში და ღვთის ხსენებაში იქნება გამუდმებით?

¹¹მე თქვენ გასწავლით ღვთის ხელით, რაც ყოვლადძლიერთან არის, არ დავფარავ.

¹²აჰა, თქვენ ყველას ნანახი გაქვთ და რაღა საჭიროა ამაო ლაპარაკი?

¹³ასეთია ურჯულო კაცის ხვედრი ღმერთთან, და მტარვალთა ხვედრი, ყოვლადძლიერისაგან რომ ერგებათ.

¹⁴თუ ვაჟები გაუმრავლდება, მხოლოდ მახვილისათვის, და მისი შთამომავალნი პურით ვერ გაძღებიან.

¹⁵მის ნატამალს სიკვდილი დაასამარებს, და მათი ქვრივები ვერ დაიტირებენ მათ.

¹⁶თუ მიწა-მტვერივით დააგროვებს ვერცხლს და თიხასავით მოამზადებს სამოსელს,

¹⁷ის კი მოამზადებს, მაგრამ მართალი შეიმოსავს, ვერცხლი კი უდანაშაულოს ერგება წილად.

¹⁸აშენებს თავის სახლს, როგორც ჩრჩილი, და როგორც დარაჯი იკეთებს ქოხს.

¹⁹წვება მდიდარი და არაფერი აკლია, თვალებს აახელს და აღარაფერია.

²⁰ეწევა საშინელებანი, როგორც წყლები, ღამით გრიგალი გაიტაცებს მას.

²¹წაიღებს მას აღმოსავლეთის ქარი და წავა და წარხვეტს მას მისი ადგილიდან.

²²და მოისვრის მას და არ შეიბრალებს. განა გაექცევა მის ხელს?

²³ხალხი ტაშს შემოჰკრავს მის გამო და სტვენას დაუწყებს მას თავისი ადგილიდან.”