Read სბს–სტოკჰოლმი 2001 იობი 28 Bible Online

იობი 28 - სბს–სტოკჰოლმი 2001 bible

იობი 28

¹“რადგან ვერცხლს საბადო აქვს და ოქროს კი ადგილი, სადაც წმენდენ მას.

²რკინას მიწიდან იღებენ, სპილენძი კი ქვისაგან გამოიდნობა.

³ზღვარი დაუდვა კაცმა ბნელს და ქვეყნის კიდემდე ეძებს ქვას წყვდიადსა და ბნელში.

⁴გაკაფა გზა ხეობაში, შორს უკაცრიელი ადგილიდან, ფეხმივიწყებულ ადგილებში. გამოკიდებულნი არიან კაცთაგან შორს და ქანაობენ.

⁵მიწა - მისგან აღმოცენდა პური, მისი ქვეშეთი აბრუნებულია, როგორც ცეცხლი.

⁶მისი ქვები საფირონის ადგილია და მის მიწაში ოქრო ურევია.

⁷მისი ბილიკი არ იცის მტაცებელმა ფრინველმა, და შევარდნის თვალსაც არ დაუნახავს.

⁸ამაყ მხეცებს იქ ფეხი არ დაუდგამთ, ლომს მასზე არ გაუვლია.

⁹კაჟზე იშვერს ხელს, ძირფესვიანად აყირავებს მთებს.

¹⁰კლდეებში არხები გაჰყავს და ყოველივე ძვირფასს სჭვრეტს მისი თვალი.

¹¹მდინარეთა დინებას აკავებს, და დამალული სინათლეზე გამოაქვს.

¹²სად იპოვება სიბრძნე? და სად არის გონების ადგილი?

¹³მისი ფასი არ იცის კაცმა, და ცოცხალთა ქვეყანაში არ იპოვება.

¹⁴უფსკრული ამბობს ‘ის ჩემში არ არის!’ და ზღვაც ამბობს: ‘ჩემთან არ არის!’

¹⁵არ გაიცვლება ხალას ოქროში, და არ აიწონება ვერცხლი მის საფასურად.

¹⁶არ შეფასდება ოფირის ოქროდ, არც ძვირფასი ონიქსითა და საფირონით.

¹⁷ვერ გაუსწორდება მას ოქრო და ბროლი, და ვერც ბაჯაღლოს ჭურჭელში გაიცვლება.

¹⁸მარჯანი და ბროლი არ არის სახსენებელი, და სიბრძნის მოხვეჭა მარგალიტთა უმჯობესია.

¹⁹ვერ გაუსწორდება მას ქუშის ტოპაზი, ხალასი ოქროთი ვერ შეფასდება.

²⁰საიდან მოდის სიბრძნე? და სად არის გონების ადგილი?

²¹იგი დამალულია ყოველი ცოცხალის თვალთაგან, და დაფარულია ცის ფრინველთაგან.

²²აბადონი და სიკვდილი ამბობენ: ‘ყური მოგვიკრავს მისთვის!’

²³ღმერთმა იცის მისი გზა და მან უწყის მისი ადგილი,

²⁴რადგან ის გაჰყურებს ქვეყნის კიდეებს, და ჭვრეტს მთელ ცისქვეშეთს.

²⁵როდესაც ქარს წონას უწესებდა და წყალს საწყაულით წყავდა,

²⁶როდესაც წვიმას წესს უდებდა და მეხისცემას - გზა-სავალს,

²⁷მაშინ იხილა იგი და გამოაცხადა, გამოიკვლია,

²⁸და ადამიანს უთხრა: ‘უფლის შიშია სიბრძნე და ბოროტისაგან განრიდებაა გონება.’”