Read სბს–სტოკჰოლმი 2001 იობი 3 Bible Online

იობი 3 - სბს–სტოკჰოლმი 2001 bible

იობი 3

¹და ამის შემდგომ გახსნა იობმა ბაგე და დასწყევლა თავისი დღე.

²და თქვა იობმა:

³“დაიქცეს ის დღე, მე რომ გავჩნდი, და ღამე, რომელმაც თქვა: ‘კაცი ჩაისახა!’

⁴ის დღე დაბნელდეს, აღარ მოხედოს მას ღმერთმა ზეგარდმო, აღარ ინათოს მასზე ნათელმა!

⁵მოიცვას ის ბნელმა და სიკვდილის აჩრდილმა, დაივანოს მასზე ღრუბელმა, შეაძრწუნოს ის დღის სიშავემ!

⁶ის ღამე შეიპყროს წყვდიადმა, არ გაიხაროს წლის დღეთა შორის! თვეთა რიცხვში აღარ ითვლებოდეს!

⁷აჰა, გაბერწდეს ის ღამე, აღარ ეღირსოს სიხარული.

⁸დასწყევლონ იგი დღის მაწყევრებმა, რომელთაც ძალუძთ ლევიათანის გამოღვიძება!

⁹დაე, დაბნელდნენ მისი განთიადის ვარსკვლავები, ელოდოს ნათელს და არ ჩანდეს, და ვერ იხილოს წამწამნი ცისკრისა.

¹⁰რადგან დედაჩემის საშოშივე არ ჩამიკეტა კარი, და არ დაფარა სალმობა ჩემს თვალთაგან.

¹¹რატომ არ მოვკვდი გაჩენისთანავე, მუცლიდან გამოსვლისთანავე რად არ გავთავდი?

¹²რად მიმიღეს მე ბებიაქალის მუხლებმა, და რად შემეგებნენ დედაჩემის ძუძუნი მოსაწოვებლად?

¹³რადგან ახლაც ხომ ვიწვებოდი დამშვიდებული, ძილში ვიქნებოდი მოსვენებული,

¹⁴ქვეყნიერების მეფეებთან და მრჩევლებთან, თავისთვის საძვალეთა მაშენებლებთან,

¹⁵ან მთავრებთან, რომელთაც ოქრო ჰქონდათ, და ვერცხლით რომ ივსებდნენ სახლებს.

¹⁶ან რატომ არ დავიმარხე მკვდრადშობილივით, იმ ჩვილივით, ნათელი რომ არ უნახავს?

¹⁷იქ ბოროტეულნი აღარ შფოთავენ, და იქ განისვენებენ მოქანცულნი.

¹⁸იქ მშვიდად არიან ტუსაღები და თავმდგმურთა ხმა არ ესმით.

¹⁹მცირენი და დიდნი იქ არიან, და მონა თავისუფალია თავისი ბატონისაგან.

²⁰რაღად მიეცა ტანჯულს ნათელი, და სულგამწარებულს - სიცოცხლე,

²¹სიკვდილის მონატრულებს და ვერმპოვნელებს, დამარხულ განძზე მეტად რომ ეძებენ,

²²უზომოდ გახარებულებს და აღტაცებულებს საფლავის პოვნით?

²³რად მიეცა ნათელი იმ კაცს, ვისი გზაც დაფარულია, და ვინც ალყაში მოიმწყვდია ღმერთმა?

²⁴რადგან ჩემს პურს ჩემი ოხვრა წინ უსწრებს, და ჩემი კვნესა წყალივით იღვრება.

²⁵რადგან მეწია შიში, რომელიც მაძრწუნებდა, და რაც მაშინებდა, ის მომივიდა.

²⁶ჩემთვის აღარც სიმშვიდეა, აღარც შვება, და არც მოსვენება. მოვიდა მშფოთვარება.”