Read სბს–სტოკჰოლმი 2001 იობი 30 Bible Online

იობი 30 - სბს–სტოკჰოლმი 2001 bible

იობი 30

¹“და ახლა დამცინიან ჩემზე უმცროსნი, რომელთა მამებსაც ჩემი ფარის ძაღლებშიც არ გავრევდი.

²რაღაში მინდა მათი ხელების ძალა? მათ ძალა გამოცლილი აქვთ.

³დუხჭირითა და შიმშილით ღონემიხდილნი გარბიან გვალვიან ტრამალებში, უდაბნოსა და ხრიოკებში.

⁴ნაცარქათამას წიწკნიან ჯაგებთან და კურდღლისცოცხას ფესვი მათი პურია.

⁵ხალხიდან აძევებენ და, როგორც ქურდს, ისე მიჰკივიან;

⁶აწყდებიან ხევ-ხუვებს, მიწის მღვიმეებს და კლდის ნაპრალებს.

⁷ბუჩქებს შორის ყროყინებენ სახედრებივით, ჯაგნარებში იყურებიან.

⁸ძენი უგუნურთა და ძენი უსახელოთა განიდევნენ ქვეყნიდან.

⁹ახლა გავხდი მათი სამღერელი და მათი საანდაზო.

¹⁰ვეზიზღები, გამირბიან და ჩემი სახის წინ ფურთხს არ ზოგავენ.

¹¹რადგან მან ახსნა ჩემი საბელი, პირწინ დამიგდეს ჩემი აღვირი.

¹²მარჯვნივ ბრბო აღმიდგა, ფერხნი განმირთხეს, ჩემს წინააღმდეგ მოასწორეს თავიანთი დამღუპველი გზები.

¹³მათ აანგრიეს ჩემი ბილიკი, ჩემს უიღბლობას უმართავენ ხელს, შემწეც არ უნდათ.

¹⁴თითქოს ფართე მოედანიაო, ქარიშხლით მოექანებიან.

¹⁵საშინელებანი დამატყდა თავს, ქარივით მიჰქრის ჩემი დიდება და ღრუბელივით გადავიდა ჩემი დღეკეთილობა.

¹⁶აწ ჩემში იღვრება ჩემი სული, მებღაუჭებიან ჩემი გაჭირვების დღეები.

¹⁷ღამ-ღამობით ძვლები მტეხავს, ხოლო ტკივილი, მე რომ მწიწკნის, არ მიამდება.

¹⁸დიდი ტანჯვით ვიხდი სამოსს, კვართის საყელოსავით მიჭერს.

¹⁹მისროლა ლაფში და დავემსგავსე მტვერსა და ნაცარს.

²⁰შველას გთხოვ და პასუხს არ მაძლევ. მე ვდგავარ და შენ თვალს არ მაცილებ.

²¹სასტიკი გახდი ჩემს მიმართ, შენი ხელის ძალითა მდევნი.

²²ქარზე შემომსვამ, მაიძულებ, გავინავარდო. და მაცამტვერებ ქარის ორომტრიალში,

²³ასეა, ვიცი, სიკვდილისკენ წამიყვან, და ყოველი ცოცხალის შესაკრებელი სახლისკენ.

²⁴ნანგრევებისკენ ხელს არვინ იწვდის, დაღუპვის პირას რომ მივა კაცი, მაშინღა ეღირსება შველას.

²⁵განა არ მიტირია ბედშავზე? სული არ შემწუხებია გაჭირვებულზე?

²⁶რადგან სიკეთის იმედი მქონდა და ბოროტება მოვიდა, ნათელს ველოდი და ბნელი მოვიდა,

²⁷გულ-ღვიძლი მიდუღს და არ ცხრება: ტანჯვა-წამების დღეები დამიდგა.

²⁸ჩაშავებული დავიარები, უმზეოდ; კრებულში ვდგავარ და შველას ვითხოვ.

²⁹ტურებს ძმად გავუხდი და მეგობრად სირაქლემებს.

³⁰კანი გამიშავდა და ძვლები მივარვარებს სიცხისაგან.

³¹გოდებად იქცა ჩემი ქნარი, და მოტირალთა ხმად ჩემი სალამური.”