Read სბს–სტოკჰოლმი 2001 იობი 34 Bible Online

იობი 34 - სბს–სტოკჰოლმი 2001 bible

იობი 34

¹და მიუგო ელიჰუმ და თქვა:

²სმინეთ, ბრძენნო, ჩემი სიტყვები, მცოდნენო, ყური დამიგდეთ!

³რადგან ყური გამოცდის სიტყვებს და სასა გემოს უგებს საჭმელს.

⁴ავირჩიოთ, რაც სამართლიანია. ჩვენს შორის ვიცოდეთ, რა არის კეთილი.

⁵რადგან იობმა თქვა: ‘მართალი ვარ და ღმერთმა წამართვა ჩემი სამართალი.

⁶ტყუილი ვთქვა ჩემს სამართალზე? მოუშუშებელია ჩემი იარა, თუმცა მე უდანაშაულო ვარ’

⁷ვინ არის იობის მსგავსი კაცი, დაცინვას წყალივით რომ სვამდეს?

⁸ავისმოქმედთა თაბუნს რომ ასდევდეს? რომ უკეთურ ხალხთან იაროს?

⁹რადგან მას ნათქვამი აქვს: ‘არაფრად არგია კაცს, რომ ღმერთს აამოს.’

¹⁰ამიტომ ისმინეთ ჩემი, კაცნო გულისხმიერნო! შორს იყოს ღმერთი ბოროტებისაგან და ყოვლადძლიერი უსამართლობისაგან!

¹¹რადგან საქმისამებრ მიუზღავს ადამიანს, და კაცს მისი გზისამებრ მიაგებს.

¹²ჭეშმარიტად, ღმერთი არ ბოროტობს და ყოვლადძლიერი არ ამრუდებს სამართალს!

¹³ვინ ჩააბარა მას მიწა? და ვინ მიანდო მას მთელი სამყარო?

¹⁴თუ თავისკენ მიაპყრობს თავის გულისყურს, უკანვე წაიღებს თავის სულსა და სუნთქვას,

¹⁵ერთიანად გაწყდება ყოველი ხორციელი და ადამიანი მტვრად მიიქცევა.

¹⁶და თუ გაგება გაქვს, მოისმინე ეს, ყური უგდე ჩემი სიტყვების ჩქამს!

¹⁷ნუთუ სამართლის მოძულე იგანმგებლებს? და ნუთუ ბრალს დასდებ ძალმოსილ მართალს?

¹⁸ვინც ეუბნება მეფეს: ‘არამზადავ!’ და დიდგვაროვანს: ‘უკეთურო!’;

¹⁹რომელიც მთავრებს არ მიჰკერძავს და მდიდარს ღარიბზე მეტად არ თვლის, რადგან ყველანი მის ხელთა ქმნილებანი არიან.

²⁰ისინი წამში იხოცებიან; შუაღამისას ტორტმანებს ხალხი და იღუპება, და წაიყვანენ და მოაშორებენ ძლიერს კაცის ხელის გარეშე,

²¹რადგან მისი თვალები კაცის გზებს დასცქერის და ხედავს მის ყოველ ნაბიჯს.

²²არ არის არც ბნელი და არც წყვდიადი, რომ იქ დაიმალოს ავისმოქმედი;

²³რადგან იგი კაცს არ უწესებს ვადას, რომ ღმერთთან სამსჯავროზე წავიდეს.

²⁴ის მუსრავს ძლიერთ განუკითხავად და სხვებს აყენებს მათ ნაცვლად,

²⁵რადგან ცნობს მათ ნამოქმედარს. ღამით დაამხობს მათ და შეიმუსრებიან;

²⁶როგორც უკეთურთ დალახვრავს, სხვათა თვალთაწინ.

²⁷ამიტომ განუდგნენ მას და არ შეიმეცნეს მისი გზები.

²⁸მასთან მიიტანეს ღატაკთა ღაღადი, და დაჩაგრულთა ღაღადი ესმის მას.

²⁹როცა ის დუმს, ვინ არის მისი ბრალმდებელი? როცა სახეს იფარავს, ვინ არის მისი მხილველი? ხალხისთვის იქნება ეს, თუ ერთი კაცისთვის?

³⁰რომ არ იმეფოს უღვთო ადამიანმა, ამ ხალხის მახეში გამბმელმა.

³¹ვინმეს თუ უთქვამს ღვთისათვის: ‘მე მოვიხადე სასჯელი, აღარ შევცოდავ,

³²შენ მასწავლე, რასაც ვერ ვხედავ. თუ უკეთურება ჩამიდენია, მეტს აღარ ვიზამ.

³³განა შენი განსჯით უნდა მიუზღავდეს იგი? როგორც შენ დაგიგმია, როგორც შენ აგირჩევია და არა მე. რაც იცი, ილაპარაკე.’

³⁴მეტყვიან გულისხმიერი კაცები და ბრძენი კაცები, მე რომ მისმენენ:

³⁵‘იობი უაზროდ ლაპარაკობს და მის სიტყვებს გონიერება აკლია.

³⁶ერთი ბოლომდე გამოიცდებოდეს იობი, ავკაცთა მსგავსად რომ პასუხობს!

³⁷რადგან თავის ცოდვას უმატებს ამბოხს, ხელს ხელზე ურტყამს ჩვენს შორის და სიტყვას ამრავლებს ღვთის წინააღმდეგ!”