Read სბს–სტოკჰოლმი 2001 იობი 37 Bible Online

იობი 37 - სბს–სტოკჰოლმი 2001 bible

იობი 37

¹“ამის გამოც ძრწის ჩემი გული, და ამოვარდა თავისი ბუდიდან.

²მოსმენით მოისმინეთ მისი ხმის გრგვინვა და გუგუნი, მისი პირიდან გამომავალი.

³მთელ ცისქვეშეთში აჭექებს მას და მისი ელვა ქვეყნიერების კიდეებს სწვდება.

⁴მის შემდეგ ხმა დაიჭექებს, დაიქუხებს დიდებულ ხმაზე, და არ შეწყვეტს ელვას, როცა ისმის მისი ხმა.

⁵გრგვინავს ღმერთი თავის საკვირველ ხმაზე, იქმს დიდ საქმეებს, რომელთა შეცნობაც ჩვენ არ ძალგვიძს.

⁶რადგან თოვლს ეუბნება: ‘დაეფინე მიწას!’ და წვიმის თქეშს მბრძანებლობს, და ძლიერ თავსხმას.

⁷იგი ბეჭდავს ყოველი ადამიანის ხელს, რათა იცოდეს ყველა კაცმა მისი ნამოქმედარი.

⁸მხეცი საფარველში მიდის და თავის ბუნაგში ივანებს.

⁹სამხრეთიდან გამოდის გრიგალი და ჩრდილოეთიდან - ყინვა.

¹⁰ღვთის სუნთქვა იძლევა ყინულს, და წყალთა სივრცე იყინება.

¹¹იგი სინოტივით ავსებს ქუფრ ღრუბელს, ღრუბელი ფანტავს მის ელვას.

¹²ისინი იცვლიან მიმართულებას, ბრუნავენ მისი განგებით, რათა აღასრულონ ყოველი, რასაც უბრძანებს მთელს ქვეყნიერებაზე.

¹³ან დასასჯელად, ან თავისი ქვეყნისთვის, ან წყალობისთვის გამოაჩენს მას.

¹⁴ყურად იღე ეს, იობ, დადექი და დააკვირდი ღვთის სასწაულებს.

¹⁵თუ იცი, როგორ განაგებს მათ ღმერთი, და როგორ გამოაშუქებს ელვას თავისი ღრუბლიდან?

¹⁶თუ იცი ქუფრ ღრუბელთა განფენილობის ამბავი, და სასწაულები ცოდნაში სრულისა?

¹⁷რა ათბობს შენს სამოსელს, როცა ქვეყანა მყუდროვდება სამხრეთის ქარში?

¹⁸თუ განართხავ ცას მასთან ერთად, მტკიცეს, ჩამოსხმულს სარკესავით?

¹⁹გვასწავლე, რა ვუთხრათ მას? ვერაფერს ვაწყობთ სიბნელის გამო.

²⁰თუ მოხსენდა მას, რომ მე ვლაპარაკობ? თუ თქვა ვინმემ, რომ ‘ჩემი ნათქვამი ეუწყება მას?’

²¹ახლა ვერავინ ხედავს ნათელს ცათაშინა მოკაშკაშეს, როცა ქარი გადაივლის, გააკრიალებს მათ.

²²ჩრდილოეთიდან მოდის ოქროს ციალი. ღვთის ირგვლივ საშინელი ბრწყინვალებაა.

²³ყოვლადძლიერი! ვერ ვწვდებით მას. დიდია ის ძალით, თავისი მსჯავრით და დიდი სიმართლით. არავის ჩაგრავს.

²⁴ამიტომ ეშინიათ მისი ადამიანებს, არც ერთ გულბრძენს ზედ არ უყურებს”.