Read სბს–სტოკჰოლმი 2001 იობი 39 Bible Online

იობი 39 - სბს–სტოკჰოლმი 2001 bible

იობი 39

¹“თუ იცი ჯიხვთა დაბადების ჟამი? თვალს თუ ადევნებ ფურ-ირემთა მშობიარობას?

²ნუთუ აღრიცხავ მათ თვეთა აღვსებას? და თუ იცი ჟამი მათი მოგებისა?

³ისინი ჩაიმუხლებენ, დაყრიან ნაშიერთ, შობის ტკივილისგან თავისუფლდებიან;

⁴კაჟდებიან მათი ნუკრები, ველად იზრდებიან, გადიან და აღარ უბრუნდებიან.

⁵ვინ გაუშვა კანჯარი ნებაზე? და ვინ ახსნა კანჯარს საკვრელი?

⁶რომელსაც მე სახლად ტრამალი მივეცი და სამყოფლად - მლაშობი?

⁷ის არად აგდებს ქალაქის გნიასს, არ ესმის მენახირის შეძახილები.

⁸მთებში საძოვრად დაეხეტება და ყოველგვარ სიმწვანეს დაეძებს.

⁹თუ ინებებს მარტორქა შენს სამსახურს? თუ გაათევს შენს ბაგაზე?

¹⁰მარტორქას სახნავში თუ შეაბამ აპეურით? თუ დაგიფარცხავს ველებს შენს უკან?

¹¹თუ დაენდობი მას, რაკი დიდია მისი ძალა? თუ მიანდობ სამუშაოს?

¹²თუ გწამს მისი, რომ თესლს დაგიბრუნებს და შენს კალოზე მოგიგროვებს?

¹³სირაქლემას ფრთა მხიარულად ფრიალებს თუ ყანჩას ნაკრტენი და ბუმბული?

¹⁴რადგან თავის კვერცხებს მიწაზე ტოვებს და მათ მტვერში ათბობს,

¹⁵და ავიწყდება, რომ ფეხით ჩაილეწება და ველის მხეცი გათელავს.

¹⁶ულმობლად ექცევა ის თავის ბარტყებს, თითქოს მისები არ ყოფილიყვნენ, თავისი ამაოდ გარჯა არად ენაღვლება.

¹⁷რადგან ღმერთმა დაავიწყა მას სიბრძნე და წილად არ არგუნა გონება.

¹⁸რაჟამს შეიმართება გასაფრენად, დასცინის ცხენსა და მის მხედარს.

¹⁹შენ მიეცი ცხენს ძლიერება? შენ შემოსე ფაფრით მისი კისერი?

²⁰შენ ახტუნებ მას კალიასავით? მისი მჭახე ჭიხვინი ზარდამცემია!

²¹მიწას თხრის ის ველზე და ხარობს ძლიერებით, გადის იარაღის შესაგებებლად.

²²შიშს დასცინის ის და არ კრთის და მახვილისგან პირს არ იბრუნებს.

²³მის თავზე ჩხრიალებს კაპარჭი ელავს შუბი და ჰოროლი.

²⁴შმაგად და მძვინვარედ ყლაპავს მიწას და არ სჯერა საყვირის ხმისა.

²⁵ბუკის ცემაზე ამბობს: ‘აჰა!’ და შორიდან იყნოსავს ბრძოლას, სარდალთა შეძახილსა და ყიჟინს.

²⁶შენი სიბრძნით არის, რომ ქორი ნავარდობს და სამხრეთისკენ შლის ფრთებს?

²⁷შენი ბრძანებით აღმა ფრენს არწივი და მაღლა იკეთებს თავის ბუდეს?

²⁸ის კლდეზე ბუდობს და ღამეს ათევს კლდის ქიმსა და სიმაგრეზე.

²⁹იქიდან ეძებს თავისთვის საზრდოს; მისი თვალები შორიდან ჭვრეტენ,

³⁰მისი მართვენი სისხლს სვამენ, და სადაც ლეშია, ისიც იქ გაჩნდება.”