Read სბს–სტოკჰოლმი 2001 იობი 8 Bible Online

იობი 8 - სბს–სტოკჰოლმი 2001 bible

იობი 8

¹და მიუგო ბილდად შუხელმა და თქვა:

²“როდემდე უნდა ლაპარაკობდე ამას? შენი პირის სიტყვები ამოვარდნილი ქარია!

³ნუთუ ღმერთი გაამრუდებს სამართალს და ყოვლადძლიერი გაამრუდებს სიმართლეს?

⁴თუ შენმა შვილებმა შესცოდეს მის წინაშე, მან ხელში ჩაუგდო ისინი მათსავე ურჯულოებას.

⁵შენ რომ ღმერთი გეძებნა და ყოვლადძლიერს შევედრებოდი,

⁶წრფელი რომ ყოფილიყავ, ახლა იფხიზლებდა შენთვის და აღგიდგენდა შენი სიმართლის ალაგს.

⁷და თუ შენი დასაწყისი მცირე იყო, შენი დასასრული დიდად გაიზრდება.

⁸აბა, ჰკითხე გარდასულ თაობას და ყურად იღე მამების ნაკვლევი.

⁹რადგან გუშინდელნი ვართ ჩვენ და არაფერი ვიცით, რადგან ჩრდილია ჩვენი დღეები ამ ქვეყანაზე.

¹⁰განა არ დაგმოძღვრავენ და არ გეტყვიან? და გულიდან არ ამოიღებენ სიტყვებს?

¹¹უჭყანტობოდ გარეშე თუ იზრდება ჭილი? უწყლოში თუ ამოდის ლერწამი?

¹²იგი ჯერ ნორჩია და მოუჭრელი, და მაინც ყველა ბალახზე ადრე ჭკნება.

¹³ასევეა ყველას ბილიკები, ვინც ღმერთს ივიწყებს. და უღვთოთა იმედი გაქარწყლდება.

¹⁴რადგან წარიკვეთება მისი სასო და მისი იმედი ობობას ქსელია.

¹⁵მიეყდნობა თავის სახლს და ვერ გაუძლებს, მოეჭიდება მას და ვერ დაიჭერს.

¹⁶ამწვანებულია იგი მზის გულზე, და ბაღნარზე გადმოშლილი აქვს ყლორტები.

¹⁷ქვების გროვაში ჩახლართულა მისი ფესვები, ქვის ლოდებში ჩაჭედილა.

¹⁸თუ ამოგლიჯეს თავისი ადგილიდან, უარყოფს მას: არასოდეს მინახიხარო.

¹⁹აჰა, ეს არის მისი გზის სიხარული და მიწიდან კი სხვა აღმოცენდება.

²⁰აი, ღმერთი არ მოიძულებს უმანკოს, და არ შეეწევა ბოროტმოქმედებს.

²¹კვლავ აგივსებს პირს სიცილით, და ბაგეებს აგივსებს ყიჟინით.

²²შენი მოძულენი სირცხვილით შეიმოსებიან და ურჯულოთა კარავი აღარ იქნება!”