Read სბს–სტოკჰოლმი 2001 ფსალმუნები 101 Bible Online

ფსალმუნები 101 - სბს–სტოკჰოლმი 2001 bible

ფსალმუნები 101

¹ლოცვა გლახაკისა, ოდეს იტანჯება და უფლის წინაშე გადმოღვრის თავის გულისნადებს. უფალო, ისმინე ჩემი ლოცვა, და ჩემი ღაღადისი შენთან მოვიდეს.

²ნუ დაფარავ შენს სახეს ჩემგან ჩემი გაჭირვების ჟამს, მომაპყარ ყური, რომელ დღესაც მოგიხმობ, მსწრაფლ მიპასუხე.

³რადგან გაქრნენ კვამლივით ჩემი დღეები და ჩემი ძვლები ვარვარებს, როგორც კოცონი.

⁴დაჭკნა ბალახივით და გახმა ჩემი გული, რადგან დამავიწყდა ჩემი პურის ჭამა.

⁵ჩემი კვნესის ხმისაგან მიჰკვრია ჩემი ძვლები ჩემს ხორცს.

⁶დავემსგავსე უდაბნოს ვარხვს, გავხდი ვითარცა ბუკიოტი ნანგრევებში.

⁷უძილო ვიქმენ და ვზივარ, ვითარცა ეული ჩიტი სახურავზე.

⁸ყოველდღე მლანძღავენ ჩემი მტრები, ჩემი განმაქიქებელნი მე მიფიცავენ;

⁹რადგან ნაცარი პურივით ვჭამე და ჩემი სასმელი ცრემლით შევაზავე

¹⁰შენი რისხვისა და გულისწყრომის გამო, რომ ამიყვანე და დამანარცხე.

¹¹ჩემი დღეები გადახრილი ჩრდილივითაა და მე ბალახივით ვხმები.

¹²შენ კი, უფალო, საუკუნოდ იარსებებ, შენი სახსენებელი - თაობიდან თაობამდე.

¹³შენ კი აღსდექ და შეიწყალე სიონი; რადგან ჟამია, როცა შეწყალებ მას, რადგან მოვიდა საათი!

¹⁴რადგან უყვართ შენს მორჩილებს მისი ქვები და მისი მიწა ენანებათ.

¹⁵შეეშინდებათ წარმართთ უფლის სახელისა და ყველა ამქვეყნიერ მეფეს შენი დიდებისა.

¹⁶რადგან აღაშენებს უფალი სიონს, გამოცხადდება თავისი ღირსებით,

¹⁷მოხედავს ლოცვას გულმოდრეკილთა და არ დაამცირებს მათს ლოცვას.

¹⁸დაიწერება ეს მომავალი თაობისათვის, და ხალხი, რომელიც გაჩნდება, ადიდებს უფალს.

¹⁹რადგან მან გადმოხედა თავისი წმიდის სიმაღლიდან, რადგან უფალმა ციდან მოიხილა ქვეყანა,

²⁰რომ მოესმინა კვნესა პატიმრისა, გაეთავისუფლებინა სიკვდილის ძენი.

²¹რათა აუწყონ სიონს სახელი უფლისა და ქება მისი იერუსალიმს,

²²როცა შეგროვდებიან ხალხები ერთად და სამეფონი უფლის სამსახურებლად.

²³გაასავათა გზაში ჩემი ძალა, შეამცირა დღენი ჩემნი.

²⁴ვეტყვი: “ღმერთო ჩემო! ნუ მომტაცებ ჩემს დღეებს ნახევარს! თაობიდან თაობამდეა შენი წლები.

²⁵უწინ დედამიწა დააფუძნე, და შენთა ხელთა ნასაქმარია ზეცა.

²⁶ისინი ჩაივლიან, შენ კი იარსებებ; ყველანი ტანსაცმელივით დაძველდებიან, სამოსელივით გამოიცვლი მათ და გაქრებიან.

²⁷შენ კი იგივე ხარ, და შენი წლები არ დაილევიან!

²⁸შენი მორჩილის ძენი დამკვიდრდებიან და შთამომავალი მათი შენს წინაშე წარიმართება.”