Read სბს–სტოკჰოლმი 2001 ფსალმუნები 103 Bible Online

ფსალმუნები 103 - სბს–სტოკჰოლმი 2001 bible

ფსალმუნები 103

¹აკურთხე, სულო ჩემო, უფალი! უფალო, ღმერთო ჩემო, დიდი ხარ ფრიად; მშვენებითა და ბრწყინვალებით ხარ შემოსილი.

²გაკრავს სინათლე სამოსელივით, განგიფენია ცა კარავივით,

³წყლებზე ააგო ზესართულები, მისი ღრუბლები გაიხადა ეტლად თავისთვის, მიმოდიოდა ქარის ფრთებზე.

⁴რომელმაც შექმნა ქარები თავის მაცნეებად, ცეცხლი და ალი - თავის მსახურებად.

⁵დააფუძნა დედამიწა თავის საძირკვლებზე, არ შეირყევა უკუნისამდე.

⁶უფსკრულით, როგორც სამოსელით, დაფარე იგი; მთებზე დგას წყლები;

⁷მაგრამ შენი რისხვით მიედინებიან, შენი ქუხილის ხმაზე ილტვიან.

⁸ადიან მთებზე, ჩადიან ველებზე, იმ ადგილას, სადაც დააფუძნე.

⁹საზღვარი დადე - წყლებს ვერ გადალახავენ, ვერც დაბრუნდებიან დედამიწის დასაფარავად.

¹⁰გაუშვი წყაროები ხევებში, რომ მთებს შორის იდინონ;

¹¹დალიოს ყოველმა მხეცმა ველისამ, მოიკლან კანჯრებმა წყურვილი.

¹²მათზე ცის ფრინველნი დამკვიდრებულან, რტოებიდან გამოსცემენ ხმას.

¹³რწყავს მთებს თავისი ზესართულებიდან; შენთა საქმეთა ნაყოფით ძღება ქვეყანა.

¹⁴აღმოაცენებ ბალახს პირუტყვისათვის და მცენარეულობას - ადამიანის სამსახურებლად, რათა გამოიღოს პური მიწიდან.

¹⁵და ღვინომ გაამხიარულოს გული კაცისა, საცხებელმა გააბრწყინოს სახე მისი, და პურმა შეამტკიცოს გული კაცისა.

¹⁶გაძღნენ ხენი უფლისანი და კედრები ლიბანისა, მან რომ დანერგა.

¹⁷რომ იქ ჩიტებმა დაიდონ ბუდე: კვიპაროსები ყარყატის სახლია.

¹⁸მთანი მაღალნი - ქურციკისათვის, კლდენი - კურდღელთა თავშესაფარი.

¹⁹შექმნა მთვარე ჟამთათვის; მზემ იცის თავისი დასავალი.

²⁰განავრცობ ბნელს და იქნება ღამე, მაშინ ამოძრავდებიან ყოველნი ნადირნი ტყისა.

²¹ლომის ბოკვერები ბრდღვინავენ ნადავლისათვის და მოითხოვენ ღმერთისაგან თავიანთ საჭმელს.

²²ამობრწყინდა მზე - შეგროვდებიან და თავიანთ ბუნაგებში დაწვებიან.

²³გავა ადამიანი, რათა იშრომოს და იმუშაკოს მწუხრის ჟამამდე.

²⁴რაოდენ მრავალია საქმენი შენი, უფალო! ყოველივე სიბრძნით შეგიქმნია, სავსეა დედამიწა შენი მონაგარით

²⁵ეს ზღვაა, დიდი და უკიდეგანო, იქ ქვეწარმავალია ურიცხვი, მხეცნი - მცირენი დიდებთან ერთად.

²⁶იქ ხომალდები დადიან; ლევიათანი - ეს შენ შექმენი მასში გასართობად.

²⁷ყველა შენგან მოელის საზრდოს მიცემას თავთავის დროზე.

²⁸მისცემ მათ - აიღებენ, გახსნი შენს ხელს - გაძღებიან სიკეთით.

²⁹დაფარავ შენს სახეს - შეძრწუნდებიან, სულს წაართმევ - დაიხოცებიან და თავიანთ მიწა-მტვრად მიიქცევიან;

³⁰გაუშვებ შენს სულს - წარმოიქმნებიან, და განაახლებ პირს მიწისას.

³¹იყოს დიდება უფლისა უკუნისამდე! იხარებდეს უფალი თავის ქმნილებაზე!

³²დახედავს დედამიწას და ის აცახცახდება, შეეხება მთებს და აკვამლდებიან.

³³ვუგალობებ უფალს ჩემი სიცოცხლის მანძილზე, ვუგალობებ ჩემს ღმერთს, ვიდრე ვარსებობ.

³⁴ეამოს მას ჩემი გალობა! მე გავიხარებ უფალში.

³⁵გაქრებიან ცოდვილნი ქვეყნიერებიდან და ბოროტნი აღარ იქნებიან! აკურთხე, სულო ჩემო, უფალი! ალელუია!