Read სბს–სტოკჰოლმი 2001 ფსალმუნები 104 Bible Online

ფსალმუნები 104 - სბს–სტოკჰოლმი 2001 bible

ფსალმუნები 104

¹ადიდეთ უფალი, მოუხმეთ მის სახელს, აუწყეთ ერებს საქმენი მისნი.

²აქეთ იგი, უგალობეთ მას, ილაპარაკეთ ყველა მის სასწაულზე!

³განდიდდით მისი წმიდა სახელით! გამხიარულდეს გული უფლის მაძიებელთა.

⁴ეძიეთ უფალი და ძლიერება მისი, ეძიეთ პირი მისი მარადის!

⁵გაიხსენეთ მისი ნამოქმედარი სასწაულები, საოცრებანი და სამართალნი მისთა ბაგეთა!

⁶თესლო აბრაამისა, მისი მორჩილისა, ძენო იაკობისა, რჩეულნო მისნო!

⁷ის, უფალი, ღმერთი არის ჩვენი; მთელ ქვეყნიერებაზეა სამართალნი მისნი.

⁸ახსოვს მარადის აღთქმა თავისი, სიტყვა, რომ დაადგინა ათას თაობამდე,

⁹რომელიც დაუდო აბრაამს, და თავისი ფიცი ისაკთან.

¹⁰დაუდგინა იაკობს იგი წესად, და ისრაელს - სამარადჟამო აღთქმად.

¹¹უთხრა: “შენ მოგცემ ქანაანის ქვეყანას წილად თქვენი მემკვიდრეობისა.”

¹²როცა ისინი თითზე ჩამოსათვლელნი იყვნენ, ცოტანი და იქაური ხიზნები,

¹³და უნდა ევლოთ ერთი ერიდან მეორესთან, ერთი სამეფოდან მეორესთან.

¹⁴არავის ანებებდა მათს დაჩაგვრას, და ამუნათებდა მათ გამო მეფეებს:

¹⁵“არ შეეხოთ ჩემს ცხებულებს და ჩემს წინასწარმეტყველებს არ უბოროტოთ.”

¹⁶და მოუხმო შიმშილს დედამიწაზე და ყოველი სახსარი პურისა შემუსრა.

¹⁷გაგზავნა მათ წინ კაცი, მონად გაიყიდა იოსები.

¹⁸გატანჯეს ბორკილებით ფერხნი მისნი, რკინა მისწვდა მის სულს.

¹⁹ვიდრე აუსრულდებოდა ნათქვამი მისი, უფლის სიტყვამ გამობრძმედა იგი.

²⁰გაგზავნა მეფემ და გაათავისუფლა იგი; განმგებელი ხალხებისა გამოიხსნა.

²¹დააყენა თავისი სახლის ბატონად და განმგებლად მთელი თავისი მონაგარისა.

²²რათა მოქცეოდა მის მთავრებს თავისი სურვილისამებრ და განებრძნო მოხუცებულნი მისნი.

²³და მოვიდა ისრაელი ეგვიპტეში, და ხიზანი გახდა იაკობი ქამის ქვეყანაში.

²⁴და ააღორძინა ღმერთმა მისი ერი ფრიად და გაამრავლა მის მტრებზე მეტად.

²⁵მოაქცია მათი გული უფლის ერის შესაძულებლად, მის მორჩილთა მიმართ სივერაგის განსაზრახველად.

²⁶გაგზავნა მოსე, მსახური თვისი, აარონი, რომელიც ამოირჩია.

²⁷დაამკვიდრეს მათში მისი სასწაულები, და საოცრებანი მოიმოქმედეს ქამის ქვეყანაში.

²⁸მიავლინა წყვდიადი და იქმნა ღამე, და არ გაურჩებულან მის სიტყვაზე.

²⁹გადააქცია მათი წყლები სისხლად და დახოცა მათი თევზები.

³⁰აავსო მათი ქვეყანა მყვარით, მეფეთა პალატებიც კი.

³¹თქვა და მოვიდნენ მწერები, მკბენარი - მთელს მათ საზღვრებში.

³²წვიმის მაგიერ სეტყვა წარმოუგზავნა მათ, ალმოდებული ცეცხლი - მათ ქვეყანას.

³³მოსრა ვაზი მათი და ლეღვი მათი, და დალეწა ხეები მათ საზღვრებში.

³⁴თქვა და მოვიდა კალია და მგრაგნელი აურაცხელი,

³⁵და გადაჭამეს მთელი ბალახი მათ ქვეყანაში, და გადასანსლეს მთელი ნაყოფი მათი მინდვრისა.

³⁶და მოსრა ყოველი პირმშო მათ ქვეყანაში, დასაბამი მთელი მათი ძალისა.

³⁷და გამოიყვანა ისინი ვერცხლით და ოქროთი, და მათ ტომებში არავინ იყო უძლური.

³⁸გაუხარდა ეგვიპტეს მათი გამოსვლა, რადგან თავს დაატყდათ მათ შიში.

³⁹გადააფარა ღრუბელი საჩრდილოდ და ცეცხლი - ღამის გასანათებლად.

⁴⁰ითხოვეს და გაუგზავნა მწყერი და ზეციური პურით გააძღო ისინი.

⁴¹გახსნა კლდე და გადმოდინდა წყალი, წავიდა უდაბნოში მდინარედ.

⁴²რადგან გაიხსენა თავისი წმიდა სიტყვა, თავისი მორჩილის - აბრაამის - მიმართ.

⁴³გამოიყვანა თავისი ხალხი სიხარულით, რჩეულნი თვისნი ზარ-ზეიმით.

⁴⁴და მისცა მათ წარმართთა ქვეყნები, და ნაჯაფი ერებისა დაიმკვიდრეს მათ.

⁴⁵რათა დაიცვან წესები მისი და მის კანონებს გაუფრთხილდნენ. ალელუია!