Read სბს–სტოკჰოლმი 2001 ფსალმუნები 105 Bible Online

ფსალმუნები 105 - სბს–სტოკჰოლმი 2001 bible

ფსალმუნები 105

¹ალელუია! ქებით შემოსეთ უფალი, რადგან კეთილია, წყალობა მისი მარადიულია!

²ვის ძალუძს ილაპარაკოს უფლის სიძლიერე, სასმენელ ქმნას მისი ქება-დიდება?

³ნეტარ არიან სამართლის დამცველნი და სიმართლის მოქმედნი ყოველ ჟამს!

⁴გამიხსენე, უფალო, შენი ხალხისადმი კეთილგანწყობილებისას, მომხედე შენმიერი შველით,

⁵რათა ვიხილო სიკეთე შენთა რჩეულთა, გავიხარო შენი ერის სიხარულით, და ვიქადო შენს სამკვიდროსთან ერთად.

⁶შევცოდეთ ჩვენს მამებთან ერთად, სიმრუდე და ბოროტება ჩავიდინეთ.

⁷ჩვენმა მამებმა ეგვიპტეში ვერ შეიგნეს შენი სასწაულები, არ გაიხსენეს შენი მრავალი წყალობა და აგიმხედრდნენ ზღვაზე, მეწამულ ზღვაზე.

⁸მაგრამ მან იხსნა თავისი სახელის გულისათვის, რათა გაეგოთ ძლიერება მისი.

⁹და შეუტია მეწამულ ზღვას და დაშრა, და წაიყვანა ისინი უფსკრულებში, როგორც უდაბნოში.

¹⁰და იხსნა მოძულის ხელიდან და გადაარჩინა მტრის ხელიდან.

¹¹წყალმა დაფარა მათი მტრები, ერთი მათგანიც არ გადარჩენილა.

¹²და ირწმუნეს სიტყვანი მისნი, იმღერეს მისი ქება.-

¹³აჩქარდნენ, დაივიწყეს საქმენი მისნი, არ დაელოდნენ მის რჩევას.

¹⁴და აჰყვნენ გულისთქმას უდაბნოში და გამოსცადეს ღმერთი უკაცრიელ ადგილას.

¹⁵და შეუსრულა თხოვნა მათი, და მოუვლინა სიმჭლევე მათ სულებს.

¹⁶და შური აღეძრათ მოსეს მიმართ ბანაკში, უფლის წმიდის აარონის მიმართ.

¹⁷გაიპო მიწა და ჩაყლაპა დათანი, და დაფარა ხროვა აბირამისა.

¹⁸და მოედო ცეცხლი მათ ხროვას, ალი მოეკიდა ბოროტებს.

¹⁹გააკეთეს ხბო ხორებთან და თაყვანი სცეს ჩამოსხმულ კერპს.

²⁰და გაცვალეს თავიანთი დიდება ბალახის მძოველ ხარის გამოსახულებაში.

²¹დაივიწყეს ღმერთი, თავიანთი მხსნელი, დიდთა საქმეთა მოქმედი ეგვიპტეში.

²²საოცრებანი ქამის ქვეყანაში, საშინელებანი მეწამულ ზღვაზე.

²³დათქმული ჰქონდა მათი მოსპობა, რომ მოსე, მისი რჩეული, არ დამდგარიყო ნაპრალთან მის წინაშე, რათა გაებრუნებინა რისხვა მისი, და აღარ მოესრა ისინი.-

²⁴მათ დაიწუნეს ქვეყანა სასურველი, აღარ ირწმუნეს სიტყვები მისი.

²⁵დრტვინავდნენ თავიანთ ბანაკებში, არ უსმენდნენ უფლის ხმას.

²⁶მაშინ ზეაღმართა თავისი ხელი, რომ დაეხოცა ისინი უდაბნოში;

²⁷და გაეფანტა მათი ნაშიერი ხალხებში და განებნია ისინი ქვეყნებში.-

²⁸დაუკავშირდნენ ბაყალ-ფეღორს და ჭამეს მკვდარი [ღმერთების] შესაწირავი.

²⁹განარისხეს თავიანთი მოქმედებით; და თავს დაატყდათ მომსვრელი სენი.

³⁰წამოდგა ფინხასი და ილოცა, და შეჩერდა მომსვრელი სენი.

³¹ჩაეთვალა მას სიმართლედ თაობიდან თაობამდე, სამარადჟამოდ.

³²გააჯავრეს მერიბის წყალზე და დაისაჯა მოსე მათ გამო.

³³რადგანაც სული გაუმწარეს, და გამოთქვა თავისი ბაგეებით.-

³⁴არ მოსპეს ერები, უფალმა რომ უთხრა მათ.

³⁵აირივნენ წარმართებში და შეისწავლეს მათი საქმეები.

³⁶ემსახურებოდნენ მათ კერპებს, რომლებიც მახედ გადაიქცნენ მათთვის.

³⁷შესწირეს თავიანთი ძენი და თავიანთი ასულნი ბოროტ სულებს.

³⁸დაღვარეს სისხლი უცოდველი, თავიანთ ძეთა და ასულთა სისხლი, რომელიც შესწირეს ქანაანის კერპებს, და შეირყვნა ქვეყანა სისხლით.

³⁹შეიბილწნენ თავიანთი საქმეებით და იმრუშეს თავიანთი მოქმედებით.

⁴⁰მაშინ აღეგზნო რისხვა უფლისა თავის ერზე და შესძაგდა მას სამკვიდრო თვისი.

⁴¹და ხელში ჩაუგდო ისინი ხალხებს და გაბატონდნენ მათზე მათი მოძულენი.

⁴²ავიწროებდნენ მათ მტრები, და მოიდრიკნენ მათ ხელქვეით.-

⁴³მრავალგზის იხსნა ისინი, მაგრამ ისინი აბრაზებდნენ საკუთარი ზრახვებით, და მდაბლდებოდნენ ბრალით.

⁴⁴იხილა მათი გაჭირვება, როცა მოისმინა მათი ღაღადისი.

⁴⁵გაუხსენა აღთქმა თავისი და ანუგეშა თავისი მრავალმოწყალეობით.

⁴⁶აღვიძებდა მათდამი თანაგრძნობას ყველა მათი დამტყვევებლის წინაშე.-

⁴⁷გვიხსენი, უფალო, ღმერთო ჩვენო, და გამოგვკრიბე წარმართთაგან, რათა ვადიდოთ შენი წმიდა სახელი, ვიამაყოთ შენი ქება-დიდებით!

⁴⁸კურთხეულ არის უფალი, ღმერთი ისრაელისა, ამიერიდან და უკუნისამდე! და თქვას მთელმა ხალხმა: “ამინ!” ალილუია!