Read სბს–სტოკჰოლმი 2001 ფსალმუნები 106 Bible Online

ფსალმუნები 106 - სბს–სტოკჰოლმი 2001 bible

ფსალმუნები 106

¹ადიდეთ უფალი, რადგან კეთილია, რადგან უკუნისამდეა წყალობა მისი!

²იტყვიან დახსნილნი უფლის მიერ, რომელმაც იხსნა ისინი მტრის ხელიდან.

³და ქვეყნებიდან გამოკრიბა ისინი - აღმოსავლეთიდან და დასავლეთიდან, ჩრდილოეთიდან და ზღვიდან,

⁴რომელთაც აებნათ უკაცრიელ უდაბნოში გზა, დაბა ვერ ჰპოვეს სამკვიდრებელი;

⁵შიოდათ, სწყუროდათ კიდეც, სული ებინდებოდათ.

⁶შეჰღაღადეს უფალს თავიანთი გაჭირვების ჟამს და გაჭირვებიდან იხსნა ისინი.

⁷და დააყენა ისინი სწორ გზაზე, რომ წასულიყვნენ სამკვიდრებელი ქალაქისაკენ,-

⁸დაე, უქონ უფალს წყალობა მისი და საოცრებანი მისნი ადამის ძეთა მიმართ,

⁹რადგან გააძღო სული მწყურვალი, და სული მშიერი აავსო სიკეთით!

¹⁰მსხდომარენი ბნელში და სიკვდილის წყვდიადში, ტყვენი ტანჯვისა და ბორკილისა,

¹¹რადგან ეურჩებოდნენ ღმერთის მცნებებს და უზენაესის რჩევას უგულებელყოფდნენ.

¹²მოდრიკა ჯაფით მათი გული, ეცემოდნენ და შემწე არ ჰყავდათ.

¹³შეჰღაღადეს უფალს თავიანთი გაჭირვების ჟამს და ურვიდან იხსნა ისინი.

¹⁴გამოიყვანა ბნელიდან და სიკვდილის წყვდიადიდან, და მათი ბორკილები დაწყვიტა,-

¹⁵დაე, უქონ უფალს წყალობა მისი და საოცრებანი მისნი ადამის ძეთა მიმართ.

¹⁶რადგან შემუსრა ბჭენი რვალისა და ურდულნი რკინისა დაფშვნა.

¹⁷ბრიყვები თავიანთი უკანონო გზებისა და ცოდვებისთვის იტანჯებოდნენ.

¹⁸ყოველგვარი საჭმელი შეიზიზღა მათმა სულმა და სიკვდილის ბჭეს მიუახლოვდნენ.

¹⁹შეჰღაღადეს უფალს თავიანთი გაჭირვების ჟამს და ურვიდან იხსნა ისინი.

²⁰მოუვლინა სიტყვა თვისი და განკურნა ისინი, და იხსნა საფლავებიდან.

²¹დაე, უქონ უფალს წყალობა მისი და საოცრებანი მისნი ადამის ძეთა მიმართ.

²²შესწირონ შესაწირავები ქებისა და ილაპარაკონ მის საქმეებზე გალობით!

²³ზღვაში ხომალდებით გამგზავრებულებმა, დიდ წყლებზე საქმის მკეთებლებმა,

²⁴რომელთაც ნახეს საქმენი უფლისა და საოცრებანი მისნი სიღრმეებში.

²⁵ის იტყვის და ამოვარდება ქარიშხალი, და ზეაღიმართებიან ზვირთები,

²⁶ავლენ ცამდე, შთავლენ უფსკრულში, სული მათი განსაცდელში დაილევა.

²⁷წრიალებენ და ირყევიან, ვითარცა მთვრალი, და მთელი მათი სიბრძნე დაინთქა.

²⁸და შეჰღაღადეს უფალს თავიანთი გაჭირვების ჟამს და ურვიდან გამოიყვანა.

²⁹დააწყნარებს ზღვის ღელვას და დადუმდებიან მისი ტალღები.

³⁰გამხიარულდებიან, რადგან მიწყნარდნენ; და წაუძღვება ნანატრ ადგილას,-

³¹დაე, უქონ უფალს წყალობა მისი და საოცრებანი მისნი ადამის ძეთა მიმართ,

³²დაე, აღამაღლონ ხალხის კრებულში და მოხუცებულთა შესაკრებელში ხოტბა შეასხან.

³³გადააქცევს მდინარეებს უდაბნოდ, წყაროს წყლებს - ურწყულად.

³⁴ნაყოფიერ მიწას - ბიცად, მის მკვიდრთა უკეთურების გამო.

³⁵გადააქცევს უდაბნოს წყალუხვ ტბად და გამოფიტულ მიწას - წყაროს წყლად.

³⁶დაასახლებს იქ მშიერთ, და დააფუძნებენ ისინი დასახლებულ ქალაქს;

³⁷დათესავენ მინდვრებს და გააშენებნ ვენახს, და უხვ ნაყოფს მოიწევენ;

³⁸აკურთხებს მათ და გამრავლდებიან ფრიად, და მათ პირუტყვს არ შეამცირებს.

³⁹და დაცოტავდებიან ისინი და მოიდრიკებიან ძვირთა და სალმობათა გასაჭირისგან.

⁴⁰სირცხვილს დაატეხს მთავრებს და ახეტიალებს უგზო-უკვლოდ;

⁴¹ნაცვლად კი გამოიყვანს ღარიბს სიღატაკიდან და მოაშენებს ცხვრის ფარასავით მის შთამომავალს.

⁴²ნახავენ წრფელნი და გაიხარებენ, და ყოველმა ურჯულოებამ აიკრას პირი.

⁴³ვინც ბრძენია, დაიცავს ასე და გულისხმაჰყოვს უფლის წყალობას.