Read სბს–სტოკჰოლმი 2001 ფსალმუნები 108 Bible Online

ფსალმუნები 108 - სბს–სტოკჰოლმი 2001 bible

ფსალმუნები 108

¹გუნდის ლოტბარს. დავითის ფსალმუნი. ღმერთო ჩემი დიდებისა, ნუ დადუმდები.

²რადგან პირი ბოროტისა და პირი მზაკვრისა გაიხსნა ჩემს წინააღმდეგ. მელაპარაკებიან ცბიერი ენით.

³სიძულვილის სიტყვებით გარს შემომერტყნენ და უმიზეზოდ მეომებიან.

⁴ჩემი სიყვარულის წილ დამემტერნენ, მე კი ვლოცულობ.

⁵მომაგეს ბოროტი კეთილის წილ და სიძულვილი - ჩემი სიყვარულის წილ.

⁶დაადგინე ბოროტი მასზე, და ბრალმდებელი დადგეს მის მარჯვნივ.

⁷განკითხვისას გამოვიდეს მტყუანი, და მისი ლოცვა ცოდვად შეირაცხოს.

⁸იყოს დღეები მისი მცირე, და მისი ქონება სხვამ მოიხვეჭოს.

⁹დარჩნენ მისი შვილები ობლად და მისი ცოლი - ქვრივად.

¹⁰იხეტიალონ მისმა შვილებმა და იმათხოვრონ, და ითხოვდნენ პურს თავიანთი ნანგრევებიდან.

¹¹მოვალემ მიითვისოს, რაც გააჩნია, და წარუტაცონ უცხოებმა ნაჯაფი მისი.

¹²ნუ ეყოლება მოწყალე, და ნუ შეიწყალებენ მის ობლებს.

¹³გახდეს მისი შთამომავლი მოსასვრელი, შემდგომ თაობაში წაიშალოს მათი სახელი.

¹⁴გაუხსენდეს ბრალი მისი მამებისა უფლის წინაშე, და ცოდვა მისი დედისა ნუ წაიშლება.

¹⁵იყვნენ ღმერთის თვალწინ მუდამ, და მოსპობს ქვეყნიერებიდან მათ სახსენებელს,

¹⁶იმისათვის, რომ არ გახსენებია წყალობის ქმნა, და დევნიდა ღარიბ-ღატაკსა და გულდაჩაგრულს მოსაკლავად.

¹⁷და შეიყვარა წყევლა - მასვე მიუვა; არ ისურვა კურთხევა - განშორდება მას.

¹⁸და შეიმოსება წყევლით, როგორც სამოსლით, და შევა წყევლა, როგორც წყალი, მის შიგანში, და როგორც ზეთი - მის ძვლებში.

¹⁹იყოს მისთვის, ვითარცა სამოსელი, რომელსაც იცვამს, და ვითარცა სარტყელი, მუდამ რომ გარს ირტყამს.

²⁰ასეთია მისაგებელი უფლისა ჩემს მაბეზღართა და ჩემს სულზე ავის მთქმელთა მიმართ,

²¹ხოლო შენ, უფალო, ღმერთო ჩემო, იმოქმედე ჩემს მიმართ შენი სახელის გულისათვის, რადგან კარგია წყალობა შენი; გადამარჩინე,

²²რადგან ღარიბ-ღატაკი ვარ მე და გული ჩემი შეძრწუნდა გვამსა ჩემსა.

²³ვითარცა ჩრდილი, გადახრის ჟამს, დავილიე, ვეხეთქებოდი აქეთ-იქით კალიასავით.

²⁴მუხლნი ჩემნი დაუძლურდნენ მარხვისაგან, ზეზეურად ჩამოვხმი;

²⁵და შევიქენ მათი სალანძღავი; თავს აქნევდნენ ჩემი შემხედვარენი.

²⁶შემეწიე, უფალო, ღმერთო ჩემო! მიხსენი შენი წყალობით.

²⁷დაე, გაიგონ, რომ შენი ხელია ეს, რომ შენ მოიმოქმედე ეს, უფალო.

²⁸ისინი დამწყევლიან და შენ მაკურთხებ; აღმიდგებიან და შერცხვებიან, და მორჩილი შენი გაიხარებს.

²⁹შეიმოსონ ჩემი მაბეზღარნი გაწბილებით და ქურქივით წამოისხან თავიანთი სირცხვილი.

³⁰ხმამაღლა შევაქებ უფალს ჩემი პირით, და მრავალთა შორის ვადიდებ მას,

³¹რადგან გვერდით დაუდგება ღატაკს, რათა იხსნას მისი სულის განმსჯელთაგან.