Read სბს–სტოკჰოლმი 2001 ფსალმუნები 131 Bible Online

ფსალმუნები 131 - სბს–სტოკჰოლმი 2001 bible

ფსალმუნები 131

¹გალობა აღსავალთა. გაუხსენე დავითს, უფალო, ყოველი ურვა მისი.

²როგორც შეჰფიცა უფალს, აღთქმა დაუდო იაკობის ძლიერს:

³“არ შევალ ჩემი სახლის კარავში, არ ავალ ჩემს საწოლ-სარეცელზე,

⁴არ მივცემ ძილს ჩემს თვალებს და რულს ჩემს წამწამებს,

⁵ვიდრე არ ვიპოვიდე ადგილს უფლისათვის, სადგომებს იაკობის ძლიერისათვის.”

⁶აჰა, გვესმა მასზე, რომ ეფრათაშია; ვიპოვეთ იგი იაყარის ველზე!

⁷“მივიდეთ მის სადგომში, თაყვანი ვცეთ მის ფერხთა საყრდენს!

⁸აღსდექ, უფალო, განსასვენებლად შენდა, შენა და კიდობანი შენი ძლიერებისა!

⁹შენი მღვდელნი შეიმოსონ სიმართლით და შენმა წმიდებმა იმხიარულონ.”

¹⁰შენი მორჩილის - დავითის - გულისათვის ნუ უკუაგდებ შენი ცხებულის სახეს.

¹¹შეჰფიცა უფალმა დავითს ჭეშმარიტად, არ გადაუხვევს მისგან: “ნაყოფისაგან შენი მუცლისა დავსვამ შენს ტახტზე!

¹²თუ დაიცავენ შენი ძენი ჩემს აღთქმას და ჩემს მოწმობებს, რომელთაც ვასწავლი მათ, მათი შვილებიც უკუნისამდე დასხდებიან შენს ტახტზე.”

¹³რადგან ამოირჩია უფალმა სიონი, ისურვა სამკვიდრებლად თავისთვის.

¹⁴“ეს არის ჩემი განსასვენებელი უკუნისამდე, აქ დავსახლდები, რადგან ვისურვე იგი.

¹⁵საზრდოს მისას კურთხევით ვაკურთხებ, მის ღარიბებს გავაძღებ პურით.

¹⁶მის ღვთისმსახურთ შევმოსავ შეწევნით და წმიდები მისნი სიხარულით გაიხარებენ.

¹⁷აქ აღმოვაცენებ დავითის რქას, გავამზადებ სინათლეს ჩემი ცხებულისათვის.

¹⁸მის მტრებს შევმოსავ სირცხვილით და მასზე იბრწყინებს გვირგვინი მისი!”