Read სბს–სტოკჰოლმი 2001 ფსალმუნები 134 Bible Online

ფსალმუნები 134 - სბს–სტოკჰოლმი 2001 bible

ფსალმუნები 134

¹ალელუია! ადიდეთ სახელი უფლისა! ადიდეთ, მორჩილნო უფლისა,

²რომელნიც დგახართ უფლის სახლში, ეზოებში ჩვენი ღმერთის სახლისა!

³ადიდეთ უფალი, რადგან კეთილია უფალი; უგალობეთ მის სახელს, რადგან სასურველია!

⁴რადგან იაკობი ამოირჩია თავისთვის უფალმა, ისრაელი - თავის წარჩინებულად.

⁵რადგან ვიცოდი, რომ დიდია უფალი; და უფალი ჩვენი ყველა ღმერთზე დიდია.

⁶ყოველივე, რაც სურდა, მოიმოქმედა უფალმა, ცაში და ქვეყანაზე, ზღვებზე და ყოველ უფსკრულში.

⁷ამოჰყავს ღრუბლები ქვეყნის კიდით კიდემდე, ელვებს წვიმად აქცევს, გამოჰყავს ქარი თავისი საცავებიდან.

⁸მან მოსრა პირმშო ეგვიპტისა - ადამიანიდან პირუტყვამდე.

⁹მოავლინა ნიშნები და სასწაულები შენს შორის, ეგვიპტევ, ფარაონისა და მის მსახურეთა წინააღმდეგ.

¹⁰მან მოსრა მრავალი თესლ-ტომი და დახოცა ძლიერი მეფენი:

¹¹სიხონი - მეფე ამორეველთა, ყოგი - მეფე ბაშანისა, და ყველა მეფე ქანაანისა.

¹²და მისცა მათი ქვეყანა სამკვიდროდ, სამკვიდროდ ისრაელს - თავის ერს.

¹³უფალო, შენი სახელი მარადიულია, უფალო, შენი სახსენებელი თაობიდან თაობამდეა.

¹⁴რადგან განიკითხავს უფალი თავის ერს და თავის მორჩილთ შეივრდომებს.

¹⁵წარმართთა კერპები ვერცხლი და ოქროა, ადამიანის ნახელავი.

¹⁶პირი აქვთ და ვერ ლაპარაკობენ, თვალები აქვთ და ვერ ხედავენ;

¹⁷ყურები აქვთ და ვერ ისმენენ, არცა აქვთ სუნთქვა მათ პირებს.

¹⁸მათი მსგავსნი იქნებიან მათი გამკეთებლები, ყველა, ვინც მათზეა მინდობილი.

¹⁹ისრაელის სახლო, აკურთხე უფალი! აარონის სახლო, აკურთხე უფალი!

²⁰ლევის სახლო, აკურთხე უფალი! უფლის მოშიშნო, აკურთხეთ უფალი!

²¹კურთხეულია უფალი სიონიდან, დამკვიდრებული იერუსალიმში. ალელუია!