Read სბს–სტოკჰოლმი 2001 ფსალმუნები 18 Bible Online

ფსალმუნები 18 - სბს–სტოკჰოლმი 2001 bible

ფსალმუნები 18

¹დავითისა და მისი მოდგმისათვის საუკუნოდ. გუნდის ლოტბარს. ფსალმუნი დავითისა. ცანი ღაღადებენ ღმერთის დიდებას, და მისთა ხელთა ნამოქმედარს გვამცნობს სამყარო.

²დღე დღეს გადასცემს სიტყვას, ღამე კი ღამეს უმხელს აზრს,

³არც ენა უნდა და არც სიტყვა, მათი ხმა რომ ისმოდეს.

⁴მთელი დედამიწის ზურგზე გადის მათი ხაზი და სამყაროს კიდეებამდე აღწევს მათი სიტყვები; მზეს დაუდგა კარავი მათში.

⁵და ის ვითარცა ნეფე, გამოდის საქორწინო გავალაკიდან; იხარებს ვითარცა გმირი გარბენას გზისას.

⁶ცათა კიდიდან არის მისი აღმოსავალი და მისი ბრუნვა - მათ კიდეებამდე, და ვერაფერი ემალება მის მხურვალებას.

⁷რჯული უფლისა სრულყოფილია, სულს განამტკიცებს; მცნება უფლისა ჭეშმარიტია, გააგონიერებს მიამიტებს.

⁸მართებულია უფლის ბრძანებანი, გულს ახარებენ; მცნება უფლისა სპეტაკია, შუქს აძლევს თვალებს.

⁹შიში უფლისა წმიდა არის, მარადიული. უფლის განსჯანი ჭეშმარიტნი, მართალნი ერთობ.

¹⁰სასურველნი არიან ოქროზე და თვით ბაჯაღლოზე მეტად და უტკბილესნი თაფლისა და გოლეულისა.

¹¹და შენი მორჩილი მათით არის განათლებული; დიდია საზღაური მათი დაცვისათვის.

¹²ვინ გულისხმა-ჰყოს შეცდომანი? განმწმიდე მე დაფარულთაგან.

¹³ნებლიე ცოდვებს განაშორე მსახური შენი, რათა არ გაბატონდნენ ჩემზე; მაშინ უმწიკვლო შევიქმნები, და თავს დავაღწევ დიდ ცოდვას.

¹⁴დაე, იყოს შენთვის სასურველი სიტყვანი ჩემი პირისა და ზრახვანი ჩემი გულისა, უფალო, ბურჯო და დამხსნელო ჩემო.