Read სბს–სტოკჰოლმი 2001 ფსალმუნები 21 Bible Online

ფსალმუნები 21 - სბს–სტოკჰოლმი 2001 bible

ფსალმუნები 21

¹გუნდის ლოტბარს. “ცისკრის აღმობრწყინებისას”. ფსალმუნი დავითისა. ღმერთო ჩემო! ღმერთო ჩემო! რად მიმატოვე? მე შემოგღაღადებ, მაგრამ შორს არის ჩემი შველა.

²ღმერთო ჩემო! მოგიხმობ დღისით და არ მპასუხობ, ღამით - და არ არის სიმშვიდე ჩემთვის.

³შენ კი, წმიდაო, მკვიდრობ ისრაელის ხოტბათა შორის.

⁴შენით იმედოვნებდნენ ჩვენი მამები, იმედოვნებდნენ და იხსენი კიდეც.

⁵შენ გევედრებოდნენ და გადარჩნენ; შენით იმედოვნებდნენ და არ გაწბილდნენ.

⁶მე კი მატლი ვარ და არა კაცი, საძრახისი ადამიანთა და საძულველი ერისა.

⁷ყველა, ვინც მხედავს, მე დამცინის; მქირდავენ და თავს აქნევენ:

⁸“უფალს მიენდო? მაშ მანვე იხსნას, მანვე უშველოს თავის სასურველს.”

⁹რადგან შენ გამომიყვანე დედის მუცლიდან, დამამშვიდე დედის მკერდზე.

¹⁰შენით ვიმედოვნებდი დედის მუცლიდან; დედის წიაღიდან შენ ხარ ჩემი ღმერთი.

¹¹ნუ განმშორდები, რაკი ახლოა უბედურება, ხოლო შემწე არავინ არის.

¹²ირგვლივ მომადგნენ მე ძლიერი მოზვრები, ბაშანის ხარებმა რკალი შემომარტყეს.

¹³პირი დააღეს ჩემს წინააღმდეგ, ვითარცა ლომმა, მსხვერპლს დადევნებულმა და მბრდღვინავმა.

¹⁴ვითარცა წყალი დავიღვარე და დაიშალნენ ჩემი ძვლები; ცვილს დაემსგავსა ჩემი გული, დადნა ჩემს გვამში.

¹⁵გამოიფიტა ჩემი ძალა, ვითარცა თიხა; ენა სასაზე მიმეკრა, და ჩამიყვანე სიკვდილის მიწა-მტვრამდე.

¹⁶რადგან გარს შემომეხვივნენ მე ძაღლები; ბოროტთა ხროვა წრედ შემომერტყა, გამიხვრიტეს ხელნი და ფერხნი.

¹⁷მთელი ჩემი ძვლები დაითვლება; ისინი მიჭვრეტენ ნიშნის მოგებით.

¹⁸ჩემს სამოსელს ინაწილებენ და წილს ყრიან ჩემს კვართზე.

¹⁹და შენ, უფალო, ნუ დამშორდები; სიმძლავრევ ჩემო, ჩემდა შემწედ გამოეშურე.

²⁰გადაარჩინე ჩემი სული მახვილისაგან და ძაღლთაგან ჩემი სიცოცხლე.

²¹მიხსენი ლომის ხახისაგან და მარტორქის რქისაგან!

²²ჩემს ძმებს მოვუთხრობ შენს სახელზე, კრებულთა შორის შეგაქებ შენ.

²³უფლის მოშიშნო, ადიდეთ იგი; პატივი სცეს იაკობის მთელმა მოდგმამ და გეშინოდეთ მის წინაშე, ისრაელის მთელო მოდგმავ!

²⁴რადგან არ დაამცირა მან და არ უგულებელყო ტანჯვა გლახაკისა, და არ მოარიდა პირი თავისი, და უსმინა მას, როცა მოუხმობდა.

²⁵მინდა შეგასხა ხოტბა მრავალ კრებულში, მისთა მოშიშთა წინაშე გადავიხდი აღთქმულს.

²⁶ჭამონ ღატაკთ და გაძღნენ, ადიდონ უფალი მისმა მაძიებლებმა; სამარადჟამოდ იცოცხლონ თქვენმა გულებმა.

²⁷გაიხსენებენ და უფალთან დაბრუნდებიან ქვეყნიერების ყველა კიდენი, და თაყვანს სცემს ყველა ტომი ხალხებისა.

²⁸რამეთუ უფალს შვენის მეფობა და ის არის ხალხთა მბრძანებელი.

²⁹ჭამს და თაყვანს სცემს ამ ქვეყნის ყველა გათქვირებული, მის წინაშე ქედს მოიხრის ყველა, ვინც მტვრად უნდა იქცეს, ვისაც არ ძალუძს თავისი სულის გადარჩენა.

³⁰შთამომავლობა ემსახუროს მას; მოუთხრობს თაობებს უფლის შესახებ.

³¹მოვლენ და მოუყვებიან მის სიმართლეს ხალხს, ახალშობილს, რაც მოიმოქმედა უფალმა.