Read სბს–სტოკჰოლმი 2001 ფსალმუნები 33 Bible Online

ფსალმუნები 33 - სბს–სტოკჰოლმი 2001 bible

ფსალმუნები 33

¹დავითისა. როცა სიგიჟე მოიგონა აბიმელექის წინაშე, განიდევნა და წავიდა. განვადიდებ უფალს ყოველჟამს, მარადისია მისი ქება ჩემს ბაგეებზე.

²უფლით იქადის ჩემი სული; მოისმენენ მშვიდნი და გაიხარებენ.

³ადიდეთ უფალი ჩემთან ერთად და განვადიდოთ მისი სახელი ერთობლივად.

⁴მე მოვიძიე უფალი და მიპასუხა და გამომიხსნა ყველა ჩემი განსაცდელიდან.

⁵მისი შემყურენი განათებულან და მათი პირი არ შერცხვენილა.

⁶აგერ გლახაკმა მოუხმო და უფალმა მოისმინა და ყველა გასაჭირისაგან იხსნა.

⁷დაიბანაკებს ანგელოზი უფლისა მის მოშიშთა ირგვლივ და გადაარჩნს მათ.

⁸განიცადეთ და ნახეთ, რომ კარგია უფალი; ნეტარება მას, ვინც მასზეა მინდობილი.

⁹მოიშიშეთ უფლისა, წმიდანნო მისნო, რადგან არა აქვთ შეჭირვება მოშიშთა მისთა.

¹⁰მდიდარნი გაღატაკდებიან და დაიმშევიან, ხოლო უფლის მაძიებლებს არავითარი სიკეთე არ მოაკლდებათ.

¹¹მოდით, შვილებო, მომისმინეთ! უფლის მოშიშებას გასწავლით თქვენ.

¹²ვინ არის კაცი, რომელსაც სურს სიცოცხლე, უყვარს დღეგრძელობა სიკეთის სანახავად?

¹³შეიკავე შენი ენა სიბოროტისაგან და ბაგენი შენნი - ცბიერი სიტყვებისაგან.

¹⁴ერიდე ბოროტებას და ჰქმენ კეთილი; ეძიე მშვიდობა და მიჰყევი მას.

¹⁵უფლის თვალები მიპყრობილია წმიდებისაკენ და მისი ყურები - მათი ღაღადისაკენ.

¹⁶პირი უფლისა - ბოროტმოქმედთა წინააღმდეგ, რათა წარხოცოს დედამიწიდან მათი სახსენებელი.

¹⁷მოუხმობენ და ისმენს უფალი, და იხსნის ყველა გასაჭირისაგან.

¹⁸ახლოა უფალი გულმოდრეკილებთან, და სულით მორჩილებს იხსნის.

¹⁹მრავალი სიავე ხვდება მართალს; და ყველაფრისაგან იხსნის უფალი.

²⁰ის იცავს მის ყოველ ძვალს, მათგან ერთიც არ შეიმუსრება.

²¹მოკლავს ცოდვილს ბოროტება, ხოლო მართლის მოძულენი პასუხს აგებენ.

²²იხსნის უფალი თავის მორჩილთა სულებს და პასუხს არ აგებენ, ვინც მასზეა მინდობილი.