Read სბს–სტოკჰოლმი 2001 ფსალმუნები 36 Bible Online

ფსალმუნები 36 - სბს–სტოკჰოლმი 2001 bible

ფსალმუნები 36

¹დავითისა. ნუ შეეხარბები ბოროტმოქმედებს, ნუ გშურს მათი, ვინც უკანონობას სჩადის.

²რადგან ბალახივით მალე გახმებიან და მწვანილივით დაჭკნებიან.

³მიენდე უფალს და ქმენ კეთილი; დაემკვიდრე ქვეყანაზე და მწყემსე სიმართლე.

⁴ისიამოვნე უფლის მიერ და ის აგისრულებს გულისწადილს.

⁵მიაქციე ღმერთზე შენი გზასავალი, მიენდე მას და ის აღასრულებს.

⁶და გამოიტანს ნათელივით სიმართლეს შენსას და შენს სამართალს - შუადღესავით.

⁷დაემორჩილე უფალს და დაელოდე მას. ნუ შეგშურდება თავის გზაზე წარმატებულის, კაცისა, რომელიც ბოროტს იზრახავს.

⁸მოეშვი მრისხანებას და მიატოვე გულისწყრომა; ნუ გამძვინვარდები, ვინძლო არ გაბოროტდე.

⁹რადგან ბოროტმოქმედნი ამოწყდებიან და უფალზე მინდობილნი დაიმკვიდრებენ ქვეყნიერებას.

¹⁰კიდევ ცოტა და აღარ იქნება ბოროტი, დაუკვირდები მის ადგილს და აღარ იქნება იგი.

¹¹ხოლო თავმდაბალნი დაიმკვიდრებენ ქვეყნიერებას და დაამდებიან დიდი მშვიდობით.

¹²ცუდი განზრახვა აქვს ბოროტს მართლის მიმართ და კბილებს აღრჭენს მის წინააღმდეგ.

¹³უფალი დასცინებს მას, ვინაიდან ხედავს, რომ მოდის მისი დღე.

¹⁴მახვილი იშიშვლეს ბოროტებმა და მოზიდეს თავიანთი მშვილდები, რათა ძირს დასცენ ღარიბი და ღატაკი, და მოსპონ გზიანები.

¹⁵მათი მახვილი მათსავე გულს განეწონება და მათი მშვილდი შეიმუსრება.

¹⁶მართლის მცირედი სჯობია ცოდვილთა დიდ სიმდიდრეს.

¹⁷რადგან მკლავები უკეთურთა შეიმუსრებიან, ხოლო მართალთა შემწე ღმერთია.

¹⁸იცის უფალმა დღენი უცოდველთა, მათი მემკვიდრეობა უკუნისამდე იქნება,

¹⁹არ შერცხვებიან სიავის ჟამს და შიმშილის დღეებში დაპურდებიან.

²⁰რადგან ბოროტნი დაიღუპებიან და მტერნი უფლისა, ვით ნასუქი ცხვარნი, გაქრებიან, ვითარცა კვამლი გაქრებიან.

²¹ბოროტი ისესხებს და არ გადაიხდის, მართალი კი შეიბრალებს და მისცემს.

²²რადგან მის მიერ ნაკურთხნი დაიმკვიდრებენ ქვეყანას, მის მიერ დაწყევლილნი კი ამოწყდებიან.

²³უფლის მიერ წარიმართება ნაბიჯნი კაცისა, და მის გზას შეიყვარებს.

²⁴კიდეც რომ წაბორძიკდეს, არ დაეცემა, რადგან ღმერთია დასაყრდენი მისი ხელისა.

²⁵ყმაწვილი ვიყავი, კიდეც მოვხუცდი და არ მინახავს მართალი კაცი მიტოვებული, და მისი მოდგმა - პურზე ხელგაწვდილი.

²⁶ყოველდღე მოწყალებას გაიღებს და გაასესხებს, და მისი შთამომავალი კურთხეულია.

²⁷ერიდე ბოროტს და ქმენ სიკეთე და იარსებებ სამარადჟამოდ.

²⁸რადგან უფალს სამართალი უყვარს, და არ მიატოვებს თავის წმიდებს, სამარადისოდ დაცულნი იქნებიან, ბოროტთა ნაშიერი კი ამოწყდება.

²⁹მართალნი დაიმკვიდრებენ ქვეყანას და იარსებებენ მასზე უკუნისამდე.

³⁰მართალთა ბაგენი სიბრძნეს წარმოთქვამენ და მისი ენა სიმართლეს ილაპარაკებს.

³¹რჯული მისი ღმერთისა მის გულშია, არ დაუსხლტება ნაბიჯები.

³²ბოროტი უთვალთვალებს წმიდას და მის მოკვლას აპირებს.

³³მაგრამ უფალი არ მიატოვებს მის ხელში და არ გაამტყუნებს მისი განკითხვის ჟამს.

³⁴მიენდე უფალს და დარჩი მის გზაზე, და ის აგამაღლებს, რომ დაიმკვიდრო ქვეყანა, და დაინახავ უკეთურთა განადგურებას.

³⁵მინახავს ბოროტი გამძვინვარებული, ფესვგადგმული, ვითარცა ხე ამწვანებული.

³⁶მაგრამ გადაიარა და აჰა, აღარ არის, დავეძებ მას და ვეღარ ვპოულობ.

³⁷დაიცავი უმანკოება და ნახე სისწორე, რადგან მომავალი ეკუთვნის მშვიდობიან კაცს.

³⁸ხოლო ბრალეულნი ერთიანად მოისპობიან, ბოროტთა მომავალი გადაშენდება.

³⁹ხოლო წმიდათა შველა უფლისაგან არის, ის არის მათი მფარველი გაჭირვების ჟამს.

⁴⁰და დაეხმარება მათ უფალი და დაიხსნის; დაიხსნის ბოროტთაგან და უშველის, რადგან მასზე არიან მინდობილნი.