Read სბს–სტოკჰოლმი 2001 ფსალმუნები 37 Bible Online

ფსალმუნები 37 - სბს–სტოკჰოლმი 2001 bible

ფსალმუნები 37

¹ფსალმუნი დავითისა. გასახსენებელი. უფალო, შენი განრიხსებისას ნუ მამხილებ და შენი რისხვის ჟამს ნუ დამსჯი.

²რადგან შენი ისრები ჩემშია განწონილი და შენი ხელი მამძიმებს მე.

³არ არის ჯანსაღი ადგილი ჩემს სხეულში შენი რისხვის გამო; არ არის მშვიდობა ჩემს ძვლებში ჩემი ცოდვის გამო.

⁴რადგან ცოდვანი ჩემნი გასცილდნენ ჩემს თავს, მძიმე ტვირთივით დამძიმდნენ ჩემზე.

⁵აყროლდნენ, დალპნენ ჩემი წყლულები ჩემი უგუნურების გამო.

⁶წელში მოვიხარე, ერთობ დავმდაბლდი, მთელ დღეს ნაღვლიანი დავიარები.

⁷რადგან ჩემი წელი გათანგულია სიცხით და აღარ არის ჯანსაღი ადგილი ჩემს სხეულში.

⁸დავუძლურდი და დავძაბუნდი მეტისმეტად, ვღრიალებ ჩემი გულის სატკივრით.

⁹უფალო, შენს წინაშეა ყველა ჩემი სურვილი, და ჩემი ოხვრაც დაფარული არ არის შენგან.

¹⁰ჩემი გული თრთის, ძალღონე განმიდგა, და თვალთა ჩემთა სინათლე - აღარც ის არის ჩემთან.

¹¹ჩემი მოყვარულნი და მეგობარნი განერიდნენ ჩემს წყლულებს, და ჩემი ახლობლები შორს განმიდგნენ.

¹²მახე დამიგეს ჩემი სულის მაძიებლებმა, ჩემი სიავის მსურველები ბჭობენ ჩემს დაღუპვაზე და მთელ დღეს მზაკვრობაზე ფიქრობენ.

¹³მე კი ვერ ვისმენ, ვითარცა ყრუ და ვითარცა მუნჯი, პირს რომ ვერ აღებს.

¹⁴და დავემგვანე კაცს, რომელსაც არ ესიმის და რომლის ბაგეებსაც არ გააჩნია პასუხი.

¹⁵რადგან შენ გელოდები, უფალო. შენ უპასუხე, უფალო, ღმერთო ჩემო.

¹⁶რადგან ვთქვი: “ნუმც გაიხარონ ჩემზე; თუ ფეხი გადამიბრუნდა, გაბატონდებიან ჩემზე.”

¹⁷მარცხისთვის მე მზადა ვარ, და ჩემი სატკივარი ჩემს წინაა მუდამ.

¹⁸რადგანაც ჩემს ბრალს განვაცხადებ, ვიდარდებ ჩემს ცოდვაზე.

¹⁹ჩემი მტრები კი ცოცხლობენ, ძლიერდებიან, და მრავლდებიან ჩემი ამაოდ მოძულენი.

²⁰კეთილის წილ ბოროტის გადამხდელნი მმტრობენ იმისთვის, რომ კეთილს ვცდილობ.

²¹ნუ მიმატოვებ, უფალო, ღმერთო ჩემო, ნუ განმშორდები.

²²გამოეშურე ჩემს შესაწევნად, უფალო, მშველელო ჩემო!