Read სბს–სტოკჰოლმი 2001 ფსალმუნები 44 Bible Online

ფსალმუნები 44 - სბს–სტოკჰოლმი 2001 bible

ფსალმუნები 44

¹გუნდის ლოტბარს. “შოშანისებურად” კორახის ძეთა. მოძღვრება; გალობა სიყვარულისა. აღმოთქვა ჩემმა გულმა ნაზი სიმღერა რასაც მე ვამბობ, მეფეს ეკუთვნის; ჩემი ენა კალამია ხელოვანი მწერლისა.

²ადამის ძეთა უმშვენესი ხარ, მადლი იღვრება შენთა ბაგეთაგან, რადგან გაკურთხა ღმერთმა უკუნისამდე.

³წელზე შეიბი მახვილი, გმირო, შენი დიდებით და შენი მშვენებით.

⁴და ამ შენი მშვენებით დაბრძანდი ეტლზე ჭეშმარიტების, თვინიერებისა და სიმართლის გულისათვის, და გიჩვენებს საოცრებას მარჯვენა შენი.

⁵შენი ისრები წამახულია, ხალხები ეცემიან შენს ფეხქვეშ; გულში ერჭობიან მეფის მტრებს.

⁶ტახტი შენი, ღმერთო, უკუნითი უკუნისამდეა. სამართლის კვერთხია კვერთხი შენი მეუფებისა.

⁷შენ შეიყვარე სიმართლე და შეიძულე ბოროტება; ამიტომ გცხო ღმერთმა, შენმა ღმერთმა, სიხარულის ზეთი შენს მეგობრებზე უმეტეს.

⁸მთელი შენი სამოსი - ვითარცა მური, ალოე და კასია; სპილოს ძვლის დარბაზებიდან გაგამხიარულებენ შენ.

⁹მეფეთა ასულები შენს დიდებულებს შორის არიან; შენს მარჯვნივ დადგა დედოფალი ოფირის ოქროთი შემკული.

¹⁰მისმინე, ასულო, გამოიხედე და მომაპყარ ყური. და დაივიწყე ხალხი შენი და სახლი მამაშენისა.

¹¹და დატკბება მეფე შენი მშვენებით - რადგან ის არის შენი უფალი -, და თაყვანი ეცი მას.

¹²და ასულნი ცორისა ძღვენით მოვლენ; მუდარას დაგიწყებენ ერის მდიდარნი.

¹³მთელი დიდება მეფის ასულისა შიგნითაა; მოოქროვილია მისი სამოსი.

¹⁴მოქარგული კაბით მოჰყავთ იგი მეფესთან; მის უკან ქალწულნი, დობილნი მისნი, მოჰყავთ შენთან.

¹⁵მოჰყავთ სიხარულით და ლხინით, შედიან მეფის სასახლეში.

¹⁶შენს წინაპართა ადგილას იქნებიან ძენი შენნი; მათ დააყენებ მთავრებად მთელს ქვეყანაზე.

¹⁷გავიხსენებ შენს სახელს თაობიდან თაობაში, ამიტომ ხალხები ხოტბას შეგასხამენ უკუნითი უკუნისამდე.