Read სბს–სტოკჰოლმი 2001 ფსალმუნები 45 Bible Online

ფსალმუნები 45 - სბს–სტოკჰოლმი 2001 bible

ფსალმუნები 45

¹გუნდის ლოტბარს. კორახის ძეთა. ყალამოთის ხმაზე. გალობა. ღმერთია ჩვენი მფარველი და ძალა, შემწე გაჭირვებაში, საძებარი ფრიად.

²ამიტომ არ შეგვეშინდება, თუნდაც პირი იცვალოს ქვეყნიერებამ და მთები დაიძრნენ ზღვათა გულისაკენ.

³თუნდაც იხმაურონ, იბობოქრონ მათმა წყლებმა. მთები შეირყევიან მათი მედიდურებით.

⁴მდინარე, მისი ნაკადები გაახარებენ ღვთის ქალაქს, წმიდა სადგომს ზენაარისას.

⁵ღმერთი მის შუაგულშია; არ წაბორძიკდება, ღმერთი შეეწევა მას გარიჟრაჟზე.

⁶ახმაურდნენ ხალხები, შეიძრნენ სამეფონი, გამოსცა ხმა - გაქრა ქვეყანა.

⁷ძალთა უფალი ჩვენთან არის; ჩვენი ბურჯია ღმერთი იაკობისა.

⁸მოდით, იხილეთ საქმენი უფლისანი, როგორ გააპარტახა დედამიწა.

⁹შეწყვეტს ომებს დედამიწის კიდით-კიდემდე, მშვილდს შემუსრავს და შუბს დაამსხვრევს, ეტლებს დაბუგავს ცეცხლით.

¹⁰“შეჩერდით და გაიგეთ, რომ მე ვარ ღმერთი: ამაღლებული ხალხებს შორის, ამაღლებული ქვეყნიერებაზე.”

¹¹ძალთა უფალი ჩვენთან არის; ჩვენი ბურჯია ღმერთი იაკობისა.