Read სბს–სტოკჰოლმი 2001 ფსალმუნები 49 Bible Online

ფსალმუნები 49 - სბს–სტოკჰოლმი 2001 bible

ფსალმუნები 49

¹ფსალმუნი ასაფისა. ღმერთმა ღმერთთამან, უფალმა დაილაპარაკა და მოუწოდა ქვეყნიერებას მზის ამოსავლიდან მის დასავლამდე.

²სიონიდან, მშვენიერების სრულქმნილებიდან, გამობრწყინდა უფალი.

³მოვა ჩვენი ღმერთი და ნუმც დადუმდება; მის წინაშე მწველი ცეცხლია, და მის ირგვლივ - ძლიერი ქარიშხალი.

⁴მოუწოდებს ცას ზევიდან და დედამიწას თავისი ხალხის სამსჯავროზე:

⁵“შემოიკრიბეთ ჩემი წმიდები, რომელთაც აღთქმა დადეს ჩემთან შესაწირავზე.”

⁶და წარმოთქვამენ ცანი მის სიმართლეს, რადგან ღმერთია თვით მსაჯული.

⁷“ისმინე, ჩემო ხალხო, და გელაპარაკები; ისრაელო, გაგაფრთხილებ შენ: მე ვარ ღმერთი, შენი ღმერთი.

⁸მსხვერპლისათვის კი არ გისაყვედურებ; შენი შესაწირავები ყოველთვის ჩემს წინაშეა.

⁹არ შევიწირავ შენი სახლიდან ზვარაკს, არც შენი ფარეხებიდან ვაცებს.

¹⁰რადგან ჩემია ტყის ყველა ცხოველი, პირუტყვი ათასობით მთებში.

¹¹ჩემთვის ცნობილია მთის ყველა ფრინველი და მინდვრის ცხოველები ჩემს წინაშე არიან.

¹²თუ მომშივდა არ გეტყვი შენ, რადგან ჩემია მსოფლიო და სავსება მისი.

¹³ნუთუ ხარების ხორცსა ვჭამ და ვაცების სისხლს შევსვამ?

¹⁴მადლობა შესწირე ღმერთს და შეუსრულე უზენაესს აღთქმები შენი.

¹⁵და მომიხმე მე გაჭირვების დღეს; გადაგარჩენ და შენ განმადიდებ.”

¹⁶ბოროტს კი უთხრა ღმერთმა: “რას ქადაგებ ჩემს კანონებს და პირთან მიგაქვს ჩემი პირობა,

¹⁷გძულს დარიგება და უკუმოისროლე ჩემი სიტყვები?

¹⁸როცა ქურდს დაინახავ, მასთან გაიქცევი, და გარყვნილებთან გაქვს წილი.

¹⁹პირი შენი მიშვებული გაქვს სიავეზე და შენი ენა თხზავს სიყალბეს.

²⁰დაჯდები და შენი ძმის წინააღმდეგ ლაპარაკობ, და დედაშენის შვილის შერცხვენას ცდილობ.

²¹ეს ჩაიდინე შენ და მე ვდუმდი; გეგონა, რომ მეც შენსავით ვარ; გამხილებ და შენს თვალწინ დაგიმტკიცებ.

²²ჩაუფიქრდით ამას, ღმერთის დამვიწყებლებო, რომ არ მოგსრათ და არ იყოს მშველელი.

²³მადლობის შემომწირავი განმადიდებს მე, და ვინც სწორ გზას დაადგება, მას ვუჩვენებ შველას ღმერთისას.”